1 Mga Taga-Corinto 10:13

Si Apostol Pablo mitudlo kon unsaon nato nga maantus ang tintasyon.

13 Walay nakaabut nga bisan unsang pagpanulay nga dili maantus sa tawo: apan ang Dios kasaligan, dili niya itugot kamo nga pagapanulayon sa labaw sa inyong kaarangan, apan uban sa pagpanulay siya magatagana usab ug lutsanan sa paglikay, aron kamo makahimo sa pag-antus niini.

Tintasyon

Imahe

Elder Robert D. Hales

“Ang kaaway … nakahibalo kon asa, kanus-a, ug unsaon sa pagtintal kanato. Kon kita nagmasulundon sa mga pag-aghat sa Espiritu Santo, makat-on kita sa pag-ila sa mga pagdani sa kaaway. …

“Ang atong kalampusan wala gayud gisukod kon unsa ka lig-on tintalon apan kon sa unsa kita kamatinud-anon nga motubag. Kinahanglan kita nga mangayo og panabang sa atong Langitnong Amahan ug magtinguha og kusog pinaagi sa Pag-ula sa Iyang Anak, nga si Jesukristo.”

Si Elder Robert D. Hales sa Korum sa Napulog Duha ka mga Apostoles, Abril 2009 kinatibuk-ang komperensya.

Komon sa Tawo

Mahimong managlahi ang atong mga tintasyon, apan kitang tanan gitintal. Ang tintasyon gikinahanglan, kay “kinahanglan gayud nga ang yawa motintal sa mga katawhan, o sila dili mahimo nga molihok alang sa ilang mga kaugalingon” (D&P 29:39).

Ang Dios Matinud-anon

Matinud-anon—kasaligan, maunungon. Makasalig kita sa mga saad sa Dios nga Siya motabang nato nga maantus ug makalingkawas sa tintasyon.

Labaw pa Nianang Imong Maantus

Kinahanglan maningkamot kita nga molikay sa tintasyon. Usahay atong lisudlisuron ang atong kaugalingon pinaagi sa dili pagsalikway sa tintasyon sa higayon nga moabut kini. Sumala sa gitudlo ni Elder Neal A. Maxwell (1926–2004) sa Korum sa Napulog Duha ka mga Apostoles, “Syempre si Jesus nakamatngon sa hilabihan nga mga tintasyon nga miabut kaniya, apan wala Niya kini hunahuna. Gani, Iyaha dayon kining gisalikway. Kon atong abiabihon ang mga tintasyon, moabiabi dayon kini nato!” (Kinatibuk-ang komperensya sa Abr. 1987)

Usa ka Paagi sa Paglingkawas

Adunay kanunay nga kalingkawasan—lain nga kapilian, dapit nga kaadtoan, butang nga buhaton. Kon pakyas ang tanan, sunda ang ehemplo ni Joseph sa Ehipto ug dagan lang palayo (tan-awa sa Genesis 39:7–12).

Makahimo sa Pag-antus Niini

Ang mga kasulatan naghatag kanato og mga yawe sa pagtabang kanato sa atong mga responsibilidad sa paglikay sa mga tintasyon aron makalahutay kita niini:

Pagbantay ug pag-ampo sa kanunay (tan-awa sa Mateo 26:41; Alma 13:28; 31:10; 34:39; 3 Nephi 18:18; D&P 31:12).
Salig ni Jesukristo (tan-awa sa Alma 37:33), tungod kay “kay maingon nga siya gayud nakaantus man sa diha nga gitintal siya, nan, makahimo siya sa pagtabang kanila nga mga ginatintal” (Mga Hebreohanon 2:18; tan-awa usab sa Alma 7:11).
“Magpaubos sa inyong mga kaugalingon” (Alma 13:28) ug “pagbantay sa garbo” (D&P 23:1).
“Mopatalinghug sa pulong sa Dios, ug … hugot nga mogunit niini” (1 Nephi 15:24).