Fuamoa, Fiusi, ma le Faatuatua

Ata

pencil sharpener

Ata na tusia e Carolyn Vibbert

O se tasi o a matou sini o se aiga o le teu ia lava se tupe e totogi ai se vaega o so matou lava fale. Ana leai lena sini, semanu e faamaimau faaiuga o a’u vaiaso e matamata ai le televise, ma faatalitali mo ni avanoa tautupe e oo mai ia te au.

I le avea ai o se avetaavale mo se kamupani eli maina i matu o Chile, e fa aso ou te alu ese ai mai le fale e faigaluega ona tolu lea o o’u aso malolo—Aso Toonai e oo i le Aso Gafua. Ina ia fesoasoani i la matou tupe maua ma le teugatupe mo se fale, sa tonu ai ia te i matou e amata ona faatau atu fuamoa. O la matou fuafuaga e ave oka mai uo, tuaoi, ma tagata o le Ekalesia, ona faatau mai lea pe tusa ma le 1,000 fuamoa i vaiaso taitasi mai se fale faatau atoatoa, ona piki lea ma tiliva ia fuamoa i Aso Toonai ma Aso Gafua.

Sa tonu ia i maua ma lou toalua o Luana o le a matou o ma le ma fanau e toalua e tiliva ma fiafia faatasi ai. Peitai a o matou malaga atu e faatau mai le matou uta muamua o fuamoa, sa matou fetaiai ma se faalavelave. O se tasi o le ma fanau sa taalo i se tama’i vilipeni metale, sa ia togiina le vilipeni ma sa pa’u tonu lava i le atigi afi e tutu ai sikaleti. Sa feemo aloiafi, ma sa aluese uma ai le malosi faaeletise o le matou veni, ma faafuasei ai ona tu i le totonugalemu o se aualatanu. Ua pa se matou fiusi.

A o matou saofafai ai iina ma taofia ai le fegasoloai o taavale ma taumafaufau po o le a le mea e fai, sa oo ina matou le mautonu ma toetoe a fetagisi. Ae i le taimi lena, sa ou manatua ai na folafola mai le Alii e siitia i matou ma fesoasoani mai pe a matou tuu atu lo matou faatuatuaga ia te Ia. Sa oo mai le toafilemu ia te au. Sa ou iloa ai e le tatau ona na ona ou saofai ai iina ma faitio. Sa i ai le matou faafitauli, ma faatasi ai ma le fesoasoani mai o le Atua, o le a matou foiaina.

Sa ma taufai tilotilo atu ma Laura mai le tasi i le isi ma faapea, “E tatau ona faaalia lo tatou faatuatua.” Sa fai se matou tatalo ma soloia o matou loimata. Ona, nofo lea o Laura i le foeuli, ae ou oso i fafo e tulei le taavale. E toatele tagata sa tulioso i fafo mai a latou taavale ma fesoasoani mai ia te au.

Sa matou tuleia le taavale pe tusa ma le 200 mita faatoa maua se vaimea saogalemu e o ese ai mai le alatanu e faatu ai. A o se’e atu le taavale e tu, sa ou matauina o loo matou tu tonu lava i luma o se faleoloa e faatau ai laau o taavale.

Sa ou aumaia le fiusi na pa, ma ou savali atu i totonu o le faleoloa, ma fesili, “E i ai ni tou mea faapea?”

Sa tali mai le faatauoloa, “Ioe.”

Sa ou faatauina se fiusi ma faapipii, ma sa ola le taavale, ma matou o loa lava. E oo atu le matou taavale, ae o le a tapuni le fale faatau fuamoa. Sa faatau a matou fuamoa ma matou o loa e tiliva.

A i ai ni o tatou luitau, e ao ina tatou manatua e ole atu i lo tatou Tama Faalelagi mo se fesoasoani. Ou te iloa o le a tali mai o Ia pe a tatou agai i luma ma faaali atu lo tatou faatuatua ia te Ia.