“E mafai faapefea ona ou valaaulia le Agaga i totonu o lo’u aiga pe a tauaimisa ma fefinauai tagata?”

I se taimi na ou i ai i se tauaimisaga, sa ou iloaina o le fai atu e faamalie atu ma ta’u atu ua e sese, tusa lava pe e te manatu pe iloaina e te sa’o, e fesoasoani e toe aumaia ai le filemu i le potu. Ona savali ese lea, nofo filemu, sui le mataupu, pe sue se mea e ioe i ai. E le umi se taimi mo le Agaga e toe foi mai ai.

Ua ou ioa o le faaali atu o le alofa mama i lo’u aiga e valaaulia ai le Agaga e afio ai i lo matou fale. Sa saunoa le perofeta e uiga i le alofa o le faaosofia lea e afua ai ona suia ma o le pulupasama e aumaia le faamalologa i le agaga. O se agaga o le alofa e aumaia le saogalemu ma le filemu i le fale.

Afai o lou aiga e le o ni tagata o le Ekalesia, ta’u atu ia i latou lou faanoanoa pe a tauaimisa ma talosagaina i latou ina ia faaleleia. A le aoga lena, tatalo ma toe taumafai. Afai o i latou o ni tagata o le ekalesia, faamanatu i ai o i latou o fanau a le Atua ma e tatau ona latou taumamao mai le tauaimisa.

Soo se taimi e tauaimisa ai aiga, e faigata ona lagonaina le afio ai o le Agaga, ae e le faapea o le a le mafai ai ona e lagonaina pe e te agavaa. Fai se tatalo i lou loto mo se fuataga faaopoopo o le Agaga o le Alii ma gauai atili atu i uunaiga e tuuina mai. E mafai e le Tama Faalelagi ona fesoasoani ia te oe ia lagonaina le filemu ma iloa le ala sili e fesoasoani ai e toe aumaia lena filemu i lou aiga.

Talanoa i lou aiga e foia le faafitauli i se ala e aoga mo tagata uma, pe faasoa atu foi se mau pe usu se viiga. E mafai foi ona e ole atu i le Tama Faalelagi mo se fesoasoani e foia ai le faafitauli. I lea ala, o le a faatoafilemuina ai tagata uma ma mafai ai ona foia le faafitauli e aunoa ma le manaomia o se feei po o vesiga. E moni o le a faatumuina oe e le Agaga i le filemu ma avatu ai i tagaTa uma le naunauga e le toe tauaimisa.