We Oli Givim Nem I Go long Lod

Gud moning, ol brata mo sista. Olsem wan disaepol blong Sevya blong yumi, Jisas Kraes, mi bin stap luk fored from onlaen kam tugeta ia wetem yufala long evri kona blong wol ia, from konfrens ia.

Yia ia i defren, i no olsem ol narawan. Long mi, hem i stat wetem wan wok we i kam long Fas Presidensi blong dediketem wan tabu tempol i go long Lod, long Deban, Saot Afrika. Bambae mi neva fogetem se bilding ia i hae mo tabu. Be, bitim wanem we i stap, bae mi oltaem tingbaot gud tingting blong ol pipol we oli bin rere gud blong go insaed long tabu bilding ia. Oli kam we oli rere blong tekpat long wan long ol bigfala blesing blong Restoresen: dedikesen blong wan haos blong Lod. Oli kam wetem hat we oli fulap wetem lav long Hem mo long Atonmen blong Hem. Oli kam mo fulap wetem tangkyu i go long Papa blong yumi long Heven from ol tabu odinens we bae mekem olgeta i kam olsem wan god. Oli kam we oli klin inaf.

Ol tempol, nomata weaples oli stap long hem, oli bildim olgeta i hae bitim ol standet blong wol. Evri Lata-dei Sent tempol long wol–evri 168 long olgeta–oli stanap olsem ol testeman blong bilif blong yumi long laef ia we i no save finis mo glad ia blong spendem laef ia wetem ol famli blong yumi mo Papa blong yumi long Heven. Taem yumi go long tempol, save blong yumi i gro long saed blong Godhed mo gospel we i no gat en, long saed blong komitmen blong yumi blong laef folem mo tijim trutok, mo long saed blong gladhat blong yumi blong folem eksampol blong Lod mo Sevya Jisas Kraes.

Long aotsaed blong evri tempol blong Jos, i gat ol stret toktok ia, “Tabu fasin long Lod.” Tempol hem i haos blong Lod mo wan ples blong haed long ol samting blong wol. Spirit blong Hem i kavremap gud olgeta we oli stap wosip insaed long ol tabu wol blong haos ia. Hem i putum ol standet blong yumi folem taem yumi go insaed olsem ol ges blong Hem.

Palika blong mi, Blaine Twitchell, wan long ol ol gudfala man ia we mi bin save, i bin tijim mi wan bigfala lesen. Sista Rasband mo mi, i bin go visitim hem taem laef blong hem long wol ia i stap kam long en. Taem mitufala i go insaed long rum blong hem, bisop blong hem i stap rere blong go. Taem mitufala i stap talem halo long bisop mi stap tingting: “Wan bisop ia i naes tumas. Hem i stap ia blong givhan long wan fetful memba blong wod blong hem.”

Mi talem long Blaine: “Hem i naes tumas blong bisop i kam visit.”

Blein i lukluk mi mo ansa: “Hem i moa long hemia. Mi askem bisop blong kam from tempol rekomen intaviu blong mi. Mi wantem ded we oli givim nem blong mi i go long Lod.” !Mo hemia i hapen!

Toktok ia, “we oli givim nem i go long Lod” i bin stap wetem mi. Hem i givim mi wan ful niu lukluk long olsem wanem ol Lida blong Jos blong yumi oli stap intaviu yumi. Wan tempol rekomen i impoten tumas long ol taem we Jos i jes stat kasem 1891, mekem se wanwan tempol rekomen, Presiden blong Jos nao i apruvum.¹

Nomata se i blong wan yut o adalt, tempol rekomen intaviu blong yu i no abaot ol samting we yu mas mekem o no mas mekem. Wan rekomen i no wan lis blong tikim, wan pepa we i givim raet long yu blong brekem ol rul, o wan tikit blong wan spesel ples blong sidaon. Stamba tingting blong hem i moa hae mo moa tabu. Blong kwalifae blong kasem ona ia blong wan tempol rekomen, yu mas laef gud folem ol tijing blong Jos ia blong Jisas Kraes blong Ol Lata-dei Sent.

Long intaviu blong yu, yu gat janis ia blong lukluk gud sol blong yu i stap wea abaot fet blong yuwan long Jisas Kraes mo Atonmen blong Hem. Yu gat blesing ia blong talemaot testemoni blong yu abaot gospel we i kambak; talem gladhat blong yu blong sastenem olgeta we Lod i jusum blong lidim Jos blong Hem; bilif blong yu long doktrin blong gospel; ol samting we yu mekem blong lukaotem famli blong yu; ol kwaliti blong yu blong stap ones, folem loa blong jastiti, stap tru long man o woman blong yu, stap obei, kipim Tok blong Waes, loa blong taeting, mo kipim Sabat dei i tabu. Hemia oli ol stamba prinsipol blong wan laef we wan i givim fulwan long Jisas Kraes mo wok blong Hem.

Tempol rekomen blong yu i stap soem wan tingting long saed blong spirit we i dip mo i tru, se yu stap traehad blong laef folem ol loa blong Lod mo lavem wanem Hem i lavem: gat tingting i stap daon, no stap flas, stanap strong oltaem, bigfala lav, strong paoa long tingting, lav mo sore, stap fogiv, mo stap obei. Mo yu komitim yuwan blong folem ol standet ia taem yu saenem nem blong yu long tabu pepa ia.

Tempol rekomen blong yu i openem ol get blong heven long yu mo ol narawan wetem ol raet mo odinens we oli blong taem we i no save finis, we i tekem ol baptaes, ol endaomen, ol mared mo ol siling.

Blong oli ‘givim nem [blong yu] i go long Lod,” i blong mekem wan i tingbaot wanem nao hem i mas mekem olsem wan Lata-dei Sent we i stap kipim ol kavenan. Palika blong mi, Blaine, i bin luk se i impotem tumas blong rere from dei ia we bae hem i stanap wetem wan tingting blong hat we i stap daon long fes blong Lod.

Tingting long taem we Moses i klaem Hil blong Horeb mo Lod, Jehova i kamaot long hem long wan bus we faea i laet long hem. God i talem long hem: “!Yu tekemaot sandel blong yu! !Graon ya we yu stap stanap long hem i tabu ya!”²

Blong tekemaot sus blong yumi long doa blong tempol, hem i blong lego ol samting blong wol we yumi laekem we bae oli blokem yumi blong gro long saed blong spirit, lego long saed, ol samting ia we oli pulumaot tingting blong yumi long wol ia, hem i blong no letem fasin blong raorao i spolem yumi, hem i blong lukaotem wan taem blong stap tabu.

Tru long wan tabu plan, bodi blong yumi i wan kriesen blong God, wan tempol blong spirit blong yumi, mo yumi mas lukaotem wetem respek. Ol toktok blong Praemeri singsing ia oli tru: “Bodi blong mi i wan tempol we i nidim bigfala kea.”³ Taem we Lod i kamkamaot long Ol Man blong Nifae, Hem i givim komanmen ia: “yufala i save kam tabu taem we yufala i kasem Tabu Spirit, blong yufala i save stanap mo yufala i no gat mak long fored blong mi long las dei.”⁴ “Yufala i mas kam ol wanem kaen man?Lod i askem, mo afta i ansa: “Olsem we mi stap”⁵ Blong oli “givim nem [blong yumi] i go long Lod,” yumi traehad blong stap olsem Hem.

Mi tingbaot we mi bin harem Presiden Howard W. Hunter long fas toktok blong hem long jeneral konfrens olsem namba 14 Presiden blong Jos. Hem i talem: “Hem i dip tingting insaed long hat blong mi se, evri memba blong jos, i mas klin inaf blong go insaed long tempol. Bae Lod i laekem tumas mo bae i glad tumas sapos evri adalt we i memba blong jos bae oli klin inaf blong kasem—mo holem—wan tempol rekomen we i laef i stap.”⁶ Bae mi ademap, wan limit yus tempol rekomen blong putum wan klia rod long ol gudfala yut blong yumi.

Presiden Nelson i tingbaot ol toktok ia blong Presiden Hunter: “Long dei ia, 6 Jun 1994, tempol rekomen ia we yumi stap karem long walet o paos, i kam wan defren samting. Bifo, hem i rod blong kasem wan samting. I rod blong letem mi go insaed long tabu haos blong Lod; be afta we hem i talem toktok ia, hem i kam samting ia nao we mi wantem kasem. Hem i kam wan baj we i soem se mi stap obei long wan profet blong God.”⁷

Sapos yu no kasem wan rekomen yet, o sapos rekomen blong yu i nomo laef, laenap long doa blong bisop semmak olsem ol fas Sent oli laenap long doa blong Nauvu Tempol long 1845 mo 1846.⁸ Ol bubu blong mi oli bin stap wetem ol fetfulwan ia. Oli bin lego naes siti blong olgeta mo oli go Wes, be oli bin save se ol tabu eksperiens i stap longwe, i wet long olgeta insaed long tempol. Sarah Rich i raetem taem i stap long Aeowa: “Sapos i no bilif mo save ia we oli givim long mifala insaed long tempol, … bae wokbaot blong mifala i olsem blong tekem wan step i go long tudak.”⁹ Hemia nao yumi stap mestem sapos yumi stap gotru long laef ia yumiwan, we yumi no gat insperesen mo pis we oli promesem yumi insaed long tempol.

Statem rod ia naoia, blong oli “givim nem blong yu i go long Lod” blong mekem se Spirit blong Hem i stap wetem yu fulap, mo blong ol standet blong Hem oli tekem “pis long tingting” blong yu.¹⁰

Ol yut lida blong yufala, ol presiden blong kworom blong ol elda, presiden blong Rilif Sosaeti, mo ol givhan brata mo sista blong yufala bae oli helpem yufala blong rere, mo bisop o branj presiden bae oli soem rod long yufala wetem lav.

Yumi bin gotru long wan taem we ol tempol oli bin klos, o oli yusum wetem sam limit. Long Presiden Nelson mo olgeta we oli wok long saed blong hem, desisen ia we i kam tru long insperesen blong klosem ol tempol, i mekem “hat i soa” mo “i mekem plante wari.” Presiden Nelson i stap i askem hemwan: “?Bae mi talem wanem long Profet Josef Smit? ?Bae mi talem wanem long Brigham Yang, Wilfod Wudrof mo ol nara presiden i go kasem Presiden Thomas S. Monson?”¹¹

Naoia, sloslo mo wetem tangkyu, yumi stap openem bakegen ol tempol blong gat ol siling mo ol endaomen long wan limit namba.

Be, blong stap klin inaf blong go long tempol, hemia oli no stopem nating. Bae mi talem bigwan bakegen se, i nomata se tempol i stap kolosap o no, yu nidim blong tempol rekomen we i laef i stap blong stanap strong long kavenan rod ia.

Let las yia, Sista Rasband mo mi i go mekem wan wok long Niu Silan, we mitufala i toktok long wan bigfala grup blong ol yang singgel adalt. Tempol i no stap kolosap long olgeta; hemia long Hamilton, oli stap mekem bakegen, mo oli stap wet yet blong brekem graon blong tempol long Oklan. Be, mi bin filim blong leftemap tingting blong olgeta blong riniu mo kasem ol tempol rekomen.

Iven we oli no save soem rekomen long tempol, bae oli presentem olgeta long fes blong Lod we oli klin gud mo oli rere blong wok blong Hem. Blong stap klin inaf blong holem wan tempol rekomen we i laef i stap, hem i tugeta: wan proteksen agensem enemi, from se yu mekem strong komitmen long Lod abaot laef blong yu, mo wan promes se Spirit bae i stap wetem yu.

Yumi mekem tempol wok taem we yumi stap lukaotem ol bubu blong yumi mo sendem nem blong olgeta i go blong oli mekem odinens blong olgeta. I nomata se ol tempol blong yumi oli bin klos, yumi save lukaotem ol famli blong yumi yet. Wetem Spirit blong God insaed long hat blong yumi, tru long proksi, yumi stanap long bihaf blong olgeta “blong oli givim nem [blong olgeta] i go long Lod.”

Taem we mi bin stap olsem Eksekutiv Daerekta blong Tempol Dipatmen, plante taem mi bin harem Presiden Gordon B. Hinckley i tokbaot skripja ia we Lod i talem long Nauvu Tempol: “Bae wok blong tempol blong mi, mo evri wok we mi bin givim long yufala, bae i mas gohed mo i no mas stop; mo fasin blong yufala blong wok strong wetem strong tingting, mo fasin blong yufala blong stap gohed blong wok, mo fasin blong yufala blong save wet longtaem, mo ol wok blong yufala, bae oli mas dabol, mo bae yufala i no save lusum pei blong yufala nating, mi, Lod blong Ol Pipol mi talem.”¹²

Wok blong yumi insaed long tempol i fas long praes blong yumi long taem we i no save finis. I no longtaem i pas, oli bin testem yumi. Lod i bin singaotem yumi blong wok insaed long ol tempol wetem “fasin … blong wok strong wetem strong tingting, mo … blong stap gohed blong wok, mo fasin blong … save wet longtaem.”¹³ Blong oli “givim nem [blong yumi] i go long Lod” i nidim blong yumi gat ol kwaliti ia. Yumi mas wok wetem strong tingting blong stap laef folem ol komanmen, blong gohed strong lukluk gud long ol tempol kavenan blong yumi, mo talem tangkyu from wanem we Lod i stap gohed blong tijim yumi abaot olgeta, mo wet longtaem taem yumi wet blong ol tempol oli open bakegen fulwan.

Taem we Lod i singaotem yumi blong “dabolem” ol hadwok blong yumi, Hem i stap askem yumi blong kam antap long stret mo gud fasin blong yumi. Eksampol, yumi save mekem moa long stadi blong ol skripja, wok blong lukaotem famli histri, mo mekem moa prea blong fet blong yumi save serem lav we yumi gat long haos ia blong Lod wetem olgeta we oli stap mekem olgeta oli rere blong kasem wan tempol rekomen, speseli ol memba blong famli blong yumi.

Mi promesem yufala, olsem wan Aposol blong Lod Jisas Kraes, se taem yufala i stap traehad blong dabolem ol stret mo gud wok blong yufala, bambae yufala i filim wan niu bigfala komitmen long God we i Papa, mo Jisas Kraes, bambae yufala i filim Tabu Spirit i bigwan moa we i stap soem rod long yufala, bae yufala i talem tangkyu from ol tabu kavenan blong yufala, mo bae yufala i filim pis blong save se oli “givim nem [blong yufala] long Lod.” Long nem blong Jisas Kraes, amen.