Lukaotem Kraes long Evri Tingting

Long hym blong pres, Man we i raetem Ol Sam i talem:

“Hae God. Yu yu lukluk gud long mi finis, mo yu savegud mi.

“Yu yu save evri samting we mi stap mekem. Yu stap longwe, be yu save olgeta tingting blong mi.

“Nating we mi stap wok no mi stap spel, be yu yu stap luk mi, mo yu save olgeta samting we mi stap mekem.”¹

Long poem ia we ol toktok oli stret gud, Man we i raetem Ol Sam i presem fasin we Jisas Kraes i save luk evri samting, from se Hem i rili save evri saed blong sol blong yumi.² Hem i savegud evri samting yumi nidim long laef ia, nao Sevya i stap invaetem yumi blong lukaotem Hem long evri tingting mo blong stap folem Hem wetem ful hat blong yumi.³ Hemia i givim yumi promes ia se yumi save wokbaot long laet blong Hem, mo we, paoa blong Hem blong lidim yumi i stopem paoa blong tudak insaed long laef blong yumi.⁴

Blong stap lukaotem Hem long evri tingting mo stap folem Hem wetem ful hat blong yumi, i nidim blong yumi stretem maen blong yumi mo wanem hat blong yumi i wantem wetem hemia blong Hem.⁵ Ol skripja oli tokbaot fasin blong stretem yumi ia long wan sem laen, we i olsem blong “stanap strong long paoa blong Masta blong yumi.”⁶ Hemia i minim we yumi gogohed blong gat wan laef we i go stret wetem gospel blong Kraes, mo lukluk nomo evri dei long evri samting we i gud.⁷ Long tetaem ia nomo bae yumi kasem “pis we hem i givim, we i bigfala moa, i bitim save blong yumi, bambae hem i putum [hemia] long tingting blong [yumi], blong lukaot gud long yufala ya we i joen long Jisas Kraes.”⁸ Sevya Hemwan i bin talem long ol elda blong Jos long Febwari 1831: “Holemtaet gud ol toktok ia insaed long hat blong yufala, mo ol tabu samting blong taem we i no save finis oli mas stastap long maen blong yufala.”⁹

I nomata se yumi gogohed blong lukaotem Lod, bae i gat sam rabis tingting i kam insaed long maen blong yumi. Taem yumi letem ol kaen tingting ia blong stap, mo yumi iven invaetem olgeta blong stap, oli lidim ol tingting blong hat blong yumi, mo i lidim yumi blong kam huia bae yumi kam long laef ia, mo long en, i lidim yumi long wanem bae yumi kasem long taem we i no save finis.¹⁰ Elda Neal A. Maxwell i bin tokbaot bigwan prinsipol ia long wan taem, i talem: “Ol samting yumi wantem long hat, i talem wanem risal bae i kamaot, mo i talem tu se from wanem ‘Lod i singaotem plante be hem i jusum samfala nomo.’”¹¹

Ol profet blong yumi blong bifo mo blong tedei, oltaem oli stap mekem yumi tingbaot se yumi mas stanap agensem temtesen blong no save lusum paoa long saed blong spirit blong save brek, mo no kam konfius, no mestem rod, mo no gat giaman mo drim tingting long laef.

Blong toktok haed, blong foldaon long temtesen i olsem blong go kolosap long wan magnet wetem wan aean samting. Paoa ia, we yumi no luk, blong magnet ia, i pulum pis aean mo i hang strong long hem. Magnet ia bae i lusum paoa blong hem nomo ova long aean ia taem oli putum pis aean ia i stap longwe long hem. From hemia, semmak olsem we magnet i no save gat paoa ova long wan samting we i stap longwe, taem yumi stap stanap agensem ol temtesen, oli go lus mo oli lusum paoa ova long maen mo hat blong yumi, mo long en, ova long ol aksen blong yumi.

Taem mi komperem tufala samting ia, i mekem mi tingbaot wan eksperiens we wan memba blong Jos we i fetful evriwan i bin serem sam taem i pas. Sista ia i talem long mi se, taem hem i bin wekap long wan moning, hem i sek se wan doti tingting we hem i neva gat bifo, i kam olsem nomo long maen blong hem. Tingting ia i mekem hem i sek fulwan, nao long sam seken nomo hem i girap, i talem long hemwan mo long tingting ia se: “!No!” mo hem i riplesem tingting ia wetem wan gud samting blong tanem maen blong hem long tingting ia we hem i no laekem. Sista ia i talem long mi se, taem hem i bin praktisim fridom blong hem blong mekem joes long stret mo gud fasin, nogud tingting ia we i jes kam olsem nomo, kwiktaem i go lus.

Taem we Moronae i bin singaotem olgeta pipol blong biliv long Kraes mo blong oli sakem sin, hem i bin talem strong long olgeta blong oli kam go long Sevya wetem evri hat blong olgeta, we oli karkaremaot evri doti samting long olgeta. Moa long hemia, Moronae i bin givim kaonsel long olgeta blong askem God, wetem wan tingting we bae i no foldaon, se bae oli no foldaon long temtesen.¹² Blong yumi stap yusum olgeta prinsipol ia insaed long laef blong yumi, i nidim moa bitim wan smol bilif, be i nidim blong yumi stretem maen mo hat blong yumi folem ol tabu prinsipol ia. Ol kaen jenis olsem, i nidim blong yumi hadwok yumiwan evri dei mo oltaem, antap long fasin blong dipen long Sevya, from se ol rabis fasin ia, bae oli no go lus sapos yumi no hadwok from. Blong stap faet agensem temtesen i tekem wan laeftaem fasin blong wok strong wetem strong tingting mo blong stap fetful. Be plis, yufala i mas save se Lod i rere blong helpem yumi long ol hadwok blong yumiwan, mo i promesem ol bigfala blesing sapos yumi stap strong kasem en.

Long wan taem ia we i bin had tumas taem Josef Smit mo ol nara fren oli prisena long Libeti Kalabus, oli no gat fridom long eni samting, be tingting blong olgeta nomo; nao Lod i givim ol kaonsel we i bin helpem olgeta mo wan promes long olgeta we i kam tu long yumi evriwan:

“Yu mas letem ol insaed long yu i fulap long bigfala lav i go long ol man [mo ol woman], mo long haos we i gat fet, mo yu mas letem klin fasin i flasem ol tingting blong yu oltaem; afta nao, tras blong yu bae i gro i kam strong long fored blong God; …

“Tabu Spirit bae i fren blong yu we i folem yu oltaem, mo stik blong king blong yu, bae i wan stik blong king we i no save jenis, blong fasin we i stret mo gud, mo trutok.”¹³

Taem yumi mekem olsem, ol tabu tingting bae oli oltaem flasem maen, mo ol klin tingting blong hat blong yumi bae oli lidim yumi blong mekem ol stret mo gud aksen.

Moronae i mekem ol pipol blong hem oli tingbaot tu se oli no mas letem ol rabis tingting blong olgeta i kakae olgeta.¹⁴ Toktok ia, rabis tingting o filing i tokbaot wan strong tingting o filing we i nogud mo i stastap, blong wantem wan samting.¹⁵ Hem i tekem eni kaen tudak tingting, o rabis samting we hat mo bodi i wantem, we i save mekem wan i lukluk nomo long sam selfis aksen, o samting blong wol ia we hem i gat, be i no blong mekem gud, stap kaen, stap obei olgeta komanmen blong God mo sam moa. Plante taem, hem i kamaot tru long ol filing blong sol we oli prapa nogud. Aposol Pol i talem stret nem blong ol kaen filing olsem, olsem “[mekem ol samting blong sem, mo oli stap mekem ol samting we oli nogud olgeta, … oli stap faet, oli stap jalus, … oli stap kros, … oli wantem kasem mak blong narafala man, mo … oli mekem ol narafala samting olsem.”¹⁶ Nating long evri rabis saed blong rabis tingting o filing, yumi no save fogetem se enemi i stap yusum hemia olsem sikret mo giaman tul blong faet agensem yumi, taem we hem i temtem yumi blong mekem wan samting we i rong.

Ol brata mo sista blong mi. Mi testifae se taem bae yumi stap dipen long strong ston ia blong sevem yumi, Sevya ia blong sol blong yumi, mo stap folem kaonsel blong Moronae, bambae paoa blong yumi blong kontrolem ol tingting blong yumi, bae i kam antap bigwan. Mi save talem stret long yufala se, bae yumi kam raep moa long saed blong spirit, long wan kwik spid, we bae yumi jenisim hat blong yumi, mekem yumi kam moa olsem Jisas Kraes. Antap long hemia, paoa blong Tabu Spirit blong lidim tingting blong yumi bae i kam strong moa mo bae i gohed insaed long laef blong yumi. Ol temtesen blong enemi ia, smol smol i go, bae oli lusum paoa blong olgeta ova long yumi, i mekem se bae yumi gat wan laef we i klin moa, we i moa blong Kraes.

Long olgeta we, from sam risen, oli foldaon long temtesen mo oli stastap nomo wetem ol aksen we oli no stret mo oli nogud, mi save talem gud long yufala se i gat rod we i kambak, se i gat hop long Kraes. Samfala yia i pas, mi gat janis ia blong visitim wan dia memba blong Jos Ia blong Jisas Kraes blong Ol Lata-dei Sent, we i bin go tru long wan taem we i bin had long laef blong hem, from hem i brekem wan bigfala loa. Fas taem we mi luk brata ia, mi save luk long ae blong hem se hem i no hapi, wetem wan klia laet blong hop long fes blong hem. Wanem we mi luk ia, i soemaot wan hat we i stap daon mo i bin jenis. Hem i bin wan Kristin man we i givim evri ting, mo Lod i bin blesem hem bigwan. Be, hem i bin lego wan smol tingting we i no klin i kavremap maen blong hem, mo i lidim hem long nara tingting moa. Taem we hem i gogohed blong letem ol kaen tingting ia oli kam, i no longtaem, ol tingting ia oli putum rus long maen blong hem, mo oli stat blong gro dip insaed long hat blong hem. Long en, hem i tekem aksen i folem ol tingting ia blong hat blong hem we oli no klin, we i lidim hem blong mekem samting i agensem evri samting we i moa impoten long laef blong hem. Hem i talem long mi se, sapos hem i no bin letem fas krangke tingting ia long maen blong hem, bae hem i no lusum paoa mo save foldaon long ol temtesen blong enemi—ol temtesen ia we oli bin tekem fulap harem nogud long laef blong hem, o blong wan smol taem.

Laki tumas, olsem pikinini ia we i lusum rod long parabol we yumi save gud long gospel blong Luk, gud tingting i kambak long hem, mo hem i wekap long bigfala rabis drim ia.¹⁷ Hem i karembak tras blong hem long Lod, mo hem i bin save filim tru sore, mo i gat tingting long hat blong kambak long yad blong Lod. Long dei ia, mitufala i bin filim lav ia blong Sevya we i pemaot man, we Hem i gat long yumi. Long en blong sot storian blong mitufala, mitufala i fulap we fulap long bigfala filing, mo kasem tedei, mi tingbaot glad ia we i bin saenaot long fes blong hem taem hem i bin aot long ofis blong mi.

Ol dia fren blong mi. Taem we yumi stanap agensem ol smol temtesen, we oli kam plante taem we yumi sek long olgeta long laef blong yumi, bae yumi gat moa tul blong faet blong stap longwe long ol bigfala fasin blong brekem loa. Olsem we Presiden Spensa W. Kimbol i talem: “I no hapen oltaem se wan i brekem bigfala loa, sapos long fas ples, hem i no bin brekem wan smol loa, we i stap openem doa long bigwan. … ‘Wan garen we i klin, i no fulap long rabis gras olsem nomo.’”¹⁸

Taem Hem i bin stap rere blong mekem tabu misin blong Hem long wol ia, Sevya Jisas Kraes i bin stap eksampol blong hamas i impoten blong gogohed blong stanap agensem evri samting we i save stopem tingting blong yumi blong kasem stamba tingting we i no save finis. Afta long sam atak blong enemi we i no gat sakses, we i traem blong pulumaot Hem long misin blong Hem, Sevya i tok stret long hem, i sakemaot devel ia, i talem: “!Setan! !Yu gowe long mi! … “Nao Setan i gowe long Jisas, mo ol enjel oli kam, oli stap lukaot long hem.”¹⁹

?Yu yu save tingting, ol brata mo sista blong mi, se wanem bae i hapen sapos yumi save karem paoa mo strong paoa long tingting long Sevya, mo talem: “No” mo “Yu gowe long mi” long evri rabis tingting long stret taem ia we oli kam insaed long maen blong yumi? ?Wanem bae i hapen long ol tingting blong hat blong yumi? ?Wanem aksen bae i kamaot we bae i kipim yumi stap kolosap long Sevya mo letem paoa blong Tabu Spirit i gohed blong lidim tingting blong yumi long laef? Mi save se taem yumi folem eksampol blong Jisas, bambae yumi stap longwe long ol prapa nogud taem mo sin fasin we oli save mekem problem long famli, gat raorao, ol nogud filing mo tingting, fasin blong no tritim gud man mo abius, longwe blong stap slef long ol rabis adiksen, mo eni samting moa we bae i agensem ol komanmen blong Lod.

Long histri mesej we i tajem yumi long Epril long yia ia, dia profet blong yumi, Presiden Russel M. Nelson i mekem wan promes se, evriwan we oli wantem blong “lisin gud long Hem”—lisin gud long Jisas Kraes—mo obei ol komanmen blong Hem, “bae [oli] gat blesing blong kasem moa paoa blong fesem ol temtesen, ol hadtaem, mo ol wiknes,” mo we paoa blong yumi blong filim glad bae i kam antap, iven long taem we ol samting oli muvmuv moa.²⁰

Mi testifae long yufala se ol promes blong dia profet blong yumi oli ol promes we oli kam long Sevya Hemwan. Mi invaetem yufala blong “lisin gud long Hem” long evri tingting mo folem Hem wetem ful hat blong yufala blong save kasem paoa mo paoa long tingting blong talem: “No” mo “Yu gowe long mi” long evri samting we oli no tekem hapines i kam long laef blong yumi. Sapos yumi mekem olsem, mi promesem yufala se Lod bae i sendem Tabu Spirit blong Hem i kam moa, blong mekem yumi kam strong moa mo givim kamfot long yumi, blong yumi save kam ol man mo ol woman we i gat stret hat blong Lod.²¹

Mi talem witnes blong mi se Jisas Kraes i stap laef, mo we, tru long Hem, bae yumi win ova long rabis paoa blong enemi mo bae yumi kwalifae from taem ia we i no save finis wetem Lod, mo long ples we Papa blong yumi we i stap long Heven i stap long hem. Mi testifae abaot ol trutok ia wetem evri lav blong mi long yufala mo long naes Sevya blong yumi, we nem blong hem mi givim glori, ona mo pres, oltaem mo oltaem. Mi talem ol samting ia long nem blong Jisas Kraes, amen.