Vaneina mo lona aiga

I le avea ai ma se alii talavou, sa auauna atu Kapoa Tiaou o se faifeautalai i Niu Kaletonia, lea na avea ai ma se vaega o le Misiona a Suva, Fiti i lena taimi.

I le maea ai o lana auaunaga, sa ia mauaina se galuega e avea ai ma tagata e faia taualuga, faaipoipo ma amatalia se aiga i Niu Kaletonia.

E ui o lana galuega na tausia ai o ia ma lona aiga, ae sa ia faananau atu e faia se isi mea i ona lima—o se mea o le a aumaia ia te ia ma isi le olioli.

I le avea ai ma se alii e tele le faatuatua, sa ia tatalo ma anapogi mo se meaalofa o le a faataunuuina ai lenei manaoga ma miti. O lona talitonuga malosi i se Tama Faalelagi e alofa ia te i tatou ma finagalo ia tatou manuia, na uunai ai o ia i ana tatalo o le faatuatua.

I se tasi aso, ao ia la’ueseina mai le uta o se loli na tumu i anomea o le taualuga mai se lapisi i le lotoifale, sa ia iloaina ai ni fasi laupapa e lua o taatitia i le lapisi. Sa ia pikiina i luga, togi i luga o lana loli ma aveina i le fale.

O le leai o se potomasani i soo se ituaiga o galuega e faia i laupapa, sa ia faatauina ni meafaigaluega faakamuta ma amata ona faataitai i ai ona tomai. Na ofo o ia i lona lelei—e oo lava i le sese o meafaigaluega. Sa ofo o ia i lona mafai ona vaneina o se faatusa o lona lava lima lea e mafai ona faaaoga o se tulaga mo le moli.

Sa avea ma se tulaga maoae o gaoioiga o le a amata ona faia i le olaga o Kapoa.

O le vaiaso na sosoo ai ma lana uluai taumafaiga i le vane faatagata, sa fetaui ai Kapoa ma se uo tuai lea na faanoanoa i le le manuia o lana suega. Na fesili atu Kapoa po o le a le ituaiga o suega lea na le manuia; na tali mai lana uo, “. . . o la’u suega vane faatagata.” Na manaomia e le suega lona faia o se faatusa o se tupe siliva o i ai se ata o se manulele. E lei manuia lana taumafaiga ona sa sese mata o le manulele. O le leaga o le vaaiga na taofia mai ai o ia mai le mauaina o se tusi pasi i le vane faatagata.

“O fea na e aoao ai e vane faatagata?” o le fesili lea a Kapoa.

Na faailoa atu ia Kapoa e lana uo le aoga. Sa pasi lana suega ulufale ma faauu i le 11 masina mulimuli ane ma se tusi pasi i le vane faatagata.

Na tei lona pule faakamuta ina ua faamavae Kapoa mai lana galuega. Sa ia fesili atu, “Ua e mautinoa?” “E lei i ai lava se taimi ua sili atu ai ona ou mautinoa e uiga i se mea!” o le tali lea a Kapoa.

Sa faigaluega Kapoa e vane faatagata mo se tagata i le kamupani mo suvania ma mo malo asiasi mai. Sa ia fetaiai ma se luitau sili ona tele i lona olaga. I se taimi e lei mamao atu ona fanauina le la tama lona tolu, na maliu ai lona toalua—tuua ai o ia e tausi le la fanau, o se 3 tausaga, 2 tausaga ma le pepe e 1 le masina.

Sa ia mauaina o ia i se nofoaga sili ona pogisa o fesili ma faanoanoaga. Na ia toe liliu atu i le faatuatua o le puna o ona faamanuiaga uma; ma na oo mai le fesoasoani i se auala e lei mafaufauina.

Na tuitui mai ni tamaitai faifeautalai se toalua i lona faitotoa ma sa fesoasoani i lana fanau ma tuuina mai ni fautuaga. Sa tau atu e le tasi tamaitai faifeautalai ia te ia, “Afai o faatumuina oe i ao pogisa, e leai se avanoa mo le malamalama o Keriso.” O lenei faamatalaga na tatagi pea ia Kapoa ma sa amata ai ona ia pe’a mai i fafo o le nofoaga pogisa sa ia i ai.

I le maea ai o lana misiona, sa toe foi mai se tasi o faifeautalai tamaitai e siaki Kapoa. Na faia ai se faauoga maoae ma iu ai ina la faaipoipo. Sa ia faatumulia le olaga o le vane faatagata talavou i le mausali ma le alofa mo lana fanau e toatolu.

Na aoaoina e Beatrice Tiaou ni tomai vane faatagata mai lona toalua fou; ma amata ona ia matuai lelei i le vaneina o laupapa. O le tuufaatasia ai na mafai ai ona la amataina se laua lava pisinisi ma mafai ona maua se tupe i le matata o le vane faatagata.

Ao tuputupu ae le fanau, sa latou aoaoina foi le faatufugaga o le vane faatagata. O loo tauaveina e i latou taitoatasi le tu masani o le vaneina o faatagata mananaia ma le galue i laupapa i atunuu ia ua latou soifua ai.