En An Kilaam̧

Ad Rilo̧mo̧o̧r Jisōs Kraist ej ad waanjon̄ak eo eļap tata n̄an kōm̧m̧an bwe ankilaan Jemen en anjo̧. Ilo jikin kallib Gethsemane, ke Kraist eaar jar n̄an Jemen, ilo An bōk Ioon jerawiwi ko, en̄taan ko, im metak ko an laļ, ijjab maron̄ keidi jon̄an metak ko im kaen̄taanan in jetōb E ekar en̄taan kaki im ba, “O Jema, eḷaññe e maroñe en ilọk kab in jān Eō,” im aaet ekar juon iakwe eļap im pokake Ekar kwaļo̧k jān ba ilo ejja kitwōn eo wōt, “a en jab ankil Aō, a ankil aṃ.”¹

Ilo aolepān jeje ko rekwojarjar jej riit kōn rikaļoor ro jet retiljek ro raar kwaļo̧k ejja en̄jake in wōt āinwōt kar Rilo̧mo̧o̧r eo im kar kōm̧m̧an bwe ankilaan Jemen en anjo̧. Mokta jān an Abinadai rikanaan eo kar liāpe naan in kam̧ool eo an kōn mour eo an eaar peran ilo kar kwaļo̧k naan eo an gospel eo kar kean̄, “. . . Ij kadedeļo̧k ennaan in aō; . . . Innām ejjeļo̧k tokjān ia inaaj ilo̧k ie, eļan̄n̄e āindein bwe in mour.”²

Ejjeļo̧k oktak, Shadrak, Meshak, im Abednego rekar kwaļo̧k n̄an Kiin̄ Nebuchadnezzar, “Eḷan̄n̄e enaaj āindein, am Anij Eo kōmij karijer n̄an E, E maron̄ in lọmọọren kōm jān upaaj in kijeek e bwil, im Enaaj lọmọọren kōm jān peiṃ, O Kiin̄.

“Ak eļan̄n̄e e jab, kwōn jeḷā O kiin̄ bwe kōm ban karijer n̄an anij ro aṃ ak kabun̄ n̄an ekjab gold eo kwaar kajutake.”³

Im Ammōn, ļeo nejin Kiin̄ Mosaia, kōn iakwe em̧wilaļ n̄an “kwaļo̧k naan an Anij n̄an armej rawiaa im kijn̄en̄e im juon armej rellāj,”⁴ an ikdeleel eļap eaar waļo̧k ilo an uwaake Kiin̄ Lamonai: “Aaet, ikōņaan jokwe ilubwiljin armej rein n̄an jidik iien; aaet, im bōlen m̧ae raan eo ij mej.⁵

Rikaļoor rein reperan an Irooj raar jab ebweer jen naan in kam̧ool eo aer im āinwōt kar Rilo̧mo̧o̧r, kajjojo iaer raar kōm̧m̧an bwe ankilan Jemān en anjo̧ ņae jeraam̧m̧an eo aer make.

Ij keememej ke iaar dik, iaar ron̄jake bwebwenato in oktak eo an jema. Ke gospel eo an Jisōs Kraist ekar itok n̄an Samoa, ekar jab em̧m̧an an itok. Elōn̄ raar mijak kōn kabun̄ in ekāāl im kar jum̧aeiki im kōnanaik ro raar kāālet n̄an kobaļo̧k ie. Elōn̄ rioktak ro raar kadiwōjļo̧k er jān m̧oko im̧weer im elōn̄ raar ko n̄an jikin ko n̄an jikin jokne ko. Jema, āinwōt juon likao edik im juon em̧m̧aan eo eitok limo in, ekar kappukōt n̄an lo ta eo kabun̄ kāāl in ekar katakin. Ilo tōre eo ekar peptaij n̄an Kabun̄ eo an Jisōs Kraist im Armej ro Rekwojarjar ilo Raan Ko Āliktata.

Ke ennaan eo eaar ajedeed ilo bukwōn eo ke em̧ōj an jema kar kobaļo̧k ilo Kabun̄ in, eo m̧ōttan jen jikin eo eaar inepata im kar kakkōļ e ke ekar wōr juon enaan ke renaaj kar um̧ni ilo an mour wōt (juon um̧ ej pād ioon bwidej kōn dekā in boļkeno̧ ko), kōn menin jema eaar ko im kar lo jikin an pād ippān Malietoa Talavou Pe’a Fitisemanu im Alisa Fitisemanu. Men̄e mour eo an ekar kamijak eaar pen wōt ilo tōmak eo ekāāl eaar loe. Āinwōt kar katakin jān Rilo̧mo̧o̧r “. . . koṃ naaj jeḷā kajjier kōn leir.”⁶ Kōjeraam̧m̧an ko an Gospel eo kar Kōjepļaaktok an Jisōs Kraist ilo mour eo aō ippān eo an lio pāleō im ajri ro nejim, im ilo mour ko an baam̧le ko an ajri ro nejim, rej jet iaan leen ko an tōmak eo an jema.

Būreejtōn Russell M. Nelson eaar kwaļo̧k, “Kajjitōk eo n̄an kōj kajjojo, jekdo̧o̧n armej rot, ejjeļo̧k oktak. Kwoj ke kōņaan bwe Anij en anjo̧ ilo mour eo am̧? Kwoj ke kōņaan bwe kajoor eo an Anij en im̧we mour eo am̧? Kwon ke kōtļo̧k naan ko An, kien ko An, im bujen ko An n̄an im̧we ta eo kwoj kōm̧m̧ane kajjojo raan? Kwon ke kōtļo̧k Ainikien bwe en m̧oktata ioon jen ko jet jabdewōt? Kwoj ke kōņaan bwe jabdewōt men eo Ej kōņaan bwe kwon kōm̧m̧an en aorōk ļo̧k jen ko jet? Kwoj ke kōņaan bwe ankilaam en oran̄ļo̧k Ankilaan?”⁷

Ij lukkuun kam̧m̧oolol kōn waanjon̄ak eo an jema, rekoot an rein rikarejaran Irooj retiljek im elōn̄ iaan rijilōk ro retiljek im rikaļoor ro an Kraist. Ij lukkuun kam̧m̧oolol kōn waanjon̄ak eo ewāppen an ad Rilo̧mo̧o̧r, eo ej aolep iien leļo̧k Ankilaan n̄an Jemen.

Ilo ad atbokwoj kajjitōk jān Būreejtōņ Nelson n̄an “kālet bwe Anij en anjo̧ ilo mour ko ad”,⁸ jenaaj en̄jake kōn kōj make bwe ad Anij ej “juon Anij in mennin bwilōn̄ ko.”⁹ Ij tōmak jenaaj maron̄ in ba kōn kōņaan im bōro ettā, O Anij, “a en jab ankil aō a aṃ wōt.”¹⁰