Savali Faaleautaitai i le Eria
O Le a le Ituaiga Ali’i po o le Tama’ita’i e Tatau Ona Outou I Ai? Ia Pei lava o Iesu!
“O sini e atagia ai faanaunauta’iga o o tatou loto ma la tatou vaai mamao i mea e mafai ona tatou faataunu’uina. E ala i sini ma fuafuaga, o le a mafai ai ona suia o tatou faamoemoega i gaoioiga. O le faatutuina o sini ma fuafuaga o ni gaoioiga o le faatuatua”.1
E tasi le fesili o lo’o tumau pea o se faavae o le aga’i pea i luma o a’u sini ma faanaunauta’iga, o le a le ituaiga tagata e tatau ona outou i ai?
I le misiona a Aukilani i Niu Sila ‘NZAM’ (2011–2014), e masani ona ma auai ma lo’u toalua o Becky i se faatasiga a faifeautala’i na matou faaigoaina, Manatua! I le ogatotonu o lenei fuaitau o se mau:
“O lea, o a ituaiga tagata (po’o tama’ita’i) e tatau ona outou i ai? E moni ou te fai atu ia te outou, e pei lava o a’u nei” (3 Nifae 27:27).
O le mafaufau i ai i lenei mau i tausaga uma, na tula’i mai ai ni fesili se lua i lo’u mafaufau:
1. Aisea na poloa’iina ai i tatou e Iesu Keriso ina ia faapei o Ia?
Ou te talitonu e telē se mea e a’afia ai Ona lagona mo i tatou. E alofa tele o Ia ia i tatou ma e finagalo o Ia ina ia tatou lagonaina le olioli. Olioli ma o tatou aiga, i le aga’i i luma o o tatou manaoga o le olaga, ma a o tatou auauna atu i lona malo ma tatou iloa lelei o Ia. O le latalata o le faaogatusaina o o tatou olaga ma Ia, o le a le pine ona tatou maua lea o aafiaga o le olioli e pei ona faamatalaina e Liae a’o ia ‘aia le ‘fua o le la’au’ (e pei ona iloa ai o se faamanuiaga o le Togiola a Iesu Keriso). Na faapea mai Liae a’o ia “aia le fua o le laau o le mea lea na faatumulia ai lo’u agaga i le olioli tele”.2 Na fetalai Iesu, “O nei mea ua ou fai atu ai ia te outou, ina ia tumau pea lo’u olioli ma outou, ina ia atoatoa lo outou olioli”.3
2. E faapefea ona tatou (ali’i ma tamaita’i) avea faapei o Iesu Keriso?
Na fesoasoani le tupu o Peniamina e tali lenei fesili i lona toe faia o le isi fesili: “Aua pe faapefea ona iloa e se tagata le matai e le’i auauna i ai o ia, ma o se tagata ese ia te ia, ma ua mamao mai mafaufauga ma faamoemoega o lona loto?”4
O se tasi o auala e mafai ai ona tatou faapei o Iesu Keriso o le faia lea ma tautala i mea e fetalai i ai ma faia e Ia. “E moni, e moni, ou te fai atu ia te outou, o la’u talalelei lea; ma ua outou iloa mea e tatau ona outou faia i la’u ekalesia; ona o galuega na outou vaai na o’u faia, o mea ia tou te faia fo’i; aua o mea na outou vaai o o’u faia, o mea lava ia ia outou faia”.5
O le avea ai faapei o Iesu Keriso, ua valaauina i tatou ia ‘O mai ia te Ia’ ma faia e pei ona Ia faia. O le a Lana mea na fai?
Alofa ma Agalelei—Na faamanatu mai e Ioane ia i tatou “e leai se alofa o se tagata e sili atu”6 nai lo mea na faia e Iesu Keriso ina ua faama’imauina Lona ola ina ia tatou toe ola ai. O Lana faata’ita’iga sili o lo’o susulu malamalama mo i tatou i aso nei a’o Ia valaa’ulia i tatou ina ia a’apa atu i o tatou aiga ma uo i auala na Ia a’oa’o ai i tatou. “O le poloaiga fou ou te tu’u atu ai ia te outou, ia outou fealofani; faapei ona ou alofa atu ia te outou, ia fealofani foi outou. O le mea lea e iloa ai e tagata uma lava o O’u so’o outou, pe afai ua outou fealofani.”7
Onosa’i—Na a’oa’o mai tatou e Iesu e uiga i le onosa’i e pei ona Ia soifua ai. Sa tauemuina o Ia, sa feanu i ai tagata, fa’alataina ma faasatauroina, “sa leai ni upu tomumu na sau i lona fofoga” ae na o le “e le faia lo’u loto, ae o lou finagalo”8. “E tumu le olaga i faigata, o nisi faigata e māmā ae o nisi e sili atu ona matuiā. E foliga e le uma le o’o mai pea o luitau mo tatou ta’ito’atasi ma tatou uma. O la tatou faafitauli, o le masani lea ona tatou faatalitali i ni tali e o’o mai i lea taimi ma lea taimi e foia ai nei lu’itau, ma galo ai ia i tatou o taimi uma, e mana’omia le onosa’i mamalu faale-lagi”.9
Lotomaualalo—Mai se faata’ita’iga, mai Lona soifua mai (maualalo i mea uma) i le oti (i Lona faasatauroina mataga i Kalevario i le va o tagata gaoi) na a’oa’o mai ai e Iesu le lotomaualalo. O le a mafai ona tatou manatuaina lelei “ma manatua pea lava pea, le silisili’ese o le Atua, ma lo outou lava noa, ma Lona agalelei ma Lona tali-tiga ia te outou, o tagata le aogā, ma faamaualaloina outou lava e o’o ifo i le loloto o le lotomaualalo, ma valaau atu i le suafa o le Alii i aso ta’itasi”.10
Filigā—“Filigā o le to’a, tumau, tauanau ma se taumafaiga malosi i le faia o le galuega a le Ali’i. E finagalo le Alii ia te oe ma a’u ina ia tatou galulue ma le filiga—ma faatumauina ma se taumafaiga maoa’e ma le faapelepele”.11
“O le mea lea, ia ta’itasi le tagata ma a’oa’o i lona tiute, ma galue i le tofi ua tofia ai o ia, i le filiga atoa”.12
Usita’i—“O le faafoeina lelei e i totonu o le usita’i i aso uma ma le ola i se olaga māmā ma se olaga ato’atoa e fausia ai se ofutau e puipuia ai oe mo lou saogalemu mai faaosoosoga e ono faalavea ia te oe a’o e ola ai i le olaga faitino”.13
“O A’u, o le Ali’i, ua noatia a’u pe a outou faia mea ou te fai atu ai, ae a outou le faia mea ou te fai atu ai, e leai se folafolaga mo outou”.14
Tatou te faaaogaina se faata’atiaga faigofie ma faifeautala’i i le NZAM ou te talitonu o lo’o faaauau lava ona faaaogaina i lo’u olaga i le asō.
Galue Malosi + Usita’i = Fiafia (taga’i i le Mosaea 2:41)
(Filigā)
O lo’u faamoemoega ma la’u tatalo mo i tatou uma ta’ito’atasi a’o tatou amataina le tausaga 2021, ia o tatou lagonaina (po o le faaauau ona lagonaina le suiga maoa’e o le loto e mana’omia e saga atili avea ai e pei o Iesu Keriso. Ia manatua o se mea lenei mo le olaga atoa—o le marafoni ae le o se tu’uga saoasaoa. O fa’amanuiaga folafolaina e faapea e mafai fo’i ona tatou lagonaina le olioli na faamatalaina e Liae ina ua malamalama i le soifuaga ma le misiona a Iesu Keriso, e aofia ai ma Lana Togiola e leai se muta’aga.
A’o tatou talia atoatoa Iesu Keriso ma Ana a’oa’oga, tatou te o mai ia Keriso, ma faaatoatoaina ia te Ia. Ua uma fo’i ona ta’u mai ia i tatou afai tatou te faafiti mai mea uma lava e lē faalēatua, ma alolofa i le Atua ma o outou manatu atoa, mafaufau atoa ma le malosi atoa, ona lava lea o lona alofa tunoa mo outou, ma “o lona alofa tunoa e mafai ai ona outou atoatoa ia Keriso; ma afai tou te atoatoa ia Keriso e ala i le alofa tunoa o le Atua, e leai se ala e mafai ona outou faafitia le mana o le Atua”.15
Ou te iloa o Iesu Keriso o le Faaola ma le Togiola o le lalolagi. Na maliu o Ia mo i tatou, na soifua o Ia mo i tatou ma e alofa o Ia ia i tatou. Ou te iloa o le a Ia faaauau ona taialaina o tatou laasaga ina ia tatou maua le olioli i lenei olaga ma le olaga a sau. Tatou taula’i atu a tatou taumafaiga ma sini o le 2021 i le avea ai lea o i tatou i taimi uma e faapei o lo tatou Faaola, o Iesu Keriso, o la’u tatalo lea.