Ennaan an ritōl an eria
Armej Rot Kom̧ij Aikuj in Āinwōt? Em̧ool āinwōt Jisōs!
“Kōttōpar rej kwaļo̧k ikdeleel ko ilo buruōd im ad loļo̧kjeņ kōn ta eo jemaron̄ kōttōpraki. Kōn kōttōpar im pepe ko, kōjatdikdik ko ad rej oktak n̄an jerbal. Kōm̧m̧an kōttōpar im pepe rej jerbal in tōmak”.1
Juon kajjitōk ej pād wōt āinwōt m̧ōttan kōttōpar ko aō me rej wōnm̧anļo̧k wōt im aō kōjatdikdik, armej rot kom̧ij aikuj in āinwōt?
Ilo New Zealand im Auckland Mijen ‘NZAM’ (2011–2014), kōrā eo pāleeō, Becky im n̄a kom̧ro ekkein kobaļo̧k ippān mijinede ro rej jerbal aolep raan im āliji naan ko em̧ōj kakilōklōke kōm kar ņa etan, Keememej! Ilo lokwaļpen iien āliji ta eo em̧ōj kakilōklōke kōn eoon in:
“Kōn menin, armej rot in kom̧ij aikuj in āinwōt? Em̧ool ij ba n̄an kom̧, em̧ool āinwōt N̄aij” (3 Nipai 27:27).
Kejokļo̧kjeņ kōn eoon in iiō im iiō, ejitōk ruo kajjitōk ilo kōļmenļo̧kjeņ e aō:
1. Etke Jisōs Kraist ekar kakien e kōj n̄an erom̧ āinwōt E?
Ij tōmak ewōr juon an kōttōpar n̄an kōm̧m̧an kōn wāween An en̄jake kōn kōj. Ej lukkuun iakwe kōj im ekōņaan bwe jen en̄jake lan̄lōn̄. Lan̄lōn̄ ippān baam̧le ko ad, ilo mour in kōttōpar ko ad, ilo ad jerbal ilo aelōn̄ in kiin̄ eo im ilo ad jeļā E. N̄e eļapļo̧k ad karōk ļo̧k mour ko ad n̄an E, enej ļapļo̧k ad en̄jake lan̄lōn̄ eo Liai ekar kōmeļeļeiki ilo an kar bōk ‘leen wōjke eo’ (jej barāinwōt jeļā kake āinwōt kōjeraam̧m̧an ko an Pinmuur eo an Jisōs Kraist). Liai ekar ba bwe ilo an “m̧ōn̄ā leen wōjke eo eaar kobrak aō kōn eļap otem ļap lan̄lōn̄”.2 Jisōs ekar ba, “Men kein Ij kōnono n̄an kom̧ bwe Aō lan̄lōn̄ en pād ilo kom̧, im bwe ami lan̄lōn̄ en obrak”.3
2. Ewi wāween kōj (m̧aan im kōrā ilo mour in) n̄an erom̧ āinwōt Jisōs Kraist?
Kiin̄ Benjamin ej jipan̄ uwaake kajjitōk in ilo an kajjitōkin bar juon kajjitōk: “Bwe ekōjkan an juon armej jeļā karo eo eaar jab jerbal n̄an e, ak eo ej juon ruwamāejet n̄an e, im ej ettoļo̧k jān ļōmņak ko im jibadbad ko an būrūon?”4
Juon wāween jemaron̄ erom̧ āinwōt Jisōs Kraist ej n̄an kōm̧m̧an im ba men ko me Ej ba im kōm̧m̧ane. “Em̧ool, em̧ool, Ij ba n̄an kom̧, en̄in ej gospel eo Aō; im kom̧ jeļā bwe men ko kom̧ij aikuj kōm̧m̧an ilo kabun̄ eo Aō; bwe jerbal ko kom̧ ar lo Aō kōm̧m̧an i kom̧ naaj barāinwōt kōm̧m̧an i; bwe men ko kom̧ ar lo Iaar kōm̧m̧an em̧ool men kein kom̧ naaj kōm̧m̧an”.5
N̄an erom̧ āinwōt Jisōs Kraist, E ej kūr tok kōj n̄an ‘Itok n̄an E’ im kōm̧m̧an āinwōt Ekar kōm̧m̧an. Ta eo E ekar kōm̧m̧an?
Iakwe im Iakwe eo Em̧ool an Kraist—Jon ej kakeememej kōj bwe “ejjeļo̧k yokwe ippān armej eļap jān yokwe in”6 jān ta eo Jisōs Kraist ekar kōm̧m̧ane n̄an kōj ilo an leļo̧k mour eo an bwe en Mej bwe jen maron̄ bar mour. Waanjon̄ak eo an em̧m̧an tata ej kōmeram̧ļo̧k kōj rainin ilo An kūr kōj n̄an tōpar im jipan̄ baam̧le ko im ro m̧ōttan ilo wāween eo Ekar katakin kōj. “Kien ekāāl ij lewaj n̄an kom̧, kom̧win yokwe doon; āinwōt Iar yokwe kom̧, kom̧win barāinwōt yokwe doon. Ilo men in armej otemjej renaaj jeļā bwe kom̧ij rū kaļora, eļan̄n̄e kom̧ij yokwe doon”.7
Kijenmej—Jisōs ekar katakin kōj kōn kijenmej ilo wāween An kar mour kōn Mour eo An. Kar kajirere kake, kapiloiki, liaake im debwāāle, “ejjeļo̧k naan in ellotaan ej diwōjtok jān Lo̧n̄iin” wōt “a en jab ankil Aō a Am̧ wōt”.8 “Mour in eobrak kōn men ko reppen, jet men ko reddik im ko jet eļapļo̧k an nanaļo̧k piktokier. Āinwōt eiten ejjeļo̧k jem̧ļo̧kin apan̄ ko n̄an juon im aolep. Būrabōļōm eo ad ej bwe ekkā ad kōtmene uwaak ko me jorrāān eo Ad ej bwe emakijkij ad jet iien kōtmānik uwaak ko rej waļo̧k iien eo wōt n̄an kain apan̄ kein”.9
Ettā—Kōn waanjon̄ak, jān ļotak (walaļļo̧k ium̧win aolep men otemjej) n̄an mej (debwāāl ilo Calvary ippān rikoot ro ruo) Jisōs ekar katakin kōn ettā. Jenaaj lukkun keememej e “im iien otemjej bōk ilo ememļo̧kjeņ, ļap eo an Anij, im waan eo ami make, im An em̧m̧an im meanwōd n̄an kom̧, mennin mour ko rejjab tōllo̧ke, im kōttāik kom̧ em̧ool ilo m̧wilaļ ko in ettā, kūr ioon etan Irooj raan otemjej”.10
Tiljek—“Tiljek ej kijejeto edim, ejejjet, em̧ool, im ekajoor ilo kōm̧m̧ane jerbal eo an Irooj. Irooj ej kōtmene kwe [im n̄a] n̄an jerbal tiljek—emakijkij im kōn kijejeto eļap im kea”.11
“Kōn menin, kōtļo̧k bwe em̧m̧aan otemjej en jeļā jerbal eo an, im n̄an m̧akūtkūt ilo opij eo me jitōn̄e n̄an e, ilo aolep laļn̄ijn̄ij”.12
Pokake—“Kauwe eo n̄an pokake aolep raan im mour erro im em̧m̧an ej ejaake kein kōjparok eo ilo kwe im jokņe jān kapo ko kwoj iooni ilo am̧ wōnm̧anļo̧k wōt ilo mour in”.13
“N̄a, Irooj, I lokjak n̄e kom̧ij kōm̧m̧ane ta eo Ij ba, ak n̄e kom̧ij jab kōm̧m̧ane ta Ij ba, kom̧ ejjeļo̧k ami kallim̧ur”.14
Jej kōjerbal juon jon̄ak epidodo ippān mijenede ro ilo NZAM me ij tōmak ej wōnm̧aanļo̧k wōt im jerbal ilo mour ko ad rainin.
Niknik Jerbal + Pokake = Mōņōņō (lale Mosaia 2:41)
(Tiljek)
Kōjatdikdik eo aō im jar eo aō n̄an kajjojo ilo ad jino ilo iiō in 2021, is bwe jej en̄jake (ak wōnm̧aanļo̧k n̄an en̄jake) oktak eo ekajoor ilo buruōd me emenin aorōk n̄an kōņaan erom̧ āinwōt Jisōs Kraist. Keememej bwe en̄in ej juon kōttōpar aiktok—ej juon bun̄tōn eo eaitok kitien ejjab kadu kitien. Kōjeram̧m̧an ko kar kallim̧ur kaki ej bwe jemaron̄ en̄jake lan̄lōn̄ Liai ej kōmeļeļeiki āinwōt ekar itok n̄an meļeļe mour im jerbal in kwaļo̧k naan an Jisōs Kraist, ekoba Pinmuur eo An ejjeļo̧k jem̧ļo̧kin.
Ilo ad lukkun bōk Jisōs Kraist im katak ko An, jej itok n̄an Kraist, im wāppen ilo e. Innem kar ba n̄an kōj bwe eļan̄n̄e jenaaj kaamejete aolep men ko rejjab an Anij im iakwe Anij kōn aolepān ad maron̄, ļōmņak im kajoor, innem ebwe jouj eo an n̄an kōj kajjojo “jān jouj an Anij kom̧ij weeppān ilo Kraist, kom̧ ilo ejjeļo̧k jabdewōt wāween maron̄ kaarmejjete kajoor eo an Anij”.15
Ijeļā bwe Jisōs Kraist ej Rilo̧mo̧o̧r im Ripinmuur eo an laļ in. Ekar mej kōn kōj, E ej mour im E ej iakwe kōj. Ijeļā bwe Enaaj wōnm̧aanļo̧k wōt n̄an tōl bun̄tōn ne ko ad bwe jen maron̄ lan̄lōn̄ ilo mour in im ilo mour eo ej itok. Jej aikuj mije kijejeto ko ad im kōttōpar ko ad ilo 2021 ilo ad erom̧ āinwōt Rilo̧mo̧o̧r, Jisōs Kraist, ej aō jar.