តាក់ស៊ីមួយ ក្មេងប្រុសសាលាម្នាក់ និងចម្លើយមួយដល់ការអធិស្ឋាន
អ្នកនិពន្ធរស់នៅរីវ័រស្តេត នីហ្សេរីយ៉ា ។
យើងបានមានការបំផុសមួយថា យើងនឹងរកគាត់ឃើញ ហេតុអ្វីវាមិនដំណើរការ ?
ថ្ងៃមួយដៃគូផ្សព្វផ្សាយសាសនារបស់ខ្ញុំ និងខ្ញុំបានទទួលការបញ្ជូនឲ្យបង្រៀនបុរសម្នាក់ដែលរស់នៅភូមិមួយហៅថា ថេម៉ា នៅជិតទីក្រុងដ៏ស្រស់ស្អាតអាក្រា ប្រទេសហ្គាណា ។ លេខផ្ទះនៅក្នុងភូមិនោះមិនសូវជាត្រឹមត្រូវប៉ុន្មានទេ ដូច្នេះ យើងបានទទួលការពិពណ៌នាដែលសរសេរនៅលើក្រដាសដើម្បីជួយយើងរកផ្ទះនោះឃើញ ។
ពេលយើងបានមកដល់ភូមិនោះ យើងបានធ្វើតាមការណែនាំនោះ ប៉ុន្តែពុំអាចរកបុរសនោះឃើញទេ ដោយសារវាហាក់បីដូចជាមានផ្ទះច្រើនដែលត្រូវនឹងការពិពណ៌នានោះ ។ ដោយមានអារម្មណ៍ភាន់ច្រឡំ យើងបានសម្រេចចិត្តថាគោះទ្វារផ្ទះនៅក្នុងតំបន់នោះដើម្បីសួរ ប៉ុន្តែហាក់ដូចជាពុំមាននរណាម្នាក់ស្គាល់បុរសដែលយើងកំពុងរកនោះទេ ។ ខ្ញុំបានទទួលការបំផុសឲ្យទូលសូមជំនួយពីព្រះវរបិតាសួគ៌ ។
បន្ទាប់ពីយើងបានអធិស្ឋានហើយ ខ្ញុំបានមានអារម្មណ៍ថា យើងនឹងរកឃើញបុរសដែលយើងកំពុងរកនោះ ដូច្នេះយើងបានខិតខំរកកាន់តែខ្លាំងឡើង ។ យើងនៅតែរកគាត់មិនឃើញ ។ យើងអស់កម្លាំង ហើយបានសម្រេចចិត្តថាត្រឡប់ទៅតំបន់ផ្សព្វផ្សាយរបស់យើងវិញ ដោយសារយើងមានការណាត់មួយទៀត ។ ពេលយើងទៅដល់ចំណតតាក់ស៊ី អ្នកបើកតាក់ស៊ីដែលបាននាំយើងមកភូមិនោះបានឃើញការខកចិត្តនៅលើផ្ទៃមុខរបស់យើង ហើយបានសួរថាបើយើងបានរកឃើញអ្នកដែលយើងស្វែងរកនោះឬទេ ។ ចម្លើយរបស់យើងគឺ ប្រាកដណាស់ មិនឃើញទេ ។
គាត់បានផ្ដល់យោបល់ថាឲ្យយើងចូលទៅក្នុងសាលា ដែលនៅកាច់ជ្រុងនោះ ហើយសួរនៅទីនោះ ។ យើងបានប្រាប់គាត់ថា នោះមិនមែនជាការពិពណ៌នាដែលគេផ្ដល់ដល់យើងនោះទេ ប៉ុន្តែគាត់នៅតែទទូច ។ យើងបានចេញពីតាក់ស៊ី ហើយបានទៅកាន់សាលានោះ—មិនមែនដោយសារយើងគិតថា យើងនឹងរកឃើញនរណាម្នាក់នោះទេ ប៉ុន្តែគ្រាន់តែដើម្បីធ្វើឲ្យមិត្តដ៏ខ្វល់ខ្វាយរបស់យើងបានសប្បាយចិត្តប៉ុណ្ណោះ ។
ពេលយើងបានចាប់ផ្ដើមដើរទៅកាន់អគាររដ្ឋបាលរបស់សាលា មានក្មេងប្រុសម្នាក់បានរត់មករកយើង ។ គាត់បានញញឹម ហើយបានប្រាប់យើងថា គាត់ និងបងប្រុសគាត់គឺជាសមាជិកនៃសាសនាចក្រនៃព្រះយេស៊ូវនៃពួកបរិសុទ្ធថ្ងៃចុងក្រោយតែពីរនាក់ដែលរស់នៅក្នុងតំបន់នេះ ហើយថាគាត់អាចជួយយើងបាន ។
ដៃគូខ្ញុំ និងខ្ញុំបានសម្លឹងមើលគ្នាទៅវិញទៅមកដោយមិនជឿ ។ វាជាអព្ភូតហេតុមួយ ។ ក្មេងប្រុសនោះបានជួយយើងរកបុរសដែលយើងកំពុងរកនោះ ហើយទីបំផុតគាត់បានទទួលដំណឹងល្អ ហើយបានទទួលបុណ្យជ្រមុជទឹក ។
បទពិសោធន៍នេះបានបង្រៀនខ្ញុំថា ព្រះវរបិតាសួគ៌ឆ្លើយតបការអធិស្ឋានតាមពេលវេលា និងតាមរបៀបរបស់ទ្រង់ ។ ពេលយើងមិនទទួលបានចម្លើយភ្លាមៗចំពោះសំណួររបស់យើង យើងអាចអនុវត្តសេចក្ដីជំនឿលើទ្រង់ ហើយរៀនអត់ធ្មត់ ។
រចនារូបភាពដោយ ខូរី អេចបឺត