Stap Muv Fored
Wok blong Lod i stap muv fored sloslo i go.
Ol dia brata mo sista blong mi. Hem i wan glad blong stap wetem yufala taem yumi stat blong makem namba 190 Medel Yia Jeneral Konfrens blong Jos Ia blong Jisas Kraes blong Ol Lata-dei Sent. Mi laekem blong joenem yufala insaed long hom blong yufala o weaples yufala i stap tugeta long hem, blong yumi lisin long ol mesej blong ol profet, sia, mo reveleta mo blong ol nara lida blong Jos.
Yumi talem tangkyu from teknoloji ia we i letem yumi joen olsem wan bigfala wol kam tugeta blong ol disaepol blong Jisas Kraes. Jeneral konfrens blong las Epril, namba blong ol pipol we oli wajem i moa bigwan bitim bifo, mo mifala i ting se bae i hapen bakegen.
Long ol las manis we oli pas, wan wol sik, ol strong wael faea, mo ol nara disasta oli tanem wol ia i apsaed daon. Mi krae sore wetem yufala we i lusum wan we yufala i lavem long tetaem ia. Mo mi stap prea from olgeta evriwan we oli stap safa naoia.
Be yet, wok blong Lod i stap muv fored sloslo i go. Long medel blong fasin sosol distens, ol fes mask, mo ol Zoom miting, yumi bin lanem blong mekem sam samting i defren, mo mekem samting i gud moa tu. Ol taem we i defren i save tekem ol praes we oli defren.
Ol misinari mo ol misin lida blong yumi oli bin ol gud risos, oli stap strong, mo oli bin mekem gud tok tumas. Nomata we kolosap evri misinari oli faenem ol niu wei blong mekem wok blong olgeta, plante misin oli ripot se oli stap tij moa bitim oltaem.
Mifala i mas klosem ol tempol blong sot taem, mo sam bilding projek oli go slo smol, be naoia oli stap muv fored. !Long kalenda yia blong 2020, bae yumi brekem graon blong 20 niu tempol!
Famli histri wok i kam antap bigwan. Oli krietem plante niu wod mo stek. Mo mifala i glad blong givim ripot se Jos i bin givim yumaniterian help from wol sik ia blong 895 projek long 150 kantri.
Gospel stadi insaed long hom we i kam antap i mekem se i gat ol testemoni mo ol famli rilesensip we oli kam strong moa. Wan mama i bin raetem: “Yumi filim se yumi kolosap moa long ol pikinini blong yumi mo ol apupikinini blong yumi naoia we yumi kam tugeta long Zoom evri Sandei. Wanwan i gat taem blong givim tingting long Kam Folem Mi. Ol prea blong ol memba blong famli i bin jenis from se yumi andastanem gud moa wanem we oli nidim.”
Mi prea se, olsem wan pipol, yumi stap yusum taem ia, we i wan kaen ia nomo, blong yumi groap long saed blong spirit. Yumi stap long ples ia blong Lod i testem yumi, blong luk save bae yumi jusum blong folem Jisas Kraes, blong sakem sin oltaem, mo lanem samting mo progres. Spirit blong yumi i wantem progres tumas. Mo yumi mekem hemia taem yumi stap strong long kavenan rod ia.
!Tru long evri samting, Papa blong yumi long Heven mo Pikinini blong Hem, Jisas Kraes, Tufala i lavem yumi! !Tufala i kea long yumi! Tufala mo ol tabu enjel blong Tufala oli stap lukaotgud long yumi.1 Mi save se hemia i tru.
Taem yumi kam tugeta blong harem ol toktok we Lod i bin givim insperesen long mifala blong talemaot, mi stap invaetem yufala blong tingting hevi long wan promes we Lod i bin mekem. Hem i talemaot se “eni man we i wantem, i save holemtaet toktok blong God, we i laef mo i gat paoa, we bae i save brekem ol trik mo ol rop blong trap mo ol plan blong devel, mo lidim man blong Kraes long wan rod we i stret mo i no isi.”2
Mi prea se bambae yufala i jusum blong holemtaet toktok blong God olsem we i kamaot long Jeneral Konfrens ia. Mo mi prea se yufala i filim stret lav ia blong Lod we Hem i gat long yufala,3 long tabu nem blong Jisas Kraes, amen.