O Se Vavega i le Fale o le Alii i Kyiv
Doru Vasile
Bucharest, Romania
Ata na tusia e Allen Garns
Sa matou sagisagi fiafia ma lou aiga e malaga i se taavale mai Romania i Kyiv, Iukereini, mo le faapaiaga o le mlaumalu ia Aokuso 2010. I le iloa ai o le malumalu lea mo le Au Paia o le Misiona i Romania/Moldova, o lea sa matou malaga ai pe tusa ma le 14 itula ia tau lava ina i ai iina. Ina ua matou taunuu, sa matou feiloai ma se vaega o tagata sa malaga mai foi mai Romania. Sa matou fiafia uma lava e i ai i Kyiv mo lea faamoemoega paia.
I se tasi aso o le faapaiaga, sa tofi ai le matou vaega mai Romania e matamata i le faapaiaga e ala i se faasalalauga i totonu o se potu i le fogafale i lalo o le malumalu. Sa amata ona faaalia le le fiafia o nisi. Sa latou faamoemoe e auai ai i le faapaiaga faatasi ma le perofeta i le potu selesitila. Na oo ina fai mai nisi semanu e nonofo i le fale ma matamata ai le faasalalauga mai o latou falelotu i Romania.
Sa amata ona ou tatalo i lou loto, “Le Tama Faalelagi e, e mafai faapefea ona matou fesoasoani i nei tagata mai Romania ia maua se aafiaga e le mafai ona galo i Lou fale?”
Ou te lei mauaina lava se tali ina ua amata le sauniga o le faapaiaga. E lei leva ae matou iloa o le a susu mai i lalo Peresitene Thomas S. Monson 1927–2018), e faataatia le maatulimanu i lona nofoaga. Atonu o le matou tali lea! Sa ou tatalo mo se auala e sau ai le perofeta ma faafeiloai le Au Paia mai Romania.
“Ou te lei ole atu mo lenei mea mo a’u lava,” sa ou tatalo ai, “ae mo o’u uso ma tuafafine.”
Ina ua maea le sauniga o le maatulimanu, sa savali mai Peresitene Monson i autafa o lo matou potu e toe agai atu ai i le potu selesitila. Sa faafuasei, ona ou lagonaina i lo’u loto e tatau ona ou tu ma valaaulia o ia e sau i lo matou potu.
Sa ou tulai ma faapea atu, “Lo matou perofeta e! Sau e vaai matou. Matou te o mai Romania.”
Sa lei foliga mai na ia lagona mai au. Ona, oo lea i sina minute mulimuli ane, na ia toe foi mai. “Romania!” sa ia saunoa ai ma ulufale mai i le potu.
Sa ia faafeiloaia i matou uma ma sa saunoa mai e alofa tele o ia ia te i matou. Sa faatumulia lo’u loto a o ou matamata atu i foliga fiafia o nai o matou tagata pele. “Faafetai le Tama pele,” sa ou tatalo ai, “mo le vavega i Lou fale.”
Ina ua tuua e le perofeta le potu, sa lei toe tautala se tasi. Sa ou lagonaina sa matou i ai i le potu aupito sili ona faamanuiaina i le malumalu. O se aafiaga o le a le galo lava ia te au.