Im̧we ko an Jetōb

Anij enaaj kōjerbal kōj n̄an kōm̧m̧ane jerbal eo An eļan̄n̄e jej ron̄jake im jerbali unoojdikdik ko an Jetōb Kwojarjar.

Jemedwōj Ilan̄ eaar kōjeraam̧m̧an ro Nejin kōn elōn̄ menin letok ko an jetōb.¹ Āinwōt membōr ro em̧ōj aer peptaij an Kabun̄ eo an Jisōs Kraist im Armej ro Rekwojarjar ilo Raan Ko Āliktata, jaar bōk mennin letok eo an Jetōb Kwojarjar kōn kain̄i eo an kapene, eo eaar kōm̧m̧an jen likūt pā ko ioon jen “rikabwijer priesthood ro.”² Jemedwōj Ilan̄ eaar kallim̧ur bwe n̄e jej mour erreeo n̄an bujen peptaij eo ad, Jetōb Kwojarjar eo enaaj erom̧ m̧ōttad.³

Jetōb Kwojarjar eo, ej membōr eo kein kajilu in Doulul in Anij eo, ej kam̧ool kōn Jemān im Nejin.⁴ Ej barāinwōt kwaļo̧k n̄an kōj m̧ool ko an men otemjeļo̧k⁵ im kanemkwoj kōj jān katak ko renana im tōmak ko an armej.⁶

Irooj ej kōmeļeļeiki elmen an Jetōb Kwojarjar eo kōnono ilo juon wāween eo ekabwilōn̄lōn̄:

“Aaet, lo, I naaj ba n̄an eok ilo ļōmņak eo am im ilo būruōm̧, jān Jetōb Kwōjarjar, eo enaaj itok ioom̧ im eo enaaj pād ilo būruōm̧.

“Kiiō, lo, en̄in ej jitōbōn revelesōn.”⁷

Juon raan ilo Juļae 1989 eo, iaar jijet ilo opiij eo aō ilo Tarawa, Kiribati, kōļmeņļo̧kjeņ kōn jerbal in karejar eo aō ke juon im̧we ekajoor eaar itok n̄an kōļmenļo̧kjeņ eo aō ke in etal n̄an aujpitōl. Ekar kabwilōn̄lōn̄, ak ikar jeļā kōn ainikien eo ej itok jān Jetōb. Iaar jokāālet n̄an jerbale im̧weo eo ilo ejjeļo̧k karum̧wijļo̧k.

Ke ikar kōppopo n̄an em̧m̧akūt, juon kar aō mijenede kōmpānien, Founuku Kitiona, ekar itok ilo iien eo ejetjet ke ikar aikuji e. Iaar kajjitōk n̄e emaron̄ itok ippa n̄an aujpitōl.

“Ewōr en enan̄imej?” ekar kajjitōk. Iaar ba n̄an e, “Ijjab jeļā . . . Ekar wōr juon aō en̄jake ekajoor bwe jej aikuj etal n̄an ijōņ.”

Ke kōm̧ij ettōrļo̧k n̄an aujpitōl, jon̄oulļalem minit ettoļo̧k, ikar jab jeļā ta eo n̄an kōtmene. Eaar kakeememej eō kōn naan ko an Nipai ke Irooj eaar jiron̄ e bwe en jepļaakļo̧k n̄an Jerusalem n̄an būki brass pilej ko, “Im jetōb eaar tōl eō, jab jeļā m̧okta men ko in kar kōm̧m̧ani.”⁸

Kōm kar tōkeeakļo̧k ilo aujpitōl im kar kile juon van mouj eaar baak ilo tum̧aan in emergency ruum̧. Kar waan Elder im Sister Trethowan, jet rūtto ripālele mijenede rem̧m̧an jān Australia. Kōm kar ļōmņak etke ekar pād ijo!

Ke kom̧ kar deļo̧n̄ļo̧k ilo emergency ruum̧ eo, kōm kar lo Elder Trethowan ioon juon peet, jidik erre im menokadu. Kōrā eo pāleen eaar būkwelōlō iturin peet eo an, im jar.

Raar pād ijo enan̄in juon awa in aer kōttar jipan̄. Liin eaar inepata . . . ak eaar jab ebweer kōn kōjatdikdik bwe lan̄ en jipan̄. Komaron̄ ke pijaikļo̧k emerara eo an, kōpetata in, ke liin ekar lo kōm “Kom̧ro em̧m̧aan raņ. Anij eaar uwaake jar ko ad,” Liin eaar ba.

Ilo iien eo, iaar jeļā unin an kar Irooj jilkinļo̧k kom̧ro n̄an ijeņ. Kom̧ro kar likūt peimro ioon bōran Elder Trethowan im leļo̧k n̄an e juon kōjeraam̧m̧an an priesthood.

Jidik iien tok ālik, jet nuuj im juon taktō raar itok. Ālkin lale e, taktō eo eaar jiron̄ kōm ke mijenede in ewōr juon an nan̄inmej in menono im eaikuj in deļo̧n̄.

Jeļā bwe ejabwe kein taktō ilo āne in, iaar m̧ōkaj in ro̧o̧lļo̧k n̄an opiij eo aō im kūrļo̧k Church Area Office eo n̄an bōk kapilōk. Uwaak eo em̧ōkaj tata ekar n̄an likūt Elder Trethowan ilo baļuun eo tok juon jān laļ eo. Jorrāān eo, ewōr wōt juon internation flight ilo juon wiik, im bwe baļuun eo an wiik eo em̧ōj an kelo̧k.

Ke iaar ļōmņake menin, Jetōb eaar unoojdikdik n̄an bar kōļmenļo̧kjeņ eo aō bwe in “etal n̄an travel office.” Iaar m̧ōkaj in etal im pād ijo m̧okta jen an kilōk opiij eo.

Iaar kajjitōk kōn baļuun ko im bwilōn̄ ke enaaj wōr juon special flight kelo̧k n̄an Honolulul raan eo juon. Iaar m̧ōkaj in kōdeļōn̄ etan ripālele rein ilo baļuun eo.

Jibbon̄in eo juon ripālele rein raar em̧akūt jen Kiribati im kar jok ilo Honolulu jejjo̧ awa tokālik. Raar bōk Elder Trethowan kajju n̄an juon aujpitōl ijo en maron̄ bōk kōm̧adm̧ad in taktō ko me enaaj lo̧mo̧o̧ren mour eo an.

Jejjō iiō tokālik, iaar bwilōn̄ ke iaar lo Brother Trethowan ilo Sydney Australia Temple. Eaar em̧m̧an an mour im e im kōrā eo pāleen raar wōnm̧aanļo̧k wōt im jerbal n̄an Irooj ijeņ āinwōt rijerbal in kain̄i an tampeļ. Eaar jiron̄ eō ke n̄e en kar jab em̧akūt jen kiribati ilo baļuun eo, mour eo an en kar jem̧ļo̧k wōt ijo.

Jān en̄jake in ekabwilōn̄lōn̄, im elōn̄ en̄jake ko jet, tōmak im naan in kam̧ool eo aō eaar kajoorļo̧k im iaar ekkatak juon katak eaorōk: ron̄jake im jerbale im̧we eo an Jetōb.

Elder Ronald A. Rasband eaar ba, “Irooj ejeļā aikuj ko an aolep ro Nejin—im Ejeļā wōn eo epojak n̄an jipan̄.” Eaar etal wōt im ba, “Eļan̄n̄e jej kōm̧m̧an bwe Irooj en jeļā ilo jar in jibbon̄ ko ad bwe jej pojak, Enaaj kūr kōj n̄an uwaak . . . im jenaaj lo kōj make ilo ta eo Būreejtōn Monson ej ņa etan ‘jerbal eo an Irooj’”.⁹

Būreejtōn Russell M. Nelson eaar akweļap n̄an kōj, “n̄an kom̧ n̄an kōm̧m̧an jabdewōt men eo ej bōk n̄an kōļapļo̧k maron̄ eo ami ilo jetōb n̄an bōk revelesōn”¹⁰ im n̄an “. . . pukot, ilo jabdewōt wāween jemaron̄e, n̄an ron̄jake Jisōs Kraist, eo ej kōnono n̄an kōj kōn kajoor im jerbal in karejar eo an Jetōb Kwojarjar.”¹¹

Keememej bwe ekeke ilo jetōb eo ad n̄an bōk revelesōn ej lukkuun in pedped wōt ioon jim̧weo an juon make.¹² Menin ejjab meļeļe in bwe jej aikuj in erom weppāān. Ejjeļo̧k juon me ekar etetal ioon laļ in ej weppāān,¹³ ijello̧kin wōt Jisōs Kraist. Bōtaab ej meļeļe in bwe jej aikuj in erreo: “erreeo n̄an bōk kwojkwoj eo, erreeo n̄an kōjeraam̧m̧an ko an tam̧peļ, im erreeo n̄an bōk revelesōn an juon make.”¹⁴

Kōm̧m̧an bwe jen ruo alen e kijejeto ko ad ilo jetōb n̄an pokakeļo̧k n̄an kien ko an Anij im n̄an ļoor kapilōk in kanaan ko im katak ko an rikanaan eo emour im rijilōk ro rainin. Ij kam̧ool ilo ad kōm̧m̧an āindein, jenaaj ron̄jake ainikien Jetōb “emakijkijļo̧k im alikkarļo̧k”¹⁵ im “bōk leen em̧m̧an eo an.”¹⁶

Ilo etan Jisōs Kraist. Amen.