Hiling Paoa blong Jisas Kraes

Stat long stat blong yia ia kasem naoia, yumi gotru samfala taem we yumi no bin ting se bae i kam. Yumi lusum plante laef mo salari folem bigfala wol sik ia we i tajem komuniti mo ekonomi blong wol.

Ol etkwek, ol faea, mo ol wota oli kam antap long ol defren pat blong wol, mo tu, ol nara disasta we weta i mekem, oli mekem ol pipol oli filim se i nomo gat help, no gat hop, mo hat i brok, mekem oli stap askem olgetawan sapos laef blong ol bae i semmak olsem bifo bakegen.

Letem mi talem wan stori blong miwan abaot hat we i brokbrok.

Taem ol pikinini blong mi oli yang, oli disaed se oli wantem tekem klas blong piano. Man blong mi, Rudi, mo mi, i wantem blong givim janis ia long ol pikinini blong mitufala, be mifala i no gat piano. Mifala i no save pem wan niu piano, mekem se Rudi i stat blong lukaot wan we oli yusum finis.

Long Krismes long semfala yia, hem i sapraesem mifala wetem wan piano, mo long ol yia we i folem, ol pikinini blong mitufala oli lanem blong plei.

Taem ol boe blong mitufala oli bigwan mo lego haos, olfala piano ia i stap karem das nomo mekem se mifala i salemaot. Samfala yia i pas, mo mifala i bin save sevem smol mane. Wan dei Rudi i talem se: “Mi ting se hem i taem blong yumitu tekem wan niu piano.”

Mi askem: “From wanem nao bae yumitu karem wan niu piano we i no gat wan long yumitu i save plei?”

Hem i talem se: “!O, be yumitu save karem wan piano we i save plei hemwan! Wetem wan iPad, yu save setemap piano blong plei ova long 4,000 singsing, hemia i tekem tu ol hym, ol singsing blong Tabenakol Kwaea, evri Praemeri singsing mo plante moa.”

Rudi i wan gudfala man blong salem samting.

Mitufala i pem wan naesfala niu piano mo sam dei i pas, tu bigfala strong man oli kam putum piano long haos.

Mi soem long olgeta ples we mi wantem i stap long hem mo muvaot long rod blong tufala.

Hem i wan bigfala hevi piano, mo blong mekem se i save go tru long doa, tufala i karemaot ol leg blong hem mo mekem i ledaon long saed insaed long han trak we tufala i tekem wetem tufala.

Haos blong mifala i stap antap lelebet long wan smol hil, mo i bin stap sno smol finis long dei ia mekem se evri samting i wetwet mo glis. ?Yufala i save luk smol finis olsem wanem ol samting i stap hapen?

Taem tufala i stap muvum piano i go antap long smol hil ia, hem i glis, mo mi harem bigfala noes blong hem we i brok. Piano ia i foldaon i kamaot long han trak ia mo bang strong long graon we i lego wan hol long gras.

Mi se: “E sore. ?Yufala i oraet?”

Tangkyu we tufala man ia i oraet.

Ae blong tufala i bigbigwan long tufala, afta tufala luk mi mo talem, “Mifala i sore. Bae mifala i tekem i gobak long stoa mo maneja blong mifala bae i ringim yu.”

I no longtaem, maneja i stap toktok long Rudi abaot rod blong putum wan niu piano. Rudi hem i gud mo gat fogivnes, mo hem i talem long maneja se hem i oraet sapos oli go fiksim damej ia nomo mo karem i kambak, be maneja i strong se bae oli karem wan niuwan.

Rudi i ansa se: “Hem i no damej tumas ia. Yufala fiksim nomo afta tekem i kambak.”

Maneja i talem se: “Wud i brokbrok mo taem wud i brokbrok, bae saon blong hem i nomo semmak. Bae mifala i karem wan niu piano.”

Ol sista mo brata. ?Yumi no semmak olsem piano ia, we yumi brok smol, yumi damej, mo filim olsem se bae yumi neva semmak bakegen? Taem yumi kam long Jisas Kraes, praktisim fet long Hem, sakem sin, mo mekem mo kipim ol kavenan, ol hat ia we oli brokbrok—i nomata wanem i mekem i brokbrok—Hem i save hilim. Fasin ia, blong invaetem hiling paoa blong Sevya long laef blong yumi, i no mekem yumi kambak olsem we yumi bin stap bifo, be i mekem yumi kam gud moa bitim bifo. Mi save se tru long Sevya, Jisas Kraes, yumi evriwan i save kam stret, kam fulwan mo saon naes olsem wan niufala piano.

Presiden Russel M. Nelson i bin tijim: “Taem ol rabis trabol i kam long yumi, hem i taem blong mekem fet blong yumi i kam strong moa long God, blong wok had, mo blong givim seves long ol narawan. Mo afta, bae Hem i hilim ol brokbrok hat blong yumi. Hem bae i putum pis mo kamfot long yumi wanwan. Olgeta bigfala presen ia bae oli no save prapa spolem gud, iven kasem ded.”¹

Jisas i talem:

“Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud.

“Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala.

“Yufala i mas mekem olsem, from we yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi” (Matiu 11:28–30

Blong hilim hat we i brokbrok taem yumi kam long Hem, yumi nid blong gat fet long Jisas Kraes. “Blong gat fet long Jisas Kraes i minim se yumi mas trastem Hem fulwan —trastem paoa … mo lav blong Hem we i no save finis. Hemia i minim tu blong biliv long ol tijing blong Hem. I minim se, yumi biliv nomata yumi no andastanem evri samting, Hem i save. From we Hem i bin gotru ol soa blong bodi, hadtaem mo ol samting we oli no strong, Hem i save olsem wanem blong helpem yumi blong girap aot long ol evri dei jalenj blong yumi.”²

Taem yumi kam long Hem ”yumi save fulap wetem glad, pis mo plante help. Evri samting we i [had mo gat jalenj] abaot laef i save kam raet tru long Atonmen blong Jisas Kraes.”³ Hem i givim kaonsel long yumi blong, “Lukluk long mi long evri tingting blong [yu]; no gat tu tingting, no fraet.” (Doktrin mo Ol Kavenan 6:36).

Insaed long Buk blong Momon, long taem ia we kolosap ol hevi trabol blong Alma mo ol pipol blong hem i smasem olgeta, ol pipol ia oli krae from help. Lod i no bin tekem ol hevi trabol aot long olgeta; be Hem i bin promesem olgeta:

“Mo tu, bae mi mekem ol hevi samting long solda blong yufala i nomo hevi, mekem se bae yufala i no save filim long ol bak blong yufala, mo tu, long taem ia we yufala i stap olsem slef; mo hemia bae mi mekem, blong mekem se yufala i save stanap olsem ol witnes blong mi long fiuja, mo blong mekem se yufala i save gud se mi, Lod God, mi visitim ol pipol blong mi long ol hadtaem blong olgeta.

“Mo nao i bin hapen se ol hevi samting we oli bin putum long Alma mo ol brata blong hem i nomo hevi; yes, Lod i bin mekem olgeta i kam strong blong mekem se oli save karem ol hevi samting blong olgeta isi nomo, mo oli bin stap andanit wetem bigfala glad mo fasin blong save wet longtaem long evri wok blong Lod” (Mosaea 24:14–15).

Aot long paoa blong Sevya blong hilim mo mekem ol hevi trabol i kam isi, Elda Tad R. Callister i bin tijim se:

“Wan long olgeta blesing blong Atonmen hem we yumi save kasem ol paoa blong help long Sevya. Aesea i bin tokbaot plante taem abaot hiling paoa mo paoa blong putum pis blong Lod. Hem i testifae se ‘ol man we oli no gat paoa oli stap ronwe blong kam haed long (Sevya), mo sapos oli trabol bambae oli save stap gud long (Hem). Mo sapos i gat badtaem, be (Hem i) save blokem gud olgeta, mo sapos i gat bigsan, be (Hem i) save givim sed long olgeta. (Aesea 25:4). Long olgeta we oli stap harem nogud bigwan, Aesea i bin talemaot se Sevya i holem paoa ia blong ‘leftemap tingting blong olgeta we oli harem nogud, oli stap krae’ (Aesea 61:2), mo ‘ravemaot wota blong ae blong olgeta’ (Aesea 25:8; luk tu, long Revelesen 7:17); ‘Hem i save stap wetem ol man we tingting blong olgeta i stap daon’ (Aesea 57:15); mo ‘ol man we tingting blong olgeta i foldaon olgeta, oli harem gud bakegen’ (Aesea 61:1; luk long Luk 4:18; Ol Sam 147:3). Paoa blong help blong Hem i bigwan tumas we mekem se Hem i save mekem olgeta we ‘oli stap harem nogud, oli harem gud bakegen, oli glad, mo blong Hem i mekem we oli nomo krae, oli stap sing blong presem Hem.’ (Aesea 61:3).

“!O, naoia yumi save gat bigfala hop from olgeta promes ia! … Spirit blong Hem i hilim; i klinim; i kamfotem; i givim niu laef long ol hat we oli lusum hop. Hem i gat paoa blong jenisim evri samting we i no naes mo i wael mo no gat valiu long laef, i kam long wan samting we i hae mo i gud we i gud tumas. Hem i gat paoa blong tanem ol doti blong laef long wol ia, i kam long ol naesfala samting blong laef we i no save finis.”⁴

Mi testifae se Jisas Kraes Hem i Sevya blong yumi we yumi lavem, Ridima, Masta blong hilim yumi, mo fetful fren. Sapos yumi lukluk long Hem, Hem bae i hilim yumi mo mekem yumi kam fulwan bakegen. Mi testifae se hemia i Jos blong Hem mo Hem i stap rere blong kambak wan moa taem wetem paoa mo glori long wol ia. Long nem blong Jisas Kraes, amen.