Pagsakripisyo sa Akong Pundo sa Misyon
Paghulagway ni Joshua Dennis
Nagpasakop ko sa Simbahan sa wala pa ang akong ika-21 nga birthday. Mibati ko og dakong tinguha sa pag-alagad og misyon, apan naa ko sa malisud nga sirkumstansya. Tungod kay gibiyaan mi sa akong amahan, ako ang nagsuporta og pinansyal sa akong inahan ug tulo ka manghud. Hapit tanan nakong kwarta padulong sa akong pamilya. Niadtong higayona kinahanglan nimo ang dili mo minus £500 (mga 30 mil pesos) sa dili pa mo-aplay og misyon. Human sa duha ka tuig nga pagtigum, aduna pa gihapon koy mga £250 (mga 15 mil pesos).
Daghang sangu sa pinansyal nanghitabo usa human sa lain. Ang akong manghud nga lalaki nakasugat og kagubot ug gipamulta og £240 (mga 15 mil pesos). Ang akong pamilya mihangyo nga pahuwamon siya sa kwarta—hapit ang tanan nga diha kanako. Daw mura kini og pagpili tali sa misyon ug sa akong igsoon, bisan og misaad siya nga ilisan ko kon makahimo na unya siya. Nanglimbasug ko sa desisyon ug nanghangyo og tambag gikan sa akong bishop. Mitambag siya nga akong tabangan ang akong manghud. Gisunod nako ang iyang tambag ug nabayran ang multa. Nasayud ko nga mao kadto ang eksakto nga buhaton, apan disperado ako nga magmisyon.
Abi nako pila pa ka tuig una ko makatigum og balik sa kwarta, apan pinaagi sa mapaubsanon nga pag-ampo, nakadawat ko og impresyon bahin sa umaabut. Miingon kanako ang Espiritu nga dili na magdahum pa nga mabayran ko og balik sa akong manghud ug nga makamisyon ra ko sa sunod tuig. Miabut og duha ka tuig sa pagtigum sa kwarta nga gihatag nako sa akong manghud, apan ang Ginoo misulti kanako nga kaduhaon kadto nga akong madawat sa katapusan sa tuig.
Nagduhaduha ko apan mipadayon, ug matag semana sulod sa 10 ka semana, usa ka milagro nahitabo. Usa ka young single adult sa ward nakadungog giunsa nako pagsakripisyo ang akong pundo para misyon ug mihatag kanako og £100 (mga 10 mil pesos) para sa akong misyon. Pagkasunod semana laing young adult ang mihatag kanako og £100 sa samang rason. Mapaubsanon ko ug misugod sa paghinulsol sa akong walay pagtuo.
Unya, ang akong employer mihangyo nga ang uban namo mo-resign (pinansyal nga incentive sa mga empleyado nga boluntaryo nga mo-resign). Miboluntaryo ko apan wala ko magtuo nga apilon, tungod kay dako na sila og nagasto nako sa akong training. Nangutana ang akong amo nganong gusto ko nga mataktak, mao nga akong gipasabut bahin sa akong misyon. Gihatagan ko niya og umento giapil ang milabay na nga pipila ka semana nga gi-backdate ug gidawat ang akong pagsumiter alang sa mga sobra nga mga empleyado. Gihatagan sab ko niya og bonus sa akong pagbiya.
Nakakita ko og temporaryo nga trabaho, nga nahimong full-time nga trabaho human sa duha ka semana. Ila usab kong gihatagan og overtime sa katapusan sa semana. Gidawat nako kada Sabado. Gisumiter nako ang akong mga papeles sa misyon sa wala madugay ug gitawag sa pag-alagad sa England London Bristol Mission. Nakatigum ko og £2,500 (mga 150,000 pesos) sa wala pay usa ka tuig. Sa tinuod lang nakadawat ko og 10 ka pilo sa kantidad nga akong nahatag. Sa Lucas 6:38 mabasa kini: “Panghatag kamo, ug kamo pagahatagan; ang takus nga pinaugdo, dinasok, ug tinantan, ug magaawas, igabutang ra unya diha sa inyong sabakan. Kay ang takus nga inyong igahatag mao usab unya ang takus nga inyong pagadawaton.”
Nasayud ko nga napanalanginan ko sa akong pagkamasulundon ug pagtuo sa pagsunod sa tambag sa akong bishop.