Pōpoaki mei he Kau Taki Fakaʻēliá
Ko Hono Fakamālohia Hotau Ngaahi ʻApí ʻi he Ngaahi ʻAho Kimui Ní
Naʻe pehē ʻe Palesiteni Lāsolo M. Nalesoni ʻi heʻene lea kamata lolotonga e Konifelenisi Lahi ʻi ʻOkatopa 2018:
“Kuo hoko ko ha kaveinga tuʻuloa ʻo e Siasí, ʻa hono tokoniʻi ʻo e kāingalotu kotoa pē ke fakatupulaki ʻenau tui ki hotau ʻEiki ko Sīsū Kalaisí mo ʻEne Fakaleleí, tokoniʻi kinautolu ʻi hono fakahoko mo tauhi ʻenau ngaahi fuakava mo e ʻOtuá, pea fakamālohia mo silaʻi honau ngaahi fāmilí. ʻOku ʻikai faingofua ʻeni ʻi he māmani fihituʻu ʻo e ʻaho ní. ʻOku fakautuutu ai pē hono ʻohofi ʻe he filí ʻetau tuí, mo kitautolu pea mo hotau ngaahi fāmilí. ʻOku fie maʻu ke tau palani ʻikai toe fakakounaʻi mo ngāue ka tau hao fakalaumālie. Ko ia ai, ʻoku mau fie fai ha ngaahi liliu ki he fokotuʻutuʻu fakaehoualotú ʻe tokoni ia ke toe fakamālohia ange ai hotau kāingalotú mo honau ngaahi fāmilí.”1
ʻI heʻeku fakalaulauloto ki he pōpoaki fakaepalōfita fakaofo ko ʻení, mei he ngaahi fakakaukau kuó u maʻú, “ʻoku anga fēfē nai hono fakamālohia hotau kau mēmipá mo honau ngaahi fāmilí”?
ʻI he ʻAlamā 5:1–4, ʻoku fakamatalaʻi ai ʻe he ʻEikitau ko Molonaí e founga naʻá ne langa ai ha ngaahi ʻā mālohi ke maluʻi hono kakaí mei he pōpula fakatuʻasinó. Kātaki ʻo tokanga makehe ki he ngaahi kupuʻi lea hangē ko e, ‘keli hake ha ngaahi fokotuʻunga kelekele, sinoʻi ʻakau, ʻakau kuo fakamata māsila mo ha ngaahi taua.
Fakatatau mo e laumālie ʻo e faleʻi ʻa Nīfai ke, “fakatatau ʻa e ngaahi folofola kotoa pē kiate kimautolu, koeʻuhí ke ʻaonga ia kiate kimautolu pea mau poto ai”.2 ʻOku ou tui ʻoku maʻongoʻonga e ngaahi founga fakamālohia mo e ngaahi palani ʻa Molonai ke fakaʻehiʻehi mei he nofo pōpula fakatuʻasino ʻi he 72 B.C, ʻi heʻetau feinga ke fakamālohia hotau ngaahi ʻapí mo e fāmilí ʻi he ngaahi ʻaho kimui ní.
Hangē ko e ʻEikitau ko Molonaí, ʻa ia naʻe teuteu taʻetūkua ke maluʻi hono kakaí mei honau ngaahi filí (kau ʻAmalekí), ʻoku hokohoko atu e fekumi ʻa Palesiteni Nalesoni ʻi hotau kuongá ni ke maʻu ha fakahā mei he ʻEikí ke maluʻi kitautolu mei hotau filí (Sētane). Ko ha ngāue fakatuʻasino hono keli ʻo e ‘ngaahi fokotuʻunga kelekelé’ ke maluʻi ʻaki e koló. Te ke lava ʻo fakakaukauloto ki he ngaahi houa lahi ʻo e ngāue mālohi fakatuʻasino naʻe fie maʻu ke foua ʻe he kakai ʻo Molonaí ke fakahoko e meʻa ne nau faí. Ne nau fakahoko kotoa ia taʻe kau ai ha faʻahinga meʻangāue fakaonopooni ʻo hangē ko ia ʻoku tau maʻu he ʻaho ní. ʻOku fie maʻu ʻa e feinga taʻetūkua fakalaumālié ki he ‘ngaahi fokotuʻunga kelekele’ ʻoku fie maʻu ke tau keli kae lava ke fakamālohia hotau ngaahi ʻapí he ʻaho ní. ʻE fie maʻu ʻa e tuí mo e ngāué, loto fakatōkilaló, talangofuá, ʻofá, uouongatahá, fakamātoató, tukupaá, lotú mo e manavaʻofá ko ha konga pē ia ʻo e ngaahi ʻulungaanga faka-Kalaisí.
ʻOku ou manako ʻi he talanoa fakatātā te tau lava ʻo maʻu mei he founga fakamālohia ne fokotuʻu ʻe he ʻEikitau ko Molonaí maʻa hono kakaí, ke maluʻi ʻaki kinautolu mei haʻanau moʻulaloa ki he nofo pōpula fakatuʻasinó. Kapau ʻe fakakaukauloto ha taha ki he founga hono langa ha faʻunga hangē ko ia kuo fakamatalaʻí; ʻe fie maʻu ʻa e makatuʻunga ko iá ke “pau”. Kuo pau foki ke tau maʻu ha makatuʻunga pau kae lava ke fakamālohia hotau ngaahi ʻapí mo e fāmilí, pea mo maluʻi kitautolu mei he pōpula fakalaumālié. Naʻe fakamanatu mai ʻe Nīfai mo Līhai e tūkunga ʻoku totonu ke ʻi ai hotau fakavaʻé ʻi he taimi ne na lea ʻaki ai e ngaahi lea ʻa ʻena tamai ko Hilamaní kiate kitautolú, “Pea ko ʻeni, ʻe hoku ongo foha, manatu, manatu, ʻoku makatuʻunga ʻi he maka ʻo hotau Huhuʻí, ʻa ia ko Kalaisi, ko e ʻAlo ʻo e ʻOtuá, kuo pau ke mo langa ai homo makatuʻungá . . .”3
ʻI he taimi ʻoku mālohi ai hotau makatuʻungá (langa ʻia Kalaisi, ko e ʻAlo ʻo e ʻOtuá), te tau lava ʻi heʻetau maʻu ha loto-falalá ʻo langa hotau fakamālohiaʻangá. Ko e hā ʻe lava ke fakafofongaʻi ʻe he ‘ngaahi sinoʻi ʻakau’, “ʻakau kuo fakamata māsila” pea mo e ngaahi taua ʻi he ʻā mālohi ʻa Molonaí ʻi he ngaahi ʻaho kimui ní. Ko hono toe fakamahinoʻi ange ʻa hono fakatatau ʻo e folofolá kiate kitautolú.
Ngaahi Sinoʻi ʻAkaú: ʻE lava ke fakafofongaʻi ʻe he ngaahi sinoʻi ʻakaú hotau ngaahi uōtí mo e siteikí. ʻOku tau lau, “He kuo pau ke tupulaki ʻa Saione ʻi he fakaʻofoʻofa, pea ʻi he māʻoniʻoni; kuo pau ke fakalahi ʻa hono ngaahi ngataʻangá; kuo pau ke fakamālohi ʻa hono ngaahi siteikí; ʻio, ko e moʻoni, ʻoku ou pehē kiate kimoutolu, kuo pau ke tuʻu hake ʻa Saione pea ʻai hono ngaahi kofu fakaʻofoʻofá.”4 ʻOku tau mohu tāpuekina ke maʻu ha “hūfangaʻanga . . . mei [he] afaá” pea mo ha feituʻu ke tokoni ʻi hono fakamālohia hotau ngaahi ʻapí.
Naʻe pehē ʻe Palesiteni Nalesoni, “ʻI heʻetau hoko ko ha Kāingalotú, kuo tau anga ʻaki ʻa e fakakaukau ko e ‘lotú’ ko ha meʻa ia ʻoku toki fai pē ʻi hotau ngaahi ʻapisiasí, kae poupou ki ai e ngaahi meʻa ʻoku hoko ʻi ʻapí. ʻOku fie maʻu ke tau liliu ʻa e sīpinga ko ʻení. Kuo hokosia e taimi ke ʻi ai ha Siasi ʻoku fakatefito ʻi ʻapi, kae poupou ki ai e meʻa ʻoku hoko ʻi hotau ngaahi ʻapisiasi fakakoló, fakauōtí, mo e fakasiteikí.5
ʻAkau Kuo Fakamata Māsila: ʻE lava ke fakafofongaʻi ʻe he ʻakau kuo fakamata māsilá hotau ngaahi ʻapí. ʻOku poupouʻi kitautolu ʻi he Tokāteline mo e Ngaahi Fuakavá ke “Fokotuʻu ʻa kimoutolu; teuteu ʻa e meʻa ʻaonga kotoa pē; pea fokotuʻu ha fale, ʻio ko ha fale ʻo e lotu, ko ha fale ʻo e ʻaukai, ko ha fale ʻo e tui, ko ha fale ʻo e ako, ko ha fale ʻo e nāunau, ko ha fale ʻo e maau, ko ha fale ʻo e ʻOtuá.”6 ʻOku fēfē hotau ngaahi ʻapí?
Ngaahi Taua Māʻolunga Ange ʻi Hotau Ngaahi Siteikí mo e ʻApí: ʻE lava ke fakafofongaʻi ʻe he ngaahi taua māʻolunga ange ʻi hotau ngaahi siteikí mo e ʻapí e ngaahi temipale ʻa hotau ʻOtuá. Kapau ʻoku fie maʻu ke tau matuʻuaki ʻa Sētane mo hono kau muimuí (fakaʻehiʻehi mei he pōpula fakalaumālié), ʻe fie maʻu ke hoko ʻa e temipalé ko hotau taua ʻi he ngaahi ʻā fakamālohia ʻoku tau feinga ke fokotuʻú. Naʻe lea ʻaki ia ʻe Palesiteni Nalesoni ʻo pehē, “ʻOku toe fakautuutu ange ʻa e fie maʻu ke tau ʻalu maʻu pē ki he temipalé. ʻOku ou kole atu ke mou tuku ha taimi ke mou vakai fakalelei ai ki he anga hono fakaʻaongaʻi ho taimí. Fakaʻaongaʻi lelei ho taimí koeʻuhí ko ho kahaʻú mo ho fāmilí. Kapau ʻokú ke lava ʻo ʻalu ki he temipalé, ʻoku ou tapou atu ke ke feinga ke ke fetuʻutaki maʻu pē mo e ʻEikí—ʻo ʻalu ki Hono fale māʻoniʻoní—pea tauhi pau maʻu pē taimi ko iá ʻi he fiefia. ʻOku ou palōmesi atu ʻe ʻomi ʻe he ʻEikí ha ngaahi mana ʻokú Ne ʻafioʻi ʻokú ke fie maʻu ʻi hoʻo feilaulau ke tokoni mo moihū ʻi Hono temipalé.7
ʻOfa ke faitāpuekina kitautolu ʻe he ʻEikí ʻi heetau feinga ke fakamālohia hotau ngaahi ʻapí ʻi he ngaahi ʻaho kimui ní.