“Maingon nga Ako Nahigugma Kaninyo”

Imahe

Father with children

Daghang tuig na ang milabay usa ka higala nga ginganlan og Louis misugilon kanako og usa ka malumo nga istorya kabahin sa iyang buotan, hinay og tingog nga inahan. Sa dihang namatay siya, wala gayud siyay nabilin nga dakong kantidad nga kwarta sa iyang mga anak apan usa lamang ka kabilin nga bahandi sa panig-ingnan, sa sakripisyo, sa pagkamasulundon.

Human nasulti ang mga pasidungog sa lubong ug ang makaguol nga pagpanaw padulong sa menteryo, ang nanagko na nga pamilya mihagpat sa gamay ra kaayong kabtangan nga gibilin sa inahan. Taliwala niini, si Louis nakadiskubre og mubo nga sulat ug usa ka yawe. Ang mubo nga sulat miingon: “Sa suok sa lawak katulganan, sa kinaubsan nga hunos sa akong aparador, naay gamay nga kahon. Anaa dinhi ang akong pinakabililhon nga bahandi. Ang yawe maoy moabli sa kahon.”

Ang tanan natingala unsay anaa sa ilang inahan nga dunay dakong bili nga giyawehan man gayud kini.

Ang kahon gikuha gikan sa nahimutangan niini ug hinay nga giabli gamit ang yawe. Samtang si Louis ug ang uban mitan-aw sa sulod sa kahon, ilang nakit-an ang indibidwal nga litrato sa matag anak, nga naa ang ngalan ug petsa sa pagkatawo sa bata. Si Louis mikuha sa usa ka hinimo nga valentine. Ang bati, binata nga agi, nga iyang nailhan nga iyaha, iyang gibasa ang mga pulong nga iyang gisulat 60 na ka tuig ang minglabay: “Mahal kong Inahan, Gihigugma ko ikaw.”

Natandog ang ilang kasingkasing, mihinay ang mga tingog, ug nagluha ang mga mata. Ang bahandi sa inahan mao ang iyang mahangturon nga pamilya. Ang kalig-on niini anaa sa dili matarug nga pundasyon sa “gihigugma ko ikaw.”

Sa kalibutan karon, dili makita kana nga lig-ong pundasyon sa gugma nga mas gikinahanglan sa panimalay. Ug dili nimo makita bisan asa sa kalibutan ang mas maayo nga ehemplo niana nga pundasyon kon dili diha sa mga panimalay sa mga Santos sa Ulahing mga Adlaw kinsa nakapahimo sa gugma nga maoy pinakasentro sa ilang kinabuhi sa pamilya.

Alang niadtong kinsa namahayag nga mga tinun-an sa Manluluwas nga si Jesukristo, mihatag Siya niining impluwensyal nga instruksyon:

“Ako magahatag kaninyog bag-ong sugo, Nga kinahanglan maghigugmaay kamo ang usa sa usa; maingon nga Ako nahigugma kaninyo, kinahanglan maghigugmaay usab kamo ang usa sa usa.

“Ang tanang tawo makaila nga kamo mga tinun-an ko, kon kamo maghigugmaay ang usa sa usa.”¹

Kon kita mosunod sa sugo sa paghigugma sa matag usa, kinahanglang tagdon nato ang usag usa uban sa pagbati ug pagtahud, mopakita sa atong gugma sa inadlaw-adlaw nga panag-istoryahanay. Ang pagpakita og gugma naghatag og usa ka mabination nga pulong, usa ka mapainubsanon nga tubag, usa ka buhat nga dili hinakog, usa ka masinabtanon nga dunggan, usa ka mapasayloon nga kasingkasing. Sa tanan natong pakig-uban, kini ug ang ubang samang kinaiya makatabang sa pagpakita sa gugma nga anaa sa atong kasingkasing.

Si Presidente Gordon B. Hinckley (1910–2008), miobserbar: “Ang gugma … mao ang kulon sa bulawan nga anaa sa katapusan sa bangaw. Gani labaw pa kini sa katapusan sa bangaw. Ang gugma anaa usab sa sinugdanan, ug gikan niini mogawas ang kaanyag nga nag-arko diha sa kalangitan sa unoson nga adlaw. Ang gugma mao ang seguridad diin ang mga bata mohilak, ang paghandum sa kabatan-on, ang papilit nga nagbugkos sa kaminyoon, ug ang pakalma nga impluwensya nga nagpugong sa makaguba nga priksyon diha sa panimalay; mao kini ang kalinaw sa katigulangon, ang hayag sa paglaum nga nagdan-ag lahus sa kamatayon. Kadto nga mga tawo adunahan kaayo kinsa nalipay niini sa ilang panag-uban sa pamilya, mga higala, simbahan, ug mga silingan.”²

Ang gugma mao ang kahulugan sa ebanghelyo, ang labing dungganan nga kinaiya sa kalag sa tawo. Ang gugma mao ang ikaayo alang sa masakiton nga mga pamilya, masakiton nga mga komunidad, ug masakiton nga mga nasud. Ang gugma mahimong mapakita pinaagi sa pahiyum, sa balud, sa mabination nga komentaryo, ug sa pagdayeg. Ang gugma usa ka sakripisyo, pangalagad, ug walay paghunahuna sa kaugalingon.

Mga bana, higugmaa ang inyong mga asawa. Tagda sila uban sa kaligdong ug pagdayeg. Mga sister, higugmaa ang inyong mga bana. Tagda sila uban sa pagtahud ug pagdasig.

Mga ginikanan, higugmaa ang inyong mga anak. Pag-ampo alang kanila, pagtudlo kanila, ug pagpamatuod diha kanila. Mga anak, higugmaa ang inyong mga ginikanan. Ipakita kanila ang pagtahud, pagpasalamat, ug pagkamasulundon.

Kon wala ang tinuonay nga gugma ni Kristo, si Mormon mitambag, “[kita] walay kapuslanan.”³ Nanghinaut ko nga kita unta mosunod sa tambag ni Mormon sa “pag-ampo ngadto sa Amahan uban sa tibuok kusog sa kasingkasing, nga [kita] unta mapuno niini nga gugma, diin siya mitugyan diha sa tanan kinsa tinuod nga mga sumusunod sa iyang Anak, nga si Jesukristo; aron mahimo [kita] nga mga anak sa Dios; nga kon siya moabut kita mahisama kaniya.”⁴