Ko Hono Moʻoni ʻo e Meʻa Kotoa Pē

ʻOku tau lōnuku mai ʻi he pooni mo e ʻamanaki lelei mo e tui te tau mātuku atu mo e ongoʻi kuo fakamālohia mo faitāpuekina kitautolu ʻe he Laumālie Māʻoniʻoní, ʻa ia ʻokú Ne akoʻi mai ʻa e moʻoní.¹ ʻOku ou fie lea fekauʻaki mo ʻetau fekumi fakafoʻituitui ki he moʻoní.

ʻI heʻeku kei talavoú, naʻe lahi ʻeku ngaahi fehuʻi kau ki he Siasí. Naʻe fakamātoato ʻeku ngaahi fehuʻi ʻe niʻihi. Ko e niʻihi naʻe ʻikai pea naʻe tupu ia mei he loto-veiveiua ʻa e niʻihi kehé.

Ne u faʻa talanoa mo ʻeku faʻeé ki heʻeku ngaahi fehuʻí. ʻOku ou fakapapauʻi naʻe lava ke ne ongoʻi naʻe lahi ʻeku ngaahi fehuʻi naʻe fakamātoató pea naʻe haʻu ia mei hoku lotó. Mahalo naʻá ne kiʻi loto-mamahi ʻi he ngaahi fehuʻi ko ia naʻe ʻikai fuʻu fakamātoató mo e lahilahi fakakikihí. Ka naʻe ʻikai ʻaupito ke ne teitei ʻai ke u ongoʻi halaia ʻi he faʻa fehuʻí. Naʻá ne fakafanongo pea naʻá ne feinga ke tali ia. ʻI he taimi naʻá ne ongoʻi ai kuó ne fakamatalaʻi ʻa e meʻa kotoa pē kuó ne lavá ka ʻoku ou kei tālaʻa peé, naʻá ne pehē mai leva: “Ko ha fehuʻi lelei ia Tēvita. Lolotonga hoʻo fekumi, laukonga, mo lotua ʻa e talí, fēfe ke ke fai ʻa e ngaahi meʻa ʻokú ke ʻiloʻi ʻoku totonú kae ʻikai ko e ngaahi meʻa ʻokú ke ʻiloʻi ʻoku ʻikai totonú?” Naʻe hoko ʻeni ko e sīpinga ki heʻeku fekumi ki he moʻoní. ʻI heʻeku ako, lotu, mo tauhi e ngaahi fekaú, ne u ʻiloʻi ai ʻoku ʻi ai ʻa e tali ki heʻeku ngaahi fehuʻi mahuʻinga kotoa pē. Ne u toe ʻiloʻi foki ʻoku fie maʻu ki he ngaahi fehuʻi ʻe niʻihi ʻa e tui taʻetūkuá, faʻa kātakí mo e fakahaá.²

Naʻe tuku ʻe he fineʻeikí kiate au ʻa e fatongia ke fakatupulaki ʻeku tuí mo fekumi ki he ngaahi talí. Naʻá ne ʻiloʻi ʻe maʻu ʻa e ngaahi tali mahuʻingá mei heʻeku fekumi ki he moʻoní, ʻi he founga kuo tuku mai ʻe he Tamai Hēvaní. Naʻá ne ʻiloʻi naʻe fie maʻu ke u ʻiloʻi ʻa e moʻoní. Naʻá ne ʻiloʻi naʻe fie maʻu ke u fakamātoato ʻi heʻeku ngaahi fehuʻí peá u loto-fiemālie ke fai ʻa e meʻa ne u ʻosi ʻiloʻi ʻoku moʻoní. Naʻá ne ʻiloʻi naʻe fie maʻu ke u ako mo lotu pea naʻe fie maʻu ke u fakatupulaki ha kātaki ʻoku lahi angé, ʻi heʻeku fekumi ki he ngaahi tali mei he ʻEikí. Ko e loto fiemālie ko ia ke faʻa kātakí, ko ha konga ia ʻo ʻetau fekumi ki he moʻoní pea ko ha konga ia e sīpinga ʻa e ʻEikí ki hono fakahaaʻi ʻa e moʻoní.³

Naʻe faifai peá u ʻiloʻi naʻe akoʻi au heʻeku faʻeé ki he sīpinga ʻa e Tamai Hēvaní he fekumi ki he moʻoní. Naʻe tupulaki ʻeku tuí, pea kamata ke u maʻu ʻa e ngaahi talí, pea naʻá ku tali ha uiuiʻi ke ngāue fakafaifekau.

Naʻe aʻu ki ha tuʻunga ʻi heʻeku fuofua hū ki he ngāue fakafaifekaú, ne u ʻiloʻi naʻe fuʻu fie maʻu ke u ʻilo pe naʻe moʻoni nai ʻa e Siasí, pea ko ha palōfita nai ʻa e ʻOtuá ʻa Siosefa Sāmita. Ne u ongoʻi ʻa e meʻa naʻe fakahā mahino ʻe Palesiteni Tōmasi S. Monisoni ʻi heʻetau konifelenisi lahi fakamuimuí: “Kapau ʻoku ʻikai ke ke maʻu ha fakamoʻoni mālohi ki he ngaahi meʻá ni, fai leva e meʻa ʻoku fie maʻu ke maʻu ai iá. ʻOku mahuʻinga ke ʻi ai haʻo fakamoʻoni pē ʻaʻau ʻi he ngaahi kuonga faingataʻa ko ʻení, he ʻoku fakangatangata pē ʻaonga kiate koe e fakamoʻoni ʻa e niʻihi kehé.”⁴ Ne u ʻiloʻi ʻa e meʻa naʻe pau ke u faí. Naʻe fie maʻu ke u lau ʻa e Tohi ʻa Molomoná ʻi he loto-fakamātoato mo e loto-moʻoni, pea fehuʻi ki he ʻOtuá pe ʻoku moʻoni nai ia.

Fanongo ki he talaʻofa maʻongoʻonga naʻe ʻomi heʻetau Tamai Hēvaní ʻi he palōfita ko Molonaí: “ʻI hoʻomou maʻu ʻa e ngaahi meʻá ni, ʻoku ou fie naʻinaʻi kiate kimoutolu ke mou kole ki he ʻOtua ko e Tamai Taʻengatá, ʻi he huafa ʻo Kalaisí, pe ʻoku ʻikai ke moʻoni ʻa e ngaahi meʻá ni; pea kapau te mou kole ʻi he loto-fakamātoato, mo e loto-moʻoni, ʻo maʻu ʻa [e] tui kia Kalaisi, te ne fakahā ʻa hono moʻoní kiate kimoutolu, ʻi he mālohi ʻo e Laumālie Māʻoniʻoní.”⁵

Naʻe fie maʻu ke u lau ʻa e Tohi ʻa Molomoná kae lava ke u maʻu ʻa e talaʻofa aí. Ne u kamata mei he kamataʻanga ʻo e tohí, peá u lau ia ʻi he ʻaho kotoa pē. Ko e niʻihi ʻoku vave hono maʻu ha fakamoʻoni. Ko e niʻihi leva, ʻe fie maʻu ha taimi lahi mo ha faʻa lotu pea ʻe lava ke kau ai hano toutou lau ʻa e tohí. Naʻe fie maʻu ke u lau ʻa e tohí kakato kimuʻa peá u toki maʻu ʻa e fakamoʻoni naʻe talaʻofa maí. Ka neongo iá, naʻe fakahā ʻe he ʻOtuá ʻa hono moʻoní kiate au ʻi he mālohi ʻo e Laumālie Māʻoniʻoní.

Naʻá ku fakamatalaʻi ʻi heʻeku tohinoa ngāue fakafaifekaú, ʻeku fiefia ʻi hono ʻiloʻi ʻa e moʻoní kae pehē foki ʻeku fakahaaʻi ʻeku tukupā fakafoʻituitui mo e loto-moʻoni ke ngāueʻi ʻa e moʻoni ne u maʻú. Naʻá ku tohi ʻo pehē: “Kuó u fai ha tukupā ki heʻeku Tamai ʻi Hēvaní pea kiate au pē ke u fai hoku lelei tahá, ke u feinga pēseti ʻe 100 ʻi he toenga ʻeku moʻuí, ko e hā pē meʻa ʻe fie maʻu ke u faí, te u fai ia, ka ʻi he taimi ní ʻoku teʻeki ai ʻosi ʻeku ngāue fakafaifekaú pea te u ngāueʻi ia ke hoko ko ha ngāue maʻongoʻonga, ko ha meʻa he ʻikai te u ongoʻi halaia ai, pea he ʻikai te u fai ia maʻaku kae maʻá e ʻEikí. ʻOku ou ʻofa ʻi he ʻEikí, pea ʻoku ou ʻofa ʻi he ngāué, pea ʻoku ou lotua ke ʻoua naʻa faifai ange pea mole ʻa e ongo ko iá meiate au.”

Naʻá ku ʻiloʻi ʻoku fie maʻu ke fafangaʻi maʻu pē pea toutou fakatomala mo tauhi e ngaahi fekaú, kae lava ke ʻoua naʻa teitei mole ʻa e ongo ko iá. Naʻe pehē ʻe Palesiteni Monisoni, “ʻOku fie maʻu ke tauhi [ʻa e fakamoʻoní] ke ʻaonga mo longomoʻui ʻo fakafou ʻi he talangofua hokohoko ki he ngaahi fekau ʻa e ʻOtuá pea fakafou ʻi he lotu fakaʻahó mo e ako folofolá.”⁶

ʻI he ngaahi taʻu kuohilí ne u ʻeke ai ki he kau faifekau mo e kakai kei talavou ʻi he funga ʻo e māmaní, pe naʻe founga fēfē ʻenau feinga fakafoʻituitui ke fekumi ki he moʻoní mo maʻu ha fakamoʻoní. Meimei ko e tokotaha kotoa pē ne u ʻeke ki ai naʻa nau pehē, naʻe kamata ʻenau maʻu ha fakamoʻoni fakafoʻituituí mei heʻenau fili ke lau ʻa e Tohi ʻa Molomoná mei he kamataʻangá, pea nau ʻeke ki he ʻOtuá pe ʻoku moʻoni nai iá.ʻI hono fai iá, naʻa nau fili ai ke “ngāue” kae ʻikai “[ngāueʻaki]”⁷ kinautolu ʻe he ngaahi tālafili ʻa e niʻihi kehé.

ʻOku fie maʻu ke tau moʻui ʻaki ʻa e ongoongoleleí, kae lava ke tau ʻiloʻi ʻa e moʻoní⁸ mo “ʻahiʻahiʻi”⁹ ʻa e folofolá. ʻOku fakatokanga mai ke ʻoua naʻa tau fakafepakiʻi ʻa e Laumālie ʻa e ʻEikí.¹⁰ Ko hono fakatahaʻi ʻa e fakatomalá mo ha loto fakapapau ke tauhi ʻa e ngaahi fekaú, ko ha konga mahuʻinga ia ʻo e fekumi ʻa e tokotaha kotoa pē ki he moʻoní.¹¹ Ko hono moʻoní, ʻe fie maʻu ke tau loto-fiemālie ke “liʻaki kotoa” ʻetau ngaahi angahalá kae lava ke tau ʻiloʻi ʻa e moʻoní.¹²

ʻOku fekauʻi mai ke tau “fekumi ki he ʻiló, ʻio, ʻi he ako pea ʻi he tui foki” pea “… fekumi mei he ngaahi tohi lelei tahá, ʻa e ngaahi lea ʻo e potó.”¹³ ʻOku totonu ke fakatefito ʻetau fekumi ki he moʻoní ʻi he “ngaahi tohi lelei tahá” mo e ʻū maʻuʻanga tokoni lelei tahá. ʻOku kau ʻi he lelei tahá ʻa e ngaahi tohi folofolá mo e lea ʻa e kau palōfita moʻuí.

Kuo kole mai ʻe Palesiteni Monisoni ki he tokotaha kotoa pē ke “fai [ʻa ia] ʻoku fie maʻú,” ke maʻu mo pukepuke ai ha fakamoʻoni ʻoku mālohí.¹⁴ Ko e hā ʻoku fie maʻu ke fakaloloto mo fakamālohia ʻaki hoʻo fakamoʻoní? ʻOku ʻi ai hotau ngafa fakafoʻituitui ke fai ʻa ia ʻoku fie maʻú, ke fakatupulaki mo tauhi ha fakamoʻoni ʻoku mālohí.

Ko hono tauhi faivelenga ko ia ʻetau ngaahi fuakavá lolotonga ʻetau “fai [ʻa ia] ʻoku fie maʻú” ke maʻu e tali mei he ʻEikí, ko ha konga ia ʻo e sīpinga ʻa e ʻOtuá he ako ki he moʻoní. Tautautefito ki he taimi ʻoku hoko ai e faingataʻá, mahalo naʻa fie maʻu ke tau “fakaongoongo ʻi he fiefia mo e faʻa kātaki ki he finangalo kotoa pē ʻo e ʻEikí.”¹⁵ ʻOku hanga ʻe hono tauhi faivelenga ʻa e ngaahi fuakavá, ʻo fakatupulaki ʻetau loto-fakatōkilaló, fakaloloto ʻetau holi ke ʻiloʻi ʻa e moʻoní, pea fakangofua ʻa e Laumālie Māʻoniʻoní ke “fakahinohinoʻi ʻa [kitautolu] ʻi he ngaahi hala ʻo e potó koeʻuhi ke tāpuakiʻi, mo fakamonūʻiaʻi, mo maluʻi ʻa [kitautolu].”¹⁶

ʻOku ʻi ai ha taha ʻokú ma ʻofa lahi ai mo hoku uaifi ko Melé, kuó ne fefaʻuhi ha konga lahi ʻo ʻene moʻuí, ʻi ha ngaahi tafaʻaki ʻe niʻihi ʻo e Siasí. ʻOkú ne ʻofa ʻi he ongoongoleleí, pea ʻokú ne ʻofa ʻi he Siasí, ka ʻoku kei ʻi ai pē haʻane ngaahi fehuʻi. ʻOkú ne ʻosi sila ʻi he temipalé, mālohi ʻi he Siasí, fua hono ngaahi fatongiá, pea ko ha uaifi mo ha faʻē lelei ia. ʻI he ngaahi taʻu kuo hili angé, kuó ne feinga ke fai ʻa e ngaahi meʻa naʻá ne ʻiloʻi ʻoku totonú, pea fakaʻehiʻehi mei he ngaahi meʻa naʻá ne ʻiloʻi ʻoku halá. Kuó ne tauhi ʻene ngaahi fuakavá mo kei fekumi pē. Kuó ne houngaʻia he ngaahi taimi ʻoku fakamālohia ia ʻe he tui ʻa e niʻihi kehé.

Kimuí ni mai, naʻe kole ange ʻe he pīsopé ke nau talanoa mo ia mo hono husepānití. Naʻá ne kole ange ke na tali ha ngāue fakatemipale ke na hoko ko ha ongo fakafofonga maʻanautolu naʻe fie maʻu ha ouau fakatemipalé. Naʻá na ʻohovale ʻi he uiuiʻi ko ʻení, ka naʻá na tali ia peá na kamata ngāue leva ʻi he fale ʻo e ʻEikí. Naʻe toki kau atu hona foha taʻu hongofulu tupú ki ha polokalama ʻi he hisitōlia fakafāmilí pea naʻá ne maʻu ai ha hingoa ʻo ha kāinga naʻe ʻikai kakato hono ouau fakatemipalé. Naʻe faifai peá na fakafofongaʻi ʻa e tokotaha ko ʻení mo hono fāmilí ʻi he ngaahi ouau fakatemipalé. ʻI heʻena tuʻulutui ʻi he ʻōlitá ʻo fakahoko ʻa e ouau ʻo e silá, naʻe maʻu ai ʻe he fefine fakaofo mo faʻa kātaki ko ʻení, ʻa ia kuo fuoloa taʻu ʻene fekumí, ha aʻusia fakalaumālie ʻa ia naʻá ne ʻiloʻi ai ʻoku moʻoni mo totonu ʻa e temipalé mo e ngaahi ouau ʻoku fakahoko aí. Naʻá ne tā ki heʻene faʻeé ʻo fakamatala ki ai ʻene aʻusiá, ʻo ne pehē, neongo ʻoku kei ʻi ai pē ʻene ngaahi fehuʻi, ka ʻokú ne ʻiloʻi ʻoku moʻoni ʻa e temipalé, ʻoku moʻoni ʻa e ngaahi ouau ʻi he temipalé, pea ʻoku moʻoni ʻa e Siasí. Naʻe tangi loto houngaʻia ʻene faʻeé koeʻuhí ko ha Tamai Hēvani ʻofa mo faʻa kātaki, kae pehe ki ha tama fefine ʻokú ne kātaki fuoloa ke kei fekumi pē.

ʻOku ʻomi ʻe hono tauhi faivelenga ʻa e ngaahi fuakavá, ʻa e ngaahi tāpuaki ʻo e langí ki heʻetau moʻuí.¹⁷

ʻOku ou ongoʻi ha nonga moʻoni ʻi he talaʻofa mai ʻa e ʻEikí “ʻi he mālohi ʻo e Laumālie Māʻoniʻoní, te mou lava ai ke ʻiloʻi hono moʻoni ʻo e ngaahi meʻa kotoa pē.”¹⁸ Te tau lava ʻo ʻiloʻi ʻa e moʻoní, taʻe te tau ʻiloʻi ʻa e meʻa kotoa pē. ʻE lava ke tau ʻiloʻi ʻoku moʻoni ʻa e Tohi ʻa Molomoná! Ko hono moʻoní, ʻi he lea ʻa Palesiteni Lāsolo M. Nalesoni he hoʻatā ní, ʻoku lava ke tau “ongoʻi, ʻi he ʻmoʻoni taha’ ʻo hotau lotó [vakai Alma 13:27], ko e Tohi ʻa Molomoná ko e folofola ia ʻa e ʻOtuá.” Pea ʻe lava ke tau “ongoʻi moʻoni ke tau fakaʻaongaʻi ia ʻi he kotoa ʻo ʻetau moʻuí.”¹⁹

Te tau lava ʻo ʻiloʻi ko e ʻOtuá ʻa ʻetau Tamaí, ʻokú Ne ʻofa ʻiate kitautolu; pea ko Hono ʻAlo ko Sīsū Kalaisi hotau Fakamoʻuí mo e Huhuʻí. Te tau lava ʻo ʻiloʻi ʻoku totonu ke tau mahuʻingaʻia ʻi heʻetau hoko ko ha mēmipa ʻi Hono Siasí, pea ʻe tokoni ʻetau maʻu fakauike ʻa e sākalamēnití ke tau malu ai mo hotau ngaahi fāmilí. Te tau lava ʻo ʻiloʻi ʻe lava moʻoni ke taʻengata ʻa e fāmilí, tuʻunga ʻi he ngaahi ouau ʻo e temipalé. Te tau lava ʻo ʻiloʻi ʻoku moʻoni mo totonu ʻa e Fakalelei ʻa Sīsū Kalaisí mo e ngaahi tāpuaki ʻo e fakatomalá mo e fakamolemolé. Te tau lava ʻo ʻiloʻi ko hotau palōfita ʻofeina ko Palesiteni Tōmasi S. Monisoní, ko e palōfita ia ʻa e ʻEikí, pea ko hono ongo tokoní mo e kau mēmipa ʻo e Kōlomu ʻe Toko Hongofulu Mā Uá ko ha kau ʻaposetolo, kau palōfita, kau tangata kikite mo ha kau tangata maʻu fakahā kinautolu.

ʻOku ou ʻiloʻi ʻoku moʻoni kotoa ʻa e ngaahi meʻá ni, ko ʻeku fakamoʻoní, ia ʻi he huafa ʻo Sīsū Kalaisí, ʻēmeni.