Toksave long saed blong Seremoni blong Tempol

Fas Presidensi i putumaot toksave ia, long 20 Julae 2020 abaot ol jenis blong tempol endaomen seremoni:

“Ol tabu tijing, ol promes, mo ol seremoni blong tempol, oli stat longtaem bifo i kam, mo oli stap poenem rod long ol pikinini blong God i go long Hem taem we oli stap mekem moa kavenan, mo taem oli stap lanem moa abaot plan blong Hem, we i tekem tu rol blong Sevya, Jisas Kraes.

“Tru long insperesen, ol wei blong givim instraksen insaed long tempol oli bin jenis plante taem, iven long histri we i jes pas, blong helpem ol memba blong andastanem gud moa wanem we oli bin lanem insaed long tempol, mo blong oli laef folem.

“Pat blong eksperiens insaed long tempol, hem i blong mekem ol tabu kavenan, o promes i go long God. Plante pipol oli savegud ol aksen we oli ol simbol, we oli kam taem wan i mekem ol kavenan blong relijin (olsem prea, draon andanit long wota long taem blong baptaes, o holem han long taem blong wan mared seremoni). Ol simpol semmak aksen we oli ol simbol, oli kam taem wan i mekem ol kavenan insaed long tempol.

“Wetem wan wari long evriwan, mo wetem wan tingting blong wantem mekem eksperiens blong tempol i kam gud moa, i gat samfala jenis we oli bin givim raet from, long saed endaomen seremoni blong tempol. From se ol tempol seremoni oli tabu, mifala i stap askem ol memba mo ol fren blong yumi blong oli no stap mekemap tingting blong olgeta, o tokbaot ol jenis ia long pablik. Be, mifala i stap invaetem ol memba blong Jos blong oli gohed blong wet from dei ia we oli save gobak mo tekpat fulwan long tabu tempol wok, wetem prea mo tangkyu insaed long hat.”