Bae Yumi Testem Olgeta long Wei Ia

Blong moa long 20 yia bifo oli singaotem mi fultaem long seves blong Jos, mi bin wok olsem wan yunivesiti tija mo administreta. Fasfala responsabiliti blong mi olsem wan tija i blong helpem ol studen blong lanem olsem wanem blong oli lanem samting olgetawan. Mo wan stamba pat blong wok blong mi, i blong krietem tes, makem tes mo givim fidbak abaot hamas wan studen i mekem long ol tes. Olsem we yufala i save aot long eksperiens blong yufalawan, !ol tes oli no pat ia blong lanem samting we ol studen oli laekem tumas!

Be ol tes we oli kamaot oltaem, i nid blong hapen blong lanem samting. Wan tes we i wok gud bae i helpem yumi blong komperem wanem we yumi nid blong save wetem wanem we yumi rili save abaot wan spesifik topik; mo tu, i givim wan standet we i stap we yumi save makem hamas yumi lanem mo develop.

Semmak, ol tes insaed long skul blong laef blong wol ia oli ol impoten pat blong progres blong yumi from taem ia we i no save finis. I gud blong luk se, toktok ia, tes, oli no save faenem wan taem long toktok blong skripja insaed long Ol Tabu Standet Buk, hemia long Inglis lanwis. Be, i gat ol nara toktok olsem makem, lukluk, mo traem we oli yusum blong tokbaot ol defren paten blong stap soemaot stret save blong yumi long saed blong spirit abaot hamas yumi andastanem, mo hamas yumi givim yumi long plan blong hapines we i no save finis blong Papa long Heven, mo hamas paoa yumi gat blong stap lukaotem ol blesing blong Atonmen blong Sevya.

Hem we i mekem plan ia blong fasin blong sevem man, i tokbaot stret stamba tingting blong taem blong tes long wol ia, mo i yusum ol toktok ia, makem, lukluk, mo traem long ol skripja blong bifo mo tedei. “Mo bae yumi testem olgeta long wei ia, blong luk sapos bae oli mekem evri samting we Lod, God blong olgeta bae i givim oda long olgeta.”¹

Tingting long prea ia we i kam long Deved we i raetem Ol Sam:

“Plis yu lukluk long laef blong mi, blong faenemaot se mi mi wanem man, mo yu skelem olgeta tingting blong mi.

“Fasin ya blong yu we oltaem yu stap lavem man tumas, hem nao i stap lidim mi. Fasin ya we tingting blong yu i stap strong long man, hem nao i stap soemaot rod long mi.”²

Mo Lod i talemaot long 1833: “From hemia, no fraet long enemi blong yufala, from we mi bin talem wetem atoriti long hat blong mi, Lod i talem, se bambae mi testem yufala long evri samting, blong luk sapos bae yufala i stap folem kavenan blong mi, i go kasem ded, blong mi save faenem yufala i klin inaf.”³

Yia 2020, yumi makem, long sam pat blong hem, wetem wan wol sik we i bin makem, skelem, mo traem yumi long plante wei. Mi prea se, olsem wanwan man, woman mo famli, yumi stap lanem ol impoten lesen we ol eksperiens we i gat jalenj nomo oli save tijim long yumi. Mi hop tu se yumi evriwan i luksave moa “ol bigfala samting blong God” mo trutok ia se bambae “hem i konsekretem ol hadtaem blong [yumi] blong oli kam wan blesing blong [yumi].”⁴

Tufala besik prinsipol i save lidim yumi mo mekem yumi kam strong moa taem yumi stap fesem ol situesen we oli makem mo traem yumi long laef, i nomata se oli wanem: (1) prinsipol blong stap rere, mo namba (2), prinsipol blong wokbaot i go wetem strong bilif long Kraes.

Olsem ol disaepol blong Sevya, yumi gat komanmen ia blong “rere long evri samting we i nid; mo stanemap wan haos, we i wan haos blong prea, wan haos blong livim kakae, wan haos blong fet, wan haos blong lanem samting, wan haos blong glori, wan haos blong oda, wan haos blong God.”⁵

Yumi gat promes tu se: “sapos yufala i rere, bae yufala i no fraet.

“Mo blong yufala i ronwe long paoa blong enemi, mo kam wanples, long mi, olsem wan pipol we i stret mo gud, we i no gat mak mo i no gat rong.”⁶

Ol skripja oli givim ol stret baondri blong stap oganaesem mo stap rere laef blong yumi mo hom blong yumi, tugeta, long saed blong laef long wol ia, mo long saed blong spirit. Ol hadwok blong yumi blong stap rere from ol eksperiens blong tes ia long laef long wol ia, i mas folem eksampol blong Sevya, we sloslo, “i stap groap moa long bodi blong hem mo long waes blong hem tu. Mo oltaem God i glad tumas long hem, mo ol man tu oli glad tumas long hem”⁷—wan miks balens blong stap rere long saed blong waes, bodi, spirit mo sosol laef.

Long wan aftenun, sam manis i pas, Susan mo mi i mekem lis blong storej blong kaekae mo ol imejensi saplae. Long tetaem ia, KOVID 19 i stap go raon kwik, mo plante graon i seksek i kasem hom blong mifala long Yuta. Mifala i bin wok stat long ol fas dei blong mared blong mifala blong folem kaonsel blong profet long saed blong stap rere from sam jalenj we yumi no luk, mo long wei ia mitufala i stap “skelem” se mitufala i rere o no long medel blong vaeres ia mo ol etkwek, mo i bin wan gud taem blong mekem hemia. Mitufala i wantem faenemaot mak blong mitufala long tes ia we i no gat woning from.

Mitufala i lanem fulap samting. Long plante eria, wok blong rere i bin stret nomo. Long sam nara eria, mitufala i mas kam antap from se mitufala i no bin luksave mo lukluk samfala nid ia long stret taem.

Mitufala i laf bigwan tu. Mitufala i faenemaot, eksampol, se sam samting insaed long wan kabod ia blong kipim kaekae, oli stap ia ova ten yia finis. !Mi talem stret, mitufala i fraet blong openem mo lukluk insaed long samfala kontena ia from mitufala i fraet se bae mitufala i openem rod blong sam nara wol sik bakegen! Be yufala i mas hapi blong save se mitufala i sakemaot ol samting ia long wan stret fasin, mo bae wol i no safa from.

Sam memba blong Jos oli talem tingting blong ol se ol imejensi plan, mo ol saplae, mo kipim kaekae, mo ol 72 aoa kit, ating oli nomo impoten from se Ol Brata Lida oli no tokbaot hemia tumas naoia abaot ol topik ia mo ol nara topik we oli go wetem, long taem blong jeneral konfrens. Be i gat plante strong toktok blong singaotem yufala blong rere we ol lida blong Jos oli bin stap talemaot blong plante yia i kam finis. Be ol kaonsel blong ol profet we oli bin kamaot ova long taem we i pas oli givim wan strong konset we i klia, mo wan woning we i laod i bitim wan man we i singsing.

Semmak olsem ol taem blong jalenj oli soemaot ol samting we yumi no strong long hem long fasin blong yumi rere long laef ia, semmak, ol sik blong mekem samting long spirit wanwan taem mo fasin blong no lukaot tumas bae i mekem samting i kam nogud long taem blong ol tes. Eksampol: yumi lanem long parabol blong ol ten yang gel se fasin blong pusumbak taem blong rere i lidim yumi blong no save makem gud yumi. Tingbaot olsem wanem ol faef yang gel we oli no waes oli no bin rere gud from tes ia we oli bin givim long olgeta long dei ia we Man Ia we Bae I Mared.

“Ol faef ya we oli no waes, oli tekem laet blong olgeta, be oli no tekem sam moa karsin wetem olgeta.

“Be olgeta faef ia we oli waes, oli tekem sam botel karsin wetem laet blong olgeta.

“Be long medel naet, wan man i singaot se, ‘!Man ya we i jes mared, bambae i kamtru naoia! !Yufala i kam mitim hem!’

“Nao ol ten gel ya oli wekap, oli klinim ol laet blong olgeta.

“Nao olgeta ya we oli no waes, oli talem long olgeta se, ‘Plis yufala i givim sam karsin long mifala, from we ol laet blong mifala oli emti, klosap oli ded.

“Be olgeta ya we oli waes oli se, ‘No. Karsin ya i no naf blong yumi evriwan. Yufala i mas go long stoa blong pem blong yufala.

“Nao oli go pem karsin blong olgeta. Bae taem oli stap longwe yet, man ia we i jes mared i kamtru. Hem i go insaed long haos blong hem, mo ol faef gel ia we oli rere long hem oli go wetem hem oli joen long kakae blong mared. Nao ol man oli satem doa.

“Biaen ol narafala gel ya oli kambak bakegen, oli singaot se, ‘!Masta, Masta! !Plis yu letem mifala i kam insaed!”⁸

“Be man we i jes mared, i se, ‘Tru mi talem long yufala, mi mi no save yufala.’”⁹

Long tes ia, ol faef yang gel we oli no waes, oli makem olgeta se oli save lisin nomo, be oli no save mekem folem toktok.¹⁰

Mi mi gat wan fren we i wan strong studen long loa skul. Long taem blong kos long wan semesta, Sam i putum taem evri dei blong luklukbak, raetemsot, mo lanem samting aot long not blong hem, hemia long wanwan kos we hem i tekem. Hem i folem sem paten ia blong evriwan long ol klas blong hem long en blong evri wik mo evri manis. Teknik blong hem ia i mekem se hem i bin lanem loa, be i no lanem ol ditel nomo baehat. Long taem blong las eksam, Sam i bin rere. Yes, hem i faenem se las eksam ia, i wan long ol taem we tingting blong hem i no fasfas nating, insaed long loa trening blong hem. Fasin blong rere we i wok gud mo i folem taem, i kam fastaem long eni taem blong pruvum mo makem yu.

Teknik blong Sam long saed blong edukesen blong hem long saed blong loa, i wan long ol fasfala paten blong Lod blong stap gro mo stap develop. “From luk, olsem ia nao Lod God i talem: ‘Bae mi givim long ol pikinini blong ol man tijing folem tijing, rul folem rul, smol long ples ia mo smol longwe; mo oli kasem blesing, olgeta ia we oli lisin long ol rul blong mi, mo oli lisin long ol advaes blong mi, from bae oli lanem waes tingting; from long hem we i kasem bae mi givim moa.”¹¹

Mi stap invaetem wanwan long yumi blong “traem luklukgud long laef blong [yumi],”¹² blong “faenemaot se [yumi] stap holem yet fasin blong bilif, no yufala i no moa holem.”¹³ ?Wanem nao yumi bin lanem long ol las manis blong stretem laef mo holemtaet yumi long ol samting? ?Wanem nao yumi nid blong kam antap long hem long laef blong yumi long saed blong spirit, bodi, sosol laef, filing, mo waes? Naoia i taem blong rere mo soemaot se yumi wantem mo save mekem evri samting, mo eni samting we Lod God blong yumi bae i givim oda long yumi blong mekem.

Long wan taem, mi bin go long fenerol blong wan yang misinari we i bin ded long wan aksiden. Papa blong misinari ia i bin toktok long fenerol seves, mo i tokbaot we hat blong hem i soa from hem i seperet kwiktaem long wan pikinini we hem i lavem. Hem i talem stret se, hemwan, hem i no andastanem ol risen, o taem blong wan samting olsem i hapen. Be mi tingbaot yet se, gudfala man ia, i bin talem se hem i bin save se God i bin save ol risen mo taem blong pikinini blong hem i ded—mo hemia i gud inaf long hem. Hem i talem long kongregesen se hem mo famli blong hem, i nomata se oli harem nogud tumas, bae oli oraet; se testemoni blong olgeta i stap strong mo i no muv. Hem i endem toktok blong hem wetem toktok ia: “Mi wantem yufala i save se, long saed blong gospel blong Jisas Kraes, famli blong mifala i stap fulwan insaed long hem. Yumi evriwan i stap insaed long hem.”

I nomata se from oli lusum wan, i brekem hat bigwan mo i had, ol memba blong strong famli ia, long saed blong spirit, oli bin rere blong soemaot se oli save lanem ol lesen we oli impoten long taem we i no save finis, hemia tru long ol samting we oli bin safa long hem.¹⁴

Fasin blong stap fetful i no blong no gat waes, o fasin blong stap krangke. Hem i blong trastem mo putum tras blong yumi long Jisas Kraes olsem Sevya blong yumi, tras long nem blong Hem mo long ol promes blong Hem. Taem we yumi “wokbaot i go wetem strong bilif long Kraes, wetem wan stret mo klin hop, mo wan lav long God mo long evri man,”¹⁵ yumi gat blesing ia blong gat wan lukluk i go long taem we i no save finis, mo gat wan visen we i go i bitim limit blong paoa blong yumi long wol ia. Bambae yumi save “kam tugeta wan ples”¹⁶ mo “no mas muv, kasem dei blong Lod i kam.”¹⁷

Taem mi bin stap olsem Presiden blong Brigham Yang Yunivesiti—Aedaho, Elda Jeffrey R. Holland i bin kam long skul long Disemba 1998 blong toktok long wan long ol wik divosen. Susan mo mi i bin invaetem wan grup blong ol studen blong mit mo toktok wetem Elda Holland bifo hem i givim mesej blong hem. Taem we taem blong mifala i kam long en blong hem, mi bin askem Elda Holland: “Sapos yu gat janis blong tijim wan samting nomo long ol studen ia, ?Wanem nao bae yu tijim?

Hem i ansarem:

“Yumi stap witnesem wan bigfala muv we i stap hapen, we i fasin blong jusum saed we yumi stanap long hem. Bae oli karemaot long yumi, ol Lata-dei Sent, janis ia blong stap long medel. Medel rod ia, bae i go lus.

“Sapos yu stap flot long wota i folem taed blong wan reva, bae yu go samples. Bae yu go nomo long ples we taed ia i pulum yu i go long hem. Blong folem bigfala wota, blong folem taed, blong glis i go wetem taed, bae i no ansa.

“Yumi mas mekem joes. Blong no mekem wan joes, hem i wan joes finis. Lanem blong mekem joes naoia.”

Toktok blong Elda Holland abaot fasin we i stap kam antap blong jusum saed, i tok blong wan profet mo ol fasin blong sosaeti mo ol samting we oli bin hapen long ol las 22 yia i pruvum hemia stat long taem hem i ansarem kwestin blong mi. Hem i bin talemaot finis bigfala hol we bae i stap bitwin ol wei blong Lod, mo blong wol; Elda Holland i bin givim woning se ol dei ia we yumi stap isi nomo wetem wan leg insaed long Jos we i kambak, mo wan leg long wol, ol dei ia oli stap lus kwiktaem. Wokman ia blong Lod i bin stap leftemap tingting blong ol yang pipol blong oli jusum, oli rere, oli kam ol strong disaepol blong Sevya. Hem i bin stap helpem olgeta blong rere mo muv fored tru long ol eksperiens we i makem, lukluk, mo traem olgeta, long laef blong olgeta.

Rod ia blong yumi pruvum o makem yumiwan, i wan impoten pat blong bigfala plan blong hapines blong Papa long Heven. Mi promes se, taem we tugeta, yumi stap rere mo muv i go fored wetem fet long Sevya, bae yumi evriwan i save kasem sem mak long las tes o eksam blong laef long wol ia: “!Ei, yu yu mekem wan gudfala wok! Yu yu wan gudfala man we yu lukaot gud long ol wok blong mi. From we yu bin lukaot gud long smol bisnis ya we mi putum long han blong yu, bambae mi putumap yu blong yu lukaot long plante bisnis. Yu kam joen long lafet blong mi.”¹⁸

Mi witnes se God Papa we I No Save Finis i Papa blong yumi. Jisas Kraes i Wan Stret Pikinini Ia Nomo blong Hem we i laef i stap, we i Sevya mo Ridima blong yumi. Abaot ol trutok ia, mi testifae olsem long tabu nem blong Lod Jisas Kraes, amen.