Ang Tingog sa Espiritu
Ni Elder Eduardo Gavarret
Sa Seventy
Ang pagpaminaw og maayo sa Espiritu Santo makatabang kanako sa pagdeterminar kon nagsubay ba ko sa hustong dalan o nagkinahanglan nga usbon ang akong padulngan.
Litrato gikan sa iStock/Thinkstock
Niadtong bata pa ko, ang akong papa adunay tindahan diin namaligya siya ug nag-ayo og mga orasan ug mga relo. Ang among panimalay sa pamilya naa sa likod sa tindahan, mao nga nagtubo ko uban sa mga tingog sa mga orasan ug mga relo.
Sa katapusan sa adlaw, dad-on sa akong papa ang pipila sa mga orasan nga iyang gitrabaho nianang adlawa ug ibitay kini sa sulod sa among panimalay sa bongbong duol sa among mga kwarto. Wala ko kasabut nganong iya kining gibuhat ug nganong matulog kami nga naa ang saba sa mga orasan. Apan pagkadugayan, ang tingog sa nagkalainlaing mga orasan nahimong usa ka pamilyar nga bahin sa mahilum nga kagabhion.
Pipila ka tuig human niadto, nagsugod ko og trabaho uban sa akong papa sa tindahan, nagkat-on gikan kaniya unsaon pag-ayo og mga rilo. Usa ka buntag misulti siya og usa ka butang nga nakapahunahuna nako ug mitabang kanako sa pagsabut nganong iyang gibitay ang mga orasan gawas sa among kwarto imbis didto ra unta sa tindahan.
“Mahimo bang dad-on nimo diri nako ang orasan nga diha duol sa imong kwarto kagabii?” miingon siya. “Naminaw ko sa tingog niini atol sa kagabhion, ug nahibaloan nga dili kini maayo. Kinahanglan ko ning tan-awon og usab.”
Mao kadto! Sa kahilum sa kagabhion, naminaw siya sa tingog sa orasan sa samang paagi sa usa ka doktor maminaw sa pitik sa kasingkasing sa usa ka pasyente. Sa proseso sa pag-ayo sa nagkalainlaing klase sa orasan ug mga rilo sa tibuok kinabuhi, iyang gibansay ang iyang mga dunggan aron sa pagdeterminar sa tingog sa orasan kon maayo ba kini o dili.
Human niana nga kasinatian, naminaw ko og maayo sa tingog sa mga orasan sa kagabhion, sama sa gibuhat sa akong amahan. Sa pagbuhat sa ingon, nahibaloan nako kon ang usa ka orasan maayo ba o kon kini nagkinahanglan nga ayohon.
Sa nagdako ko ug nakaangkon og panabut sa mga baruganan sa ebanghelyo, gisugdan ko sa pagtandi kini nga kasinatian sa mga positibo nga impluwensya sa Espiritu Santo sa atong kinabuhi. Gisugdan nako sa pagtandi sa mga panahon sa espiritwal nga pagpamalandong ngadto sa hilum nga mga takna sa kagabhion niadtong bata pa ko, ug nagsugod ko og tandi sa tingog sa mga orasan ngadto sa tingog sa Espiritu nga nagpahimangno kanako, naggiya kanako, ug nakigsulti kanako matag karon ug unya.
Mahinungdanong Espiritwal nga mga Hiyas
Kini nga kasinatian nakatabang kanako sa pag-ila sa kamatuoran sa mga kasinatian ni Nephi sa mga paghunghong sa Espiritu Santo. Gikan sa Basahon ni Mormon, nakat-on kita nga si Nephi mipakigbahin sa iyang igsoon nga si Sam sa “mga butang nga gipakita sa Ginoo [kaniya] pinaagi sa Balaang Espiritu” (1 Nephi 2:17; emphasis gidugang).
Nakasinati na kaayo si Nephi sa impluwensya sa Espiritu Santo. Ang iyang kinabuhi napuno sa mga pagbati sa gugma gikan sa Amahan ug sa Anak, nga gipakita kaniya sa Espiritu Santo. Sa atong pagribyu sa kinabuhi ni Nephi, makakita kita og klaro kaayo nga mga ehemplo sa gugma sa Dios nga gipakita pinaagi sa mga tubag sa mga pag-ampo ug espirituhanong paggiya. Mga ehemplo naglakip sa:
-
Panan-awon ni Nephi sa kahoy sa kinabuhi (tan-awa sa 1 Nephi 11–15).
-
Ang Liahona, nga molihok nga pinauyon sa pagtuo (tan-awa sa 1 Nephi 16:10, 16, 26–30).
-
Ang pagkaluwas ni Nephi human gigapos og mga pisi (tan-awa sa 1 Nephi 7:17–18).
-
Ang direksyon sa Ginoo samtang ang pamilya ni Nephi milabang sa kadagatan (tan-awa sa 1 Nephi 18:21–23).
-
Usa ka pagpasidaan gikan sa Ginoo sa pagpahawa paingon ngadto sa kamingawan (tan-awa sa 2 Nephi 5:5).
Sa iyang kabatan-onan ug uban sa tabang gikan sa mga panig-ingnan sa iyang mga ginikanan, si Nephi nakapalambo og pagkasensitibo sa tingog sa Espiritu. Iyang gipalambo kini nga abilidad pinaagi sa pagbansay sa mosunod nga mahinungdanon nga espiritwal nga mga hiyas:
-
Pagtinguha: “Ug nahinabo nga ako, si Nephi, … [adunay] dako nga tinguha nga mahibalo sa mga misteryo sa Dios, busa, ako nangamuyo ngadto sa Ginoo” (1 Nephi 2:16). “Ako … magtinguha nga masayud sa mga butang nga nakita sa akong amahan” (1 Nephi 11:1; tan-awa usab sa bersikulo 3).
-
Pagtuo: “Ako mituo sa tanan nga mga pulong nga gilitok sa akong amahan” (1 Nephi 2:16).
-
Pagkamainampuon: “Ug ako, si Nephi, mitungas sa bukid kanunay, ug ako nag-ampo ngadto sa Ginoo; busa ang Ginoo mipakita ngari kanako sa mga mahinungdanon nga butang” (1 Nephi 18:3).
-
Pagkamasulundon: “Ug nahinabo nga ako, si Nephi, miingon ngadto sa akong amahan: Ako moadto ug mobuhat sa mga butang nga ang Ginoo nagsugo, kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila” (1 Nephi 3:7).
Ang Buhat sa Espiritu Santo
Si Nephi kwalipikado kaayo sa pagsulti bahin sa ikatulong sakop sa Dios nga Kapangulohan. Nakat-on siya sa pagpaminaw sa tingog sa Espiritu—bisan sa kalma nga katubigan o baluron nga kadagatan. Ang iyang mga kasinatian migiya kaniya sa pagsulat bahin “sa buhat sa Espiritu Santo”1 (tan-awa sa 2 Nephi 31–32). Gikan ni Nephi ug sa ubang mga propeta, nakat-unan nato nga:
Ang Espiritu Santo namahayag: “Walay tawo nga makadawat sa Espiritu Santo nga dili makadawat og pagpadayag. Ang Espiritu Santo mao ang tigpadayag”2 (tan-awa sa 1 Nephi 10:17–19; 2 Nephi 32:5; Moroni 10:5).
Ang Espiritu Santo modasig: Mohatag kini kanato og mga hunahuna, mga pagbati, ug mga pulong, mopatin-aw sa atong panabut, ug mogiya sa atong mga hunahuna (tan-awa sa 1 Nephi 4:6).
Ang Espiritu Santo mopamatuod: Siya mopamatuod sa Amahan ug sa Anak (tan-awa sa 2 Nephi 31:18; 3 Nephi 28:11; Ether 12:41).
Ang Espiritu Santo motudlo: Siya mopalambo sa atong kahibalo (tan-awa sa 2 Nephi 32:5).
Ang Espiritu Santo mobalaan: Human sa bunyag mahimo kitang pagasantoson pinaagi sa pagdawat sa Espiritu Santo (tan-awa sa 3 Nephi 27:20).
Ang Espiritu Santo mopahinumdom: Siya modala sa mga butang sa atong panumduman kon gikinahanglan kaayo kini nato (tan-awa sa Juan 14:26).
Ang Espiritu Santo mohupay: Sa panahon sa kagubot o nawad-an sa paglaum, ang Espiritu Santo mobayaw sa atong mga espiritu, mohatag og paglaum (tan-awa sa Moroni 8:26), motudlo kanato “sa malinawon nga mga butang sa gingharian” (D&P 36:2), ug motabang kanato nga mobati sa “kalinaw sa Dios, nga lapaw sa tanang pagpanabut” (Mga Taga-Filipos 4:7).3
Ang Impluwensya sa Espiritu Santo
Sa unang kapitulo sa Basahon ni Mormon, makat-unan nato nga si Lehi “napuno sa Espiritu sa Ginoo” (1 Nephi 1:12). Sa katapusang kapitulo sa Basahon ni Mormon, si Moroni misaad kanato nga ang Dios “mopakita sa kamatuoran [sa Basahon ni Mormon] ngari [kanato], pinaagi sa gahum sa Espiritu Santo” (Moroni 10:4).
Gikan sa sinugdanan hangtud sa katapusan niining dinasig nga basahon sa kasulatan, ang Espiritu Santo aktibo nga nag-apil sa mga kinabuhi sa mga katawhan sa Dios. Kining gamhanang impluwensya naghatag ug nagtandog sa tanang mga magbabasa sa Basahon ni Mormon nga nag-ampo, nagpakita og pagtuo, ug adunay sinsero nga tinguha nga masayud sa kamatuoran (tan-awa sa Moroni 10:4–5).
Unsaon nato pag-ila sa Espiritu Santo ug mogamit sa atong katungod isip mga miyembro sa Simbahan ni Jesukristo sa mga Santos sa Ulahing mga Adlaw aron makadawat sa impluwensya sa Espiritu Santo sa atong kinabuhi? Si Elder Craig C. Christensen sa Kapangulohan sa Seventy mitudlo: “Tanan kita may mga kasinatian sa Espiritu Santo, bisan dili nato kanunayng mamatikdan kini. Samtang ang dinasig nga hunahuna moabut, nasayud ta nga tinuod kini pinaagi sa espirituhanong pagbati sa atong kasingkasing.”4
Aron pagpalambo sa atong kasarang sa pagdawat sa impluwensya ug direksyon sa Espiritu Santo sa atong kinabuhi, kita, sama ni Nephi, kinahanglang mougmad og tinguha sa pagdawat, paggamit og pagtuo sa Ginoong Jesukristo, “mag-ampo sa kanunay, ug dili mawad-an sa paglaum” (2 Nephi 32:9), ug sunda ang kasugoan.
Si Presidente Thomas S. Monson mihangyo nga atong buhaton ang usa pa ka butang: “Ablihi ang inyong kasingkasing, bisan ang inyong espiritu, alang nianang espesyal nga tingog nga nagpamatuod sa kamatuoran … Hinaut nga kita sa kanunay nahiuyon, nga kita unta makadungog niining makahupay, magiyahon nga tingog nga maghimo kanatong luwas.”5
Gikan sa akong amahan, nakat-on ko og leksyon sa pagpaminaw sa praktikal nga paagi—magtrabaho og mga relo ug mga orasan. Karon akong gihatagan og bili ang leksyon nga iyang gitudlo kanako. Ang Espiritu Santo, gani, nagdala pa gihapon niana nga leksyon sa akong hunahuna ug kasingkasing, ug naghatag siya kanako og saad sa maayong mga butang nga moabut.
Kadto nga kasinatian nakatabang kanako sa pagpangita og hilum nga mga takna nga makapaminaw ko sa tingog sa Espiritu. Ang pagpaminaw og maayo sa Espiritu Santo nagtabang kanako sa pagdeterminar kon nagsubay ba ko sa eksaktong agianan o nagkinahanglan ba nakong usbon ang akong tumong aron haum sa mga tinguha sa Langitnong Amahan.