Stap Kam olsem Hem
Tru nomo long tabu help blong Sevya bae yumi evriwan i save progres blong kam olsem Hem.
Iven long wan man we i stadi gud long laef mo seves blong Jisas Kraes, komanmen blong Sevya we i blong kam “olsem we mi stap”1 i had, mo luk olsem se man i no save kasem. Ating yu olsem mi—yu save gud ol wiknes mo rong blong yu, afta yu save tingting se i oraet blong stap laef long wan wei we i no nidim blong stap gro o kam antap from i gud nomo . “I tru, tijing ia i no stret mo man i no mas tekem i series,” eskius ia nao yumi jusum blong tekem rod we i no gat tumas ston, mekem se yumi no hadwok blong jenis tumas.
?Be wanem sapos blong stap kam “olsem we [Hem i stap] ” i no wan simbol , iven we bae bodi blong yumi i save ded samtaem? ?Wanem sapos i posibol, long sam wei, blong yumi save kasem mak ia long laef ia, from we i nid blong kasem bifo yumi stap wetem Hem bakegen? ?Wanem sapos “olsem we Mi stap” i stret mo stret toktok ia nao we Sevya i stap minim? ?Afta wanem? ?Wanem mak blong hadwok bae yumi wantem blong givim blong invaetem merikel paoa blong Hem insaed long laef blong yumi mekem se yumi save jenisim ol fasin blong yumi?
Elda Neal A. Maxwell i tijim: “Taem yumi tingting hevi long toktok ia we i kam long Jisas blong stap kam olsem Hem, yumi save luksave se situesen blong laef blong yumi i wan we, i no se i nogud, be i wan situesen we yumi putum haf hat blong yumi long hem mekem se yumi no strong blong mekem wok blong Hem—!we i wok blong yumi tu! Yumi talem nomo, be yumi not stap traehad blong kam olsem Hem.”2 Wan yangfala man blong jos, Charles M. Sheldon, i serem tingting mo filing blong hem long semmak wei: “Kristin bilif blong yumi i laekem tumas ol samting blong stap isi mo i no strong, mo i no wantem blong tekem eni samting we i rafraf mo hevi olsem wan kros.”3
I tru, yumi evriwan i stap anda long oda ia blong kam olsem Hem, i olsem we Jisas Kraes i bin kam olsem Papa.4 Taem yumi stap progres, yumi kam moa komplit, moa gud, mo develop fulwan.5 Tijing olsem i no kam long ol doktrin blong wan jos o bilif blong eniwan, be i kam stret long Masta Hemwan. Hem i tru long wei ia we man i save lukluk long olsem wanem hem i mas mekem folem komanmen ia tru long wei blong toktok mo blong developem rilesensip wetem ol narafala man. I tru, i nomo gat wan nara wei blong hilim ol rilesensip we i brokbrok o blong wan sosaeti we i seraot, be blong wanwan long yumi blong traehad nomo blong kam moa olsem Prins ia blong Pis.6
Bae yumi tingting olsem wanem blong statem wan gudfala tingting, blong jusum gud samting blong mekem, mo mekem plan blong lukaotem blong kam olsem Hem tru ol fasin olsem hemia blong Jisas Kraes.
Disaed mo Mekem
Sam yia i pas, waef blong mi mo mi i stanap long ples we rod blong longfala maonten ia Fuji i stat long hem, long Japan. Taem mitufala stat blong klaem, mitufala lukluk i go antap long top blong maonten mo askem mitufalawan sapos bae mitufala save kasem ples ia.
Taem mitufala stap gohed, mitufala taet plante, ol masel oli soa, mo paoa blong go moa i stap godaon. Long tingting blong mitufala, i moa impoten blong mitufala i lukluk nomo long nekis step. Bae mitufala i talem: “Bae mi no save mekem yet blong kasem top, be mi save mekem nekis step naoia.” Wetem taem, wokbaot ia we i had, long en bae i posibol blong kasem—step folem step.
Fas step blong rod ia blong stap kam olsem Jisas Kraes i blong gat wan hat we i wantem blong mekem. Blong save komanmen ia blong kam olsem Hem i gud, be save ia i nidim blong joen tugeta wetem wan strong tingting long hat blong jenisim yumi wanwan, wan step long wan taem, bitim blong stap man we i folem fasin blong wol.7 Blong developem fasin ia, yumi mas save huia i Jisas Kraes. Yumi mas save ol fasin blong Hem8 mo yumi mas lukaotem ol fasin blong Hem insaed long ol skripja, ol seves blong wosip mo ol narafala tabu ples. Taem yumi kam blong save moa abaot Hem, bae yumi luk ol fasin blong Hem tru long ol narafala man. Hemia bae i leftemap tingting blong yumi long wanem we yumi wantem kasem, from se sapos ol narawan oli save kasem, long sam wei, ol fasin ia blong Hem, yumi tu, yumi save kasem.
Sapos yumi stap ones wetem yumiwan, Laet blong Kraes9 we i stap insaed long yumi bae i soem se yumi no gat wan fasin olsem hemia blong Kraes yet komperem wetem wanem fasin we Sevya i wantem long yumi blong kasem.10 Fasin blong stap ones i impoten tumas sapos yumi wantem progres blong kam olsem Hem. I tru, fasin blong stap ones i wan long ol fasin blong Hem.
Nao sam long yumi we oli no gat fraet, maet oli save tingting blong askem wan famli memba we oli trastem, waef o hasban, fren, wan lida blong jos, blong talem long yumi wanem fasin blong Kraes yumi nidim—!mo yumi mas rere blong akseptem wanem ansa bae yumi harem we i kam long olgeta! Samtaem yumi lukluk yumiwan insaed long ol mira we oli soem yumi se yumi raon moa, yumi bunbun moa bitim we yumi rili stap.
Ol fren mo famli we yumi trastem oli save helpem yumi blong luk yumiwan long wan wei we i moa stret, be iven olgeta ia, we oli gat lav mo wantem blong help plante olsem we oli stap mekem, oli save lukluk samting long wan wei we i no stret. Olsem wan risal, hem i impoten se yumi mas askem Papa blong yumi long Heven we i gat bigfala lav long wanem we yumi nidim mo weaples yumi mas lukluk moa blong hadwok long hem. Hem i andastanem yumi fulwan mo bae Hem i soem wetem lav long yumi, ol wiknes blong yumi.11 Ating bae yu lanem se yu nidim blong gat bigfala fasin blong save wet longtaem, fasin blong putum tingting i stap daon, gat jariti, lav, hop, fasin blong wokhad oltaem wetem strong tingting o stap obei mo, i go moa.12
I no longtaem i pas, mi bin gat wan eksperiens we i lukluk long sol blong mi, taem wan lida blong Jos we i gat bigfala lav i bin tok stret long mi mo talem se mi sapos blong yusum wan fasin, i moa. Hem i no tantanem trutok from se hem i mekem wetem fasin blong lav. Long naet ia, mi serem eksperiens ia wetem waef blong mi. Hem i gat bigfala sore mo bigfala hat blong lisin, iven taem hem agri long tingting blong lida ia. Tabu Spirit i konfemem hemia long mi se kaonsel blong olgeta i kam long Papa long Heven we i gat bigfala lav.
Bae i save help tu blong finisim aktiviti blong ol fasin olsem hemia blong Kraes long japta 6 blong Prijim Gospel Blong Mi13
Taem yu mekem wan ones asesmen mo disaed blong klaem i go antap long maonten, bae yu nidim blong sakem sin. Presiden Russell M. Nelson i bin tijim wetem lav: “Taem yumi jusum blong sakem sin, !yumi jusum blong jenis! Yumi letem Sevya i jenisim yumi i kam wan moa gud vesen blong yumiwan. Yumi jusum blong gro long saed blong spirit mo blong kasem glad—glad ia blong fasin blong pemaot man, tru long Hem. Taem yumi jusum blong sakem sin, !yumi jusum blong kam moa olsem Jisas Kraes!”14
Blong kam olsem Jisas Kraes i nidim blong hat mo maen blong yumi i jenis, yes, fasin blong yumi stret, mo blong mekem hemia, hem i posibol nomo tru long gladhat blong Jisas Kraes blong wantem sevem man.15
Faenemaot mo Tekem Aksen
Naoia we yu save disaed blong jenis mo sakem sin mo bin lukaotem help tru fasin blong stap prea, tingting hevi wetem ones fasin, mo sapos i posibol, kaonsel wetem ol narawan, bae yu nidim blong jusum wan fasin we bae yu wantem blong lukluk nomo long hem. Bae yu nidim blong mekem ol samting ia mo hadwok tru. Ol fasin ia oli no save kam isi mo kwiktaem, be tru long gladhat blong Hem bae oli kam long taem we yumi stap traehad blong kasem.
Ol fasin olsem hemia blong Kraes, oli ol presen we oli kam long wan Papa long Heven we i gat bigfala lav blong blesem yumi mo olgeta we oli stap raon long yumi. Folem hemia, ol hadwok blong yumi blong kasem ol fasin ia, bae i nidim ol prea we oli kam long wan tru hat blong kasem tabu help blong Hem. Sapos yumi lukaotem ol presen ia blong givim moa gud seves long ol narawan, Hem bae i blesem yumi long ol hadwok blong yumi. Blong lukaotem wan presen long God long wan selfis fasin bae i mekem yumi harem nogud mo save kros.
Blong stap lukluk nomo bigwan long wan fasin we yu nidim, taem yu progres blong kasem fasin ia, ol narafala fasin bae oli stat blong kam long yu. ?Wan man we i stap lukluk nomo bigwan long jariti bae i save kam antap long lav mo fasin blong putum tingting i stap daon? ?Wan man we i stap lukluk nomo long fasin blong stap obei bae i save kasem fasin blong wok had oltaem wetem strong tingting mo gat hop? Ol bigfala hadwok blong yu blong kasem wan fasin bae i kam wan wef we bae i leftemap evri bot long haba.
Raetemdaon mo Sapotem
Hem i impoten long mi taem mi stap traehad blong kam olsem Hem blong raetemdaon eksperiens blong mi, mo wanem we mi stap lanem. Taem mi stap stadi bigwan long wan fasin blong Hem insaed long maen blong mi, ol skripja oli kam niu taem mi luk ol eksampol blong ol fasin blong Hem long ol tijing blong Hem, seves blong Hem, mo ol disaepol blong Hem. Ae blong mi tu i kam blong lukluk nomo blong stap luksave ol fasin blong Kraes long ol narafala man. Mi bin stap wajem ol naesfala fasin blong sam pipol, insaed mo aotsaed long Jos, we oli stap traehad blong kam olsem Hem. Oli ol eksampol we oli gat bigfala paoa long olsem wanem ol fasin ia, we oli man long wol ia oli gat, oli save kamaot tru long glad hat mo bigfala lav blong Hem.
Blong save luk tru progres, bae yu nidim blong praktisim mo gohed blong wokhad oltaem. Semmak olsem blong klaem wan maonten i nidim blong rere bifo mo gat fasin blong stap strong kasem en, fasin blong no givap long taem blong klaem, mekem se wokbaot ia tu bae i nidim tru hadwok mo sakrifaes. Tru Kristin fasin, we yumi yusum blong traehad blong kam olsem Masta blong yumi, i oltaem nidim hadwok wetem ful paoa blong yumi.16
Naoia wan sot toktok blong woning. Komanmen ia blong kam olsem Hem i no blong wantem mekem yu filim sem, no klin inaf, o no gat wan i lavem yu. Ful eksperiens blong yumi long wol ia i abaot fasin blong progres, traehad, mekem ol mistek, mo blong stap winim samting. Olsem we mi mo waef blong i bin wantem se bae mitufala save sarem ae blong mitufala mo kasem top blong maonten long wan majik wei, hemia i no wanem we laef i minim.
Yu yu gud inaf, oli lavem yu, be hemia i no minim se yu fulwan finis. I gat wok blong mekem long laef ia mo long nekis laef. Tru nomo long tabu help blong Hem bae yumi evriwan i save progres blong kam olsem Hem.
Long ol taem ia taem we “evri samting bambae oli muvmuv olbaot; mo … fraet bae i kam long evri pipol,”17 meresin ia nomo, mo tritmen ia nomo blong winim i blong traehad blong kam olsem Sevya,18 Ridima19 blong evri kaen man, Laet blong Wol,20 mo blong lukaotem Hem we i bin talemaot: “Mi nao rod ya.”21
Mi save se blong kam olsem Hem tru long tabu help mo paoa blong Hem, hem i posibol blong kasem, step folem step. Sapos no, Hem bae i no save givim komanmen ia long yumi.22 Mi save hemia—from we mi luk ol fasin blong Hem tru long plante long yufala. Abaot ol samting ia, mi testifae long nem blong Jisas Kraes, amen.