Ako? Madaugdaugon ba Ko?
Ang tagsulat nagpuyo sa Utah, USA.
“Magmapuanguron kamo ang usa ngadto sa usa” (Mga Taga-Efeso 4:32).
Maayo kini nga adlaw sa eskwelahan. Si Jeff nakigdula nga murag mga dragon pagka-recess uban sa iyang suod nga higala, nga si Ben. Human sa duha ka tuig sa iyang bag-o nga eskwelahan, si Jeff nalipay na gyud nga naa nay suod nga higala. Si Ben ganahan sa samang mga butang nga ganahan sab ni Jeff, ug daghan kaayo sila og maistoryahan.
Pag-uli ni Jeff, nakit-an niya si Mama nga naghulat kaniya. Daw dili siya malipayon. Ang iyang pahiyum nawala. “Jeff,” miingon si Mama, “nakadawat ko og tawag gikan sa prinsipal karon. Miingon siya midaugdaog kuno ka og gamayng bata nga lalaki sa inyong klase.”
“Wala oy!” Miingon si Jeff. Nasayud siya nga ang madaugdaugon sayop. Ang madaugdaugon makapaguol ug makapahadlok sa mga tawo. Wala pa gayud kana mabuhat ni Jeff.
“Sigurado ka?” Si Mama nangutana. Gihatagan niya og lugar si Jeff sa sofa. “Ang prinsipal miingon nga ikaw ug si Ben misulti kang Sam sa pagbiya, kay wala siyay labot sa inyong club, ug nga dili siya makaapil gawas og molayat siya gikan sa ibabaw sa slide.”
Miduko si Jeff. Nanghangyo si Sam nga makigdula kanila hapit kada adlaw. Apan si Ben mao ang iyang suod nga higala, ug ganahan silang magdula nga sila ra. Wala kana nagpasabut nga siya madaugdaugon, dili ba?
“Sayop ba kon kami lang ni Ben ang magdula?” Nangutana si Jeff. Daw dili usab makiangayon nga adunay motawag kaniya nga madaugdaugon tungod kay nakigdula lang sa iyang suod nga higala.
“Kamong duha mahimong magkauban pa gihapon og dugay-dugay. Apan kon naa si Sam, usa ka sayop nga ipabati kaniya nga walay apil ug nag-inusara. Ang prinsipal miingon nga imong gibugal-bugalan si Sam tungod kay wala siya molayat gikan sa ibabaw sa slide.”
“Wala oi!” Miingon si Jeff. Apan si Ben mibugalbugal. Ug mikatawa siya.
“Nakahinumdom ka unsa imong gibati niadtong una tang mibalhin?” Si Mama nangutana.
Mitando si Jeff. Laay kaayo kadto sa eskwelahan. Nag-ampo siya og maayo aron makakita og maayo nga higala.
“Unsay imong gusto nga buhaton sa mga tawo?” Si Mama nangutana.
“Nangandoy ko nga ila kong imbitaron nga magdula inig ka recess. O makigdungan kanila sa paniudto.”
“Dili ba nindot kaayo nga aduna ka nay buotan nga higala karon?” Miingon si Mama. “Mahimo ka nga motabang niadtong nag-inusara, sama nimo kaniadto. Hatagan ko ikaw og usa ka hagit. Ugma gusto ko makakita ka og tulo ka butang nga nindot bahin ni Sam. Dayon sultii ko human sa klase.”
“Makahimo tingali ko niana,” miingon si Jeff, mitutok sa iyang mga sapatos. Dili gayud niya tuyo ang mamahimong madaugdaugon. Gusto niya nga mahimong mabination sama kang Jesus. Ugma gusto niyang ingnon si Sam nga nagbasul siya. Ug ingnon niya si Ben nga gusto niyang paapilon og dula uban nila si Sam.
“Oy,” miingon si Mama. Gikaptan niya ang suwang ni Jeff pataas. “Buotan ka, mabination nga bata. Swerte si Sam nga makaamigo kanimo. Ug tag-ana unsa? Mahibaloan nimo nga lagmit swerte sab ka nga makaamigo ni Sam.”
Mipahiyum og gamay si Jeff. Si Ben pa gihapon ang iyang suod nga higala. Dili siguro lain nga adunay laing higala.