Tokoniʻi ʻi he Taimi ʻo e Faingataʻá

Hili ha afā mo ha tafea lahi ʻi Houston, Texas, USA, naʻe mātā ʻe ha fefine toulekeleka ha Kāingalotu ʻo e Siasí ne nau tui e falani lanu engeenga ʻo e Nima Fietokoní, ʻo nau fononga atu ke tokoniʻi e niʻihi naʻe uesia ʻe he fakatamakí. Naʻa ne pehē, “Naʻá ku ʻiloʻi ʻe haʻu ʻa e kau Māmongá!”

‘Oku fakafofongaʻi ʻe he meʻa ko ʻeni, ʻa ia naʻe lipooti ʻe ha tohi naʻe fai ʻe he Palesiteni ʻo e Misiona Texas Houston South Mission, ko Aaron T. Hall ʻi he Facebook, e founga ʻoku tokoni ai e Siasí ki he kāingalotú mo e ngaahi kaungāʻapí fakatouʻosi ʻi he taimi ʻo e faingataʻá. “ʻOku ʻikai ha faingataʻa ia ʻe fuʻu lahi ki he kau mēmipa ʻo e Siasi ʻo e ʻEikí!” Ko e tohi ia ʻa Palesiteni Hall.

ʻI he taimi ʻoku hoko ai e fakatamakí, ʻoku faʻa kau e Siasí ia ʻi he ʻuluaki fietokoní, pea ʻi he ngaahi feituʻu ʻoku uesiá, ʻoku faʻa hokohoko atu e tokoni ʻa e vaʻa tokoni ʻofa fakaetangata ʻa e Siasí ia ki he fakaakeake fakataimi mo taimi lōloá fakatouʻosi, mo e taumuʻa ke fokotuʻu e moʻui fakafalala pē kiate kitá. ʻOku fengāueʻaki fakataha e kau taki fakalotofonuá mo ia ʻi he hetikuota ʻo e Siasí, ke vakaiʻi mo feau ʻenau fie maʻú mo fokotuʻutuʻu ha kāingalotu ke nau tokoni ki hono tufaki ʻo e ngaahi maʻuʻanga tokoní, ngāue ke fakamaʻá pea mo hono fakafoki mo langa foʻou hake ʻo e ngaahi falé.

ʻI he ngāue fakataha ʻa e vaʻa Tokoni ʻOfa ʻa e Siasí mo e ngaahi kautaha tokoni kuo ʻosi fokotuʻu ʻi he ngaahi feituʻu ne uesiá, naʻe toki fai ai ʻe he Siasí ha tokoni ki he niʻihi naʻe tāfea ʻi Peluú; holafa e kelekelé ʻi Siela Leoné; vela ha vaotā ʻi Monitana, USA pea mo ʻAlapeta ʻi Kānatá; ngaahi afā ʻi Tekisisi, Fololita mo e ʻOtu Kalipiané, kau ai ʻa Pueto Liko, Haiti, mo e Lepupelika Tominikení; pea mo ha mofuike mālohi ʻe ua ʻi Mekisikou.

Naʻe fakahā ‘e he Siasí ʻi Sepitema, te nau foaki ha paʻanga ʻAmelika ʻe $11 miliona ke poupouʻi e ngaahi ngāue ʻe tokoni ki he hongé mo hono fafanga e fānau ʻoku siʻi fasi-manava ʻi ha ngaahi fonua kehekehe ʻe valu ʻi ʻAfilika mo e Hahake Lotolotó. ʻOku ngāue fakataha e vaʻa Tokoni ʻOfa ʻa e Siasí mo ha ngaahi kautaha ʻe 11 ʻi ha ngaahi poloseki ʻe 25, ke tufaki e tokoní.

Kuo foaki ʻe he vaʻa Tokoni ʻOfa ʻa e Siasí ha paʻanga ʻAmelika nai ʻe $2 piliona ke tokoniʻi ha kakai ʻe laui miliona ʻi ha ngaahi fonua ʻe 189 talu mei he 1985, ʻo kamata ʻaki hono tokoniʻi e niʻihi ʻoku siʻi faingataʻaʻia he hongé ʻi ʻItiopeá.