Ang mga Artikulo sa Hugot nga Pagtuo
Adriana González
Central Department, Paraguay
Dihang nangutana ko bahin sa sinaw nga asul nga lamesa tunga-tunga sa kusina ni Adriana, akong nahibaloan nga dihay panahon nga siya walay lamesa. Naningkamot nga makasapar sa galastuhan, mikuha siya sa mga kurso sa self-reliance sa Simbahan ug nakahukom nga makaluto ug makapamaligya siya og pan—kon duna pa lang siyay lamesa. Nag-ampo siya alang sa panabang ug naghimo og lamesa gamit ang scrap nga kahoy.
Cody Bell, litratista
Usa sa mga butang nga gikinahanglan gyud nako niana nga higayon mao ang lamesa. Ang akong lamesa kaniadto, naguba. Dunay mihatag nako og mga piraso sa kahoy tungod kay sila nasayud nga ako walay kwarta, apan ako adunay pipila ka gagmayng mga piso ug posibling magamit ang kahoy sa paghimo og tangkal sa manok. Nag-ampo ko aron masayud unsay buhaton Gibati nako nga kinahanglan tawgon nako ang akong higala nga panday aron mahibaloan unsay mahimo niini. Miingon siya, “Maghimo ta og lamesa nimo.” Mao kana ang akong gikinahanglan.
Ang tanan nga akong gipangayo, Iyang gidungog. Nakadungog Siya kanako tungod kay Siya nasayud nga kini maayo alang kanako. Karon duna na tay duha ka lamesa. Kini nga lamesa importante sa atong pamilya. Maglingkod kami dinhi aron makigbahin. Dinhi kami motrabaho. Itudlo namo unsay among nakat-unan dinhi ngadto sa uban. Pinaagi sa self-reliance, akong nakat-unan ang paghatag og bili sa akong kaugalingon. Nadiskubrihan nako ang mga talento nga gihatag sa Dios kanako aron pagtabang nako ug sa akong pamilya. Paningkamutan nako sa pagtudlo unsay akong nakat-unan ngadto sa akong igsoong mga babaye sa Relief Society, sa pagtabang nila sa paghatag og bili sa ilang kaugalingong isip mga anak nga babaye sa Dios. Mapasalamaton ako nga makapanalangin niadtong anaa sa akong palibut.
Nindot ang imong bation kon ikaw makaamgo sa tanang gihatag sa Dios kanimo ug ikaw makaadto ug makagamit niini sa pagtabang sa uban. Kinahanglan natong palamboon ang kada talento nga ania nato aron atong ipakigbahin sa uban.
Sayo sa adlaw magsugod na si Adriana samtang siya nag-andam sa harina alang sa pan nga iyang lutoon ug ibaligya. Sa tibuok adlaw ang lamesa sa kusina maoy nahimong pundukanan sa pamilyang González.
Ang pagpakaon sa mga manok kabahin sa gamay nga negosyo ni Adriana. Ang ilang itlog importante nga sagol sa iyang pan.
Ang mga pan nga gibaligya ni Adriana nakatabang sa iyang pamilya nga mahimong self-reliant pinaagi sa pagpadugang sa kinitaan sa pamilya. Nagbilin siya og pipila ka buok aron ihatag sa iyang pamilya.
Mohatud si Adriana og init nga pan ngadto sa iyang mga silingan.