Tulo ka mga Paagi nga Makaapil sa Family History
Kon madiskubrihan ninyo ang istorya sa inyong pamilya, makakat-on kamo mahitungod sa inyong kaugalingon.
Sa dihang si Elder David A. Bednar sa Korum sa Napulog Duha ka mga Apostoles miingon, “Ang inyong mga tudlo maayo na kaayo mo-text ug mo-tweet aron mapaspas ug mapalambo ang buhat sa Ginoo—dili lang aron makakontak dayon sa inyong mga higala,” naghisgot siya kaninyo! Dayon siya miingon, “Ako moawhag kaninyo sa pagtuon, sa pagsiksik sa inyong mga katigulangan, ug sa pag-andam sa inyong kaugalingon sa pagpahigayon og proxy nga bunyag sa balay sa Ginoo alang inyong kaliwatan nga namatay na” (“Ang mga Kasingkasing sa mga Anak Mobati,” Liahona, Nob. 2011, 26).
Liboan ka kabatan-onan sa tibuok kalibutan ang midawat sa imbitasyon sa pagsiksik sa ilang katigulangan ug mopahigayon og proxy nga bunyag alang kanila. Usa ka batan-ong babaye, si Kaitlen D., nakadiskubre nga kon magdala siya og mga family name ngadto sa templo, mahimo kining mas makahuluganon nga kasinatian.
Miingon siya, “Kon maghimo na ko sa mga ordinansa sa templo alang sa pamilya, nakaamgo ko nga sa taliwala sa nagkaguliyang nga kalibutan nga akong gipuy-an, ang bugtong panahon nga nagmalinawon ang akong kaugalingon mao nga anaa sa sulod nianang balaan nga balay. Nagsugod usab ako sa pagkasuod niadtong anaa sa pikas tabil. Kon magpahigayon og mga bunyag ug mga kumpirmasyon, maghunahuna ko niadtong tanang mga tawo nga dugay nang naghulat nga kini mahitabo. Hapit dili ikahulagway kini nga pagbati—puno sa gugma ug paglaum—nga nakapalambo og maayo sa akong pagpamatuod.”
Adunay daghang mga paagi nga makaapil sa family history ug buhat sa templo, mao nga asa kamo magsugod? Tulo ka batan-on mipakigbahin sa ilang mga kasinatian sa pagkat-on mahitungod sa mga istorya sa pamilya, nag-interbyu sa mga sakop sa pamilya, ug nangita og mga family name nga dad-on ngadto sa templo.
Ang Akong Katigulangan Maayong mga Ehemplo ngari Kanako
Ni Kyle S., Texas, USA
Ang akong mga ginikanan ug ako naminaw ni Elder Bednar niadtong Oktubre 2011 nga kinatibuk-ang komperensya sa dihang miingon siya nga ang pagtrabaho sa family history makahatag nato og panalipod batok sa kaaway. Gisugdan dayon namo ang pagtrabaho sa among family history. Nagpadayon ko sa pagkat-on ug paglambo tungod sa family history; makalingaw gyud kini.
Ganahan ko nga mangita diin ako gikan ug mahitungod sa akong katigulangan. Nakat-on ko gikan sa ilang mga kasinatian ug mogamit niini sa akong kinabuhi sa pagtabang nako nga mahimong mas maayo nga tawo. Nindot kaayo nga madiskubrihan kinsa sila, unsay ilang panginabuhi, unsay matang sa kinabuhi, ug unsa kini ka lisud alang kanila.
Pananglit, nalingaw ko nga nakahibalo sa usa sa akong katigulangan kinsa mibalhin sa iyang pamilya gikan sa Tennessee ngadto sa Texas, USA, niadtong mga 1870 aron mahimong tig-atiman sa kahayopan Nag-atubang siya og daghang mga hagit sa iyang kinabuhi, ug gikan kaniya akong nahibaloan nga ang kinabuhi lisud, mao nga importante nga mobarug unsay imong gituhoan.
Kon duna koy mga hagit sa kinabuhi, ang pagtrabaho sa family history makapabati nako nga ang akong katigulangan sa kanunay nag-uban kanako ug nagtabang kanako sa malisud nga mga pagsulay, sama sa gisaad ni Elder Bednar kanato.
Litrato sa tig-atiman sa kahayopan ug nitso © iStock/Thinkstock
Unsaon sa Pagpangita sa mga Istorya sa Inyong Pamilya
Kolektaha ang mga istorya kon unsay ganahan nga buhaton sa inyong katigulangan. Tabang sa paghimo sa inyong katigulangan nga mas makahuluganon ug pagpangita og mga butang nga pareha tali kaninyo. Unsa nga mga sport ang ilang gidula? Unsa nga pagkaon ang ilang gikaon? Unsa nga matang ang ilang eskwelahan?
Pakigsulti sa inyong mga ginikanan ug mga apohan mahitungod sa mga istorya gikan sa ilang mga kinabuhi. Mahimo ninyong gamiton ang Church’s My Family booklet sa pagsugod sa pagkolekta ug pagpakigbahin sa mga istorya sa pamilya. Sa FamilySearch.org, makadugang kamo og mga litrato, mga istorya, mga tinubdan sa impormasyon, mga audio recording, ug mga dokumento sa pagtabang sa uban sa inyong pamilya nga makaila sa inyong katigulangan. Bisitaha ang FamilySearch.org ug iklik ang “Memories” sa pagsugod.
Pagrekord sa mga istorya sa Akong mga Apohan
Ni Matias M., Utah, USA
Ang akong mga apohan nagpuyo sa Uruguay. Sa dihang ang akong mga apohan sa habig sa akong mama mibisita sa akong pamilya, gipahimuslan nako ang oportunidad sa pag-interbyu nila ug nakahibalo sa ilang istorya kon giunsa nila nga nahimong mga miyembro sa Simbahan. Wala gayud ako makadungog sa ilang istorya kaniadto, mao nga ang pagpaminaw sa istorya gikan sa akong mga apohan usa gayud ka talagsaong kasinatian.
Akong gisulat samtang nag-interbyu nila, ug girekord usab nako gamit ang akong telepono aron mapaminaw nako kini kon gusto nakong paminawon pag-usab. Gi-upload nako ang audio file ngadto sa FamilySearch aron nga ang uban makabenipisyo sa pagpaminaw sa ilang istorya, karon ug sa umaabut.
Paglabay sa pipila ka bulan narekord nako ug na-upload ang interbyu uban sa akong mga apohan sa habig sa akong amahan. Daghan kaayo kog nakat-unan nga wala nako mahibaloi kaniadto, ug gisultihan ko nila og daghan pa mahitungod sa ilang kinabuhi kay sa akong gipaabut.
Nindot kaayo nga makadungog sa akong kaugalingong mga apohan nga misulti sa ilang istorya ug maminaw sa tambag nga ilang gihatag kanako. Nasayud ko nga ang paggahin og pipila ka minuto sa paghimo niini nga mga interbyu makatabang nako sa “pagdasig sa [akong] mga anak … sa pagtuo ni Kristo” (2 Nephi 25:23) sama sa gibuhat ni propeta Nephi sa Basahon ni Mormon sa iyang kaliwatan. Nasayud ko nga kon ang akong mga anak makadungog sa mga pagpamatuod sa akong mga ginikanan, ang ilang mga pagpamatuod malig-on usab.
Unsaon sa Pag-interbyu og mga Sakop sa Pamilya
Alang sa kalihokan sa ward o branch, ikaw ug ang ubang kabatan-onan mahimong mag-interbyu og mas magulang nga mga sakop sa pamilya. Paghunahuna og usa o duha ka pangutana nga inyong gusto nga ipangutana sa inyong mga ginikanan o mga apohan o laing mga paryente. Dayon lingkod uban nila, pangutan-a sila mahitungod sa ilang kinabuhi, ug kuhai og film o irekord sa inyong telepono. Ko mahuman na mo, mahimo ninyo i-upload kini ngadto sa FamilySearch.org.
Ang Akong Tumong: Magdala og 10 mga Family Name ngadto sa Templo
Ni Rajane S., Jamaica
Kanunay akong nadani sa genealogy work, mao nga sa dihang ang among Kapangulohan sa Area mihatag sa kabatan-onan og tumong sa pagkolekta og 10 ka pangalan sa katigulangan aron maghimo og mga bunyag ug mga kumpirmasyon alang nila didto sa templo, nalipay kaayo ko.
Gisugdan nako ang akong pagpangita nga walay tabang, apan wala koy nahimo. Duna koy tulo ka pangalan nga walay impormasyon, ug nianang puntuha gibati nako nga walay mahimo sa espirituhanon ug sa pisikal nga paagi. Nakahukom ko nga mangayo og tabang sa akong inahan. Misugyot siya nga akong tawgan ang iyang inahan. Sa dihang akong gitawgan ang akong lola, nalipay kaayo siyang motabang nako. Gihatagan gani ko niya og pagtugot nga maoy mo-proxy alang sa mga pangalan nga among gihisgutan. Nalipay kaayo ko ug mapasalamaton.
Ang biyahe ngadto sa templo hapit na, ug wala pa koy pangalan gikan sa habig sa akong amahan. Pipila ka oras sa dili pa ko mobiya sa balay, nadasig ko sa pag-adto sa sementeryo ug mohangyo sa akong papa sa pagtawag sa iyang tiya nga mouban. Miadto mi sa sementeryo, ug samtang nagtan-aw ko sa akong papa ug tiya nga naglakaw sa sementeryo, nadasig ko sa pag-adto sa nitso sa pipila sa akong katigulangan. Gibati nako ang ilang pagkaandam nga mahimong kabahin sa ebanghelyo. Uban sa tabang sa Espiritu Santo ug gikan sa akong mga sakop sa pamilya, nakab-ot nako ang akong target. Duna na koy 16 ka pangalan sa katigulangan nga temple-ready na!
Sa dihang miadto ko sa templo, mabati nako ang kadasig ug kalipay sa akong katigulangan kinsa andam na ug naghulat. Atol sa mga bunyag ug kumpirmasyon, mabati nako ang ilang mga kalag nga napuno sa kalipay ug kalinaw. Gibati nako ang katalagsaon, ug ang gusto lang nakong buhaton mao ang pagpasalamat kanila sa paghatag nako og oportunidad nga nahimong kabahin sa butang nga espesyal kaayo.
Litrato sa tig-atiman sa kahayopan ug nitso © iStock/Thinkstock
Unsaon sa Pagpangita sa Inyong mga Family Name alang sa Templo
Sulayi ang Descendancy view sa FamilySearch.org sa pagtabang ninyo sa pagpangita sa inyong katigulangan kinsa nagkinahanglan nga mahuman ang ilang buhat sa templo. Dayon buhata ang youth temple challenge: tan-awa sa pahina 54 niini nga isyu.