Ko e Teuteu ke Feʻiloaki mo e ʻOtuá

ʻOku lahi ha ngaahi founga te tau lava ʻo fakaʻaongaʻi ki ai hotau taimí ʻi he teuteu ke feʻiloaki mo e ʻOtuá. ʻOku ou tui te tau lava ʻo tui tatau ko e houa mahuʻinga taha ʻo e uiké ʻa e taimi ʻoku tau maʻu ai ʻa e sākalamēnití, fakafoʻou ʻetau ngaahi fuakava mo e Tamai Hēvaní, fakalaulauloto ki he ʻofa ʻoku tau ongoʻi meiate Iá pea mo e ʻamanaki lelei te tau lava kotoa ʻo maʻu tuʻunga ʻi he Fakalelei Hono ʻAlo ko Sīsū Kalaisí, ʻi he uike kotoa pē.

ʻOku ou tui foki ko e taimi ko ia ʻoku tau fakamoleki ʻi heʻetau ngaahi kalasi Lautohi Faka-Sāpaté, ʻe ala tokoni lahi ʻi heʻetau teuteú, ʻo mahulu hake he meʻa ʻoku tau fakatokangaʻí. Ka koeʻuhí ke ngāue ʻaonga ʻaki e faingamālie ko iá, ʻe fie maʻu ke tau vakavakaiʻi ʻetau ō ki he Lautohi Faka-Sāpaté.

Ko e taumuʻa ʻo e Lautohi Faka-Sāpaté ke “fakamālohia e tui ʻa e fakafoʻituituí mo e ngaahi fāmilí ki he Tamai Hēvaní mo Sīsū Kalaisi ʻi hono akoʻí, ʻi hono akó, pea mo e fakafeohí.”¹ ʻOku mahuʻinga fau e ngaahi ʻelemēniti mahuʻinga ko ʻeni ʻo e uluí ʻi heʻetau feinga ke teuteu ke feʻiloaki mo e ʻOtuá. ʻOku tau fiefia ʻi he ngāue ʻa e kau faiako ʻi he funga māmaní ke fakaleleiʻi ʻenau malava ke faiakó ʻo ngāue ʻaki e Ko e Faiako ʻi he Founga ʻa e Fakamoʻuí mo e ngaahi fakataha alēlea ʻa e faiakó.

Ka ʻoku ʻikai feʻunga ʻa e fakaleleiʻi pē ʻo e founga faiakó. Kuo pau ke tatau ia mo ʻetau feinga ke ako ʻi he founga ʻa e Fakamoʻuí. Naʻá Ne folofola kuo pau ke tau fekumi ki he ʻiló “ʻi he ako pea ʻi he tui foki” (T&F 109:7). Ko e tuí ko ha tefitoʻi moʻoni ia ʻo e ngāue. Kuo pau ke tau fakahoko kapau ʻoku tau loto ke ʻiloʻi (vakai, Sione 7:17).

ʻE lava heʻetau ngaahi kalasi Lautohi Faka-Sāpaté ʻo poupouʻi e faʻahinga akoʻi mo e ako ko ʻení ʻi he taimi ʻoku nau hoko ai ko ha feituʻu ʻoku malu ke fevahevaheʻaki ai e ngaahi aʻusia ʻoku tau maʻú pea mo e ongoʻi fakalaumālie ne tau ongoʻi he lolotonga e uiké ʻi heʻetau ako mo fakaʻaongaʻi e ngaahi folofolá he teuteu ki he kalasí. ʻI heʻetau “feakoʻiʻaki … ʻa e tokāteline ʻo e puleʻangá … ke fakamāmaʻi kotoa pē” (T&F 88:77, 122).

Kuo fakaafeʻi kitautolu takitaha ʻe he Kau Palesitenisī ʻUluakí kimuí ni mai ke tau “ui ʻa e Sāpaté ko e fakafiefia” (ʻĪsaia 58:13) ʻi heʻetau moʻuí. ʻOku tokoniʻi kitautolu ʻe he aʻusia ʻo e houa ʻe tolu ʻo e Sāpaté ke tau fakahoko ʻa e taumuʻa ko iá.

Tuku ke u fai atu ha fehuʻi ʻe taha ʻi he laumālie ko iá: Ko e hā ʻoku tau fili ai he taimi ʻe niʻihi ke ʻoua te tau tali kakato e faingamālie ʻoku ʻomi ʻe he Lautohi Faka-Sāpaté?

Kuó u siotonu ʻi he ngaahi taʻu kimui ní ʻi ha ngaahi “meʻa kehe” lahi ʻi he lolotonga ʻo e taimi Lautohi Faka-Sāpaté, kau ai ʻa e talanoa ʻi he loto holó, fakahoko ʻe he kau taki fakauōtí ha ngaahi ʻinitaviu, akoʻi ʻe he kau taki fakasiteikí honau kaungā ngāue ʻi he uōtí, pea mo hono aleaʻi ʻe he kau taki ʻo e toʻu tupú e ngaahi meʻa fekauʻaki mo ha polokalama.

ʻOku mahino kiate au ʻa e ʻuhinga ʻe ala fakaʻaongaʻi ai ʻe he kau takí e taimi Lautohi Faka-Sāpaté ke fai ha ngaahi meʻa kehe, ʻi he ʻapiʻapi honau taimí. Ka ko ha tāpuaki moʻoni ke kau ʻi he taimi kuo vaheʻi ai ʻe he kau taki fakauōtí ha houa ʻe taha ke kau kātoa ʻi he aleaʻi ʻo e ongoongoleleí mo e kāingalotu ʻo honau uōtí!

ʻOku ou tui kuo mou ʻosi aʻusia ha ngaahi sīpinga kehe ʻo e “taʻe-tokanga ki he Lautohi Faka-Sāpaté.” ʻOku kehekehe e ngaahi ʻuhinga, kuo ongoʻi ai ʻe hatau tokolahi ʻoku ʻikai ke tau maʻu ha meʻa lahi mei he ngaahi kalasi Lautohi Faka-Sāpaté, ʻo fakatatau mo ʻetau fie maʻú. Kuó u ʻiloʻi ko e tuʻunga lelei ʻo ʻeku aʻusia he Lautohi Faka-Sāpaté ʻoku makatuʻunga hano konga lahi ʻi heʻeku teuteú mo kau ki aí tatau mo ʻeku faiakó. Kuo tohi ʻe Misa Teti R. Kalisitā, ko e Palesiteni Lahi ʻo e Lautohi Faka-Sāpaté, “ʻI he taimi kotoa pē ʻoku tau ako ai e folofolá, haʻu mateuteu ange ki he kalasí, kau ʻi he ngaahi alēlea he kalasí, fai ha ngaahi fehuʻi, pea hiki ʻa e ngaahi ongo toputapú, ʻoku fakaʻau ke tau hoko ange ʻo hangē ko e ʻOtuá, ʻo toe tupulaki ange ai ʻetau malava ke aʻusia ʻa e fiefia ʻokú Ne aʻusiá.”²

ʻOku ou fakaafeʻi kimoutolu ke fai homou lelei tahá ke teuteu pea mo maluʻi ʻa e houa Lautohi Faka-Sāpaté. ʻOku totonu ke maʻu ʻe he mēmipa kotoa ʻo e uōtí mo e koló, kau ai mo e kau takí, ʻa e tāpuaki fakafiefia ʻo e teuteu ke feʻiloaki mo e ʻOtuá lolotonga e houa mahuʻinga ko ʻeni ʻi he uike takitaha.