Founga ke Faʻa-kātaki Aí

ʻĪmisi

how to be patient

ʻE lava pē ke faingataʻa ʻa e faʻa tatalí. ʻOku ʻiloʻi ia ʻe he fānaú, pea pehē ki he kakai lalahí. ʻOku tau moʻui ʻi ha māmani ʻoku lava ke maʻu ʻa e meʻakaí he taimi pē ko iá, feʻaveʻaki pōpoaki ʻi he taimi pē ko iá, ngaahi heleʻuhilá ʻoku maʻu he taimi pē ko iá, pea maʻu mo e tali ki he ngaahi fehuʻi maumau taimi pe mahuʻinga tahá he taimi pē ko iá. ʻOku ʻikai ke tau saiʻia he tatalí. ʻOku ʻi ai ha niʻihi ʻoku nau ongoʻi ʻa e lele ki ʻolunga honau totó ʻi he tuai ange e ʻunu ʻa e laine ʻoku tuʻu ai ʻi falekoloá ʻi he ngaahi laine kehé.

“Ko e faʻa kātakí—ʻa e malava ko ia ke kiʻi fakatatali hifo ʻetau ngaahi fie maʻú—ko ha ʻulungaanga mahuʻinga mo hāhāmolofia ia. ʻOku tau fie maʻu e meʻa ʻoku tau fie maʻú pea ʻoku tau fie maʻu ia ʻi he taimi pē ko iá. ʻI heʻene peheé, ʻoku hangē leva ko ha meʻa taʻefakafiemālie mo faingataʻa he taimi ʻe niʻihi ke tau tali ʻa e faʻa kātakí.

Neongo iá, ka ʻikai ke tau faʻa kātaki, he ʻikai ke tau lava ʻo fakahōifua ki he ʻOtuá; he ʻikai ke tau hoko ʻo haohaoa. Ko e moʻoni, ko e faʻa kātakí ko ha founga fakamaʻa ia ʻokú ne fakaleleiʻi ʻa e mahinó, fakalahi ʻa e fiefiá, ʻai ke tuku taha ʻetau tokangá ʻi he ngāue ʻoku tau faí, pea ʻomi ʻa e ʻamanaki lelei ki he melinó.

ʻOku ʻikai ko e faʻa kātakí ʻa e faʻa tatalí pē. ʻOku ʻikai ko e faʻa kātakí ʻa e tuku ā ʻo ʻikai toe fai ha meʻa, pe ko e ʻikai fai ha ngāue koeʻuhí ko ʻetau manavasiʻí. ʻOku ʻuhinga ʻa e faʻa kātakí ki he faʻa tatali mo e kātaki. ʻOku ʻuhinga ki haʻatau vilitaki ʻi hono fai ha meʻa pea fai e meʻa kotoa te tau lavá—ʻa e ngāué, ʻamanaki leleí, mo ngāue ʻaki e tuí; fua e faingataʻá ʻi he loto-toʻa, ʻo aʻu pē ki he tuai ʻene hoko ʻa e ngaahi holi ʻa hotau lotó. ʻOku ʻikai ko e faʻa kātakí ʻa e kātakí ʻataʻatā pē: ka ko hono kātakiʻi ke lelei! ʻOku ʻuhinga e faʻa kātakí ke kātakiʻi ha meʻa ki he ngataʻangá. ʻOku ʻuhinga ia ke fakatoloi hono fakatōliʻa leva ʻo e fie maʻú koeʻuhí ko ha tāpuaki he kahaʻú. ʻOku ʻuhinga ki he fakamaʻumaʻu ʻo e ʻitá, pea taʻofi ʻa e lea taʻeʻofá. ʻOku ʻuhinga ki hono tekeʻi ʻo e koví neongo ʻa e hangē ʻe ngali koloaʻia ai ʻa e niʻihi kehé.

ʻOku ʻuhinga ʻa e faʻa kātakí ki hono tali ʻo e meʻa ʻe ʻikai lava ke liliú pea fehangahangai mo ia ʻi he loto-toʻa, manavaʻofa pea mo e tui. ʻOku ʻuhinga ki he “fakavaivai ʻi he meʻa kotoa pē ʻoku ʻafioʻi ʻe he ʻEikí ʻoku lelei ke ne fai [kiate kitautolú], ʻo hangē ʻoku fakavaivai ʻe ha tamasiʻi siʻi ki heʻene tamaí” (Mōsaia 3:19). Fakaʻosí, ʻoku ʻuhinga ʻa e faʻa kātakí ke “tuʻu maʻu mo tuʻu ʻaliʻaliaki taʻelava ke ueʻi ʻi he tauhi ʻo e ngaahi fekau ʻa e ʻEikí” (1 Nīfai 2:10) ʻi he houa kotoa pē he ʻaho kotoa, ʻo aʻu ki he taimi ʻoku faingataʻa ai ke fai iá.

Ko e tefitoʻi fakakaukau ʻeni ʻo e kātakí: tauhi e ngaahi fekaú; falala ki he ʻOtua ko ʻetau Tamai Hēvaní; tauhi kiate Ia ʻi he angamalū mo e ʻofa faka-Kalaisi; fakahaaʻi e tuí mo e ʻamanaki lelei he Fakamoʻuí pea ʻoua ʻe foʻi. ʻE hanga ʻe he ngaahi lēsoni ʻoku tau ako mei he faʻa kātakí ʻo fakatupulaki hotau ʻulungāngá, langaki hake ʻetau moʻuí, pea ʻai ke lahi ange ʻetau fiefiá. Te nau tokoni ke tau hoko ko ha kau ākonga faivelenga ʻa hotau ʻEiki ko Sīsū Kalaisí.