O se Ataata o le Taliaina

Sa faia se gaoioiga a le matou uarota i se tasi po lea na matou faaaluina ai le tele o itula e tapenapena ai. Ina ua uma le gaoioiga sa faatofa mai ia te au se tagata sailiili talavou ae sa toe foi mai i ni nai minute mulimuli ane ma fesili mai, “Epikopo, o afea e manaomia ai ou te toe sau?” Sa ou fai atu i ai o le Aso Sa, ma sa vave ona fai mai le tamaitiiti, “Leai, e leai se isi gaoioiga?” Sa fiafia tele o ia i le taimi sa mafuta ai ma le autalavou a le matou uarota ma sa ia manao ai e toe sau.

Sa matou talanoa foi ma se ulugalii sa asiasi mai ma auai i le gaoioiga ma fesili atu i ai pe o le a so la manatu? Sa fai mai le tane, “Talu lava ona ma taunuu mai iinei, sa ma lagonaina lava le filemu ma le mafanafana,” lea na faamautu mai e lona toalua i le lue mai o lona ulu. Sa ou te’i i lenei mea aua ina ua la faatoa taunuu, sa toatele tagata sa talanoa ma sa pisapisao. Ae sa tilotilo mai pea o ia ia te au ma fesili, “O le Agaga Paia lena, e sa’o?” Ma le faateia sa na ona ou fai atu ioe.

Sa tele naua mea sa faia e tapena ai mo lenei gaoioiga, ina ia uma loa lava mea i lena po, na pau lava le mea sa ou manao ai o le alu i le fale e moe. Ona o lo’u lelava tele, sa le mafai ai ona ou mafaufau i la matou talanoaga ma tagata sailiili. Ina ua ou taunuu i le fale, sa fai la’u tatalo ma alu i le moega, ae sa le mafai ona ou moe, i lo’u vaaia i lo’u mafaufau le ataata mai o le Alii. O se ataata o le taliaina. I lena taimi, sa amata ai ona ou manatua mea matagofie sa tupu i lena gaoioiga.

Sa ou malamalama o le filiga ma le alofa o tagata o le uarota na mafai ai ona tuia loto o na tagata sailiili e toatolu. Sa ou malamalama o le ataata o le taliaina sa mo le mea sa matou faia. Sa le mafai ona ou taofia le tagi, ma sa ou lagonaina le lotofaafetai mo le meaalofa na aumai e le Alii mo i matou. Sa ia tuuina mai ia i matou se ataata o le taliaina. Ou te molimau atu e moni afioga a le Alii a tatou aumaia se agaga e toatasi ia te ia, o le a sili lo tatou fiafia i le malo o le Tama (tagai MF&F 18:15).