Tōmak ilo Irooj Jisōs Kraist

“Irooj ejjab aikuji juon tōmak ewāppen n̄an kōj bwe jen maron̄ bōk kajoor eo An ewāppen. Ak E ej kajjitōk ippād n̄an tōmak”¹ kōn menin ejjab aikuj in dipio ad meļeļe n̄an kōjerbal tōmak n̄an bōk kajoor eo An.

Menin ej juon kam̧ool aiboojoj n̄an kōj n̄e emaron̄ wōr ad jet pere ko im inepata ko. N̄e jej kōjerbal tōmak, jej kwaļo̧k n̄an Anij bwe jekdo̧o̧n men̄e jejjab jeļā uwaak ko n̄an aolep kajjitōk jej m̧ōņōņō in lōke E im kallim̧ur ko An.

Kōn menin “Tōmak ej n̄an errā eo ejjeļo̧k an kalijōkļo̧k—im m̧oktaļo̧k—n̄an jabdewōt jekjek ko Anij emaron̄ aikuji jim̧or ilo ilju im jekļaj eo epaak ak ettoļo̧k.”²

Tōmak ej juon jikin ijjino eo elukkuun in em̧m̧an ilo em̧m̧akūt eo ad—ej pedped in katak eo im̧aan tata an gospel eo—im tōmak ejjab aikuj wōr juon jelaļo̧kjeņ eweeppān, ak ej barāinwōt aikuj m̧ool, n̄e ab ejjab tōmak.³

“Tōmak ej pedped eo me m̧wil ko An Anij rem̧m̧an rej ekkal ioon, ej juon men eo aikuji m̧okta jān an juon men waļo̧k n̄an aolep wānōk ko aolep jet.”⁴

Ewōr 3 kain tōmak:

1. “Tōmak in kōppopo eo ej ejaak jān en̄jake ko ilo iien ko ļo̧k jān kar jeļā ewi wōt eo ej letok juon pedped n̄an tōmak.”

2. “Tōmak in lo̧mo̧o̧r eo emakijkij tata emaron̄ in kōjerbale n̄an en̄jake eo ilo ilju im jekļaj—eo jab jeļā kake me ej letok juon iien em̧m̧an n̄an mennin bwilōn̄ ko.”

3. “Tōmak eo ekanooj jejjet—tōmak eo ej kōm̧akūt toļ, tōmak rōt eo an ļeo jein Jared, ej kwaļo̧k mennin bwilōn̄ im jeļā.”⁵

Jekdo̧o̧n ta tōmak eo jej en̄jake, ej aorōk n̄an kile bwe leļo̧k wōt jidik in kijejeto ejjab kōm̧m̧an ak ejaak tōmak. N̄e jej leļo̧k eļapļo̧k kijejeto ak kakilepļo̧k kijejeto eo ad, ewōr ippād maron̄ eo n̄an kōjerbal im en̄jake eļapļo̧k tōmak.

Aolep kijejeto ej ļap tokjān. Piter ekar kōjerbal tōmak ke ekar etetal ioon dān. Jet iaad maron̄ ba tōmak eo an ekar jab aitok kitien ak ekar jab lukkuun in kajoor kōnke ekar jino rūm̧ļo̧k im Rilo̧mo̧o̧r eo ekar aikuj in lo̧mo̧o̧ren e, bōtaab ilo aō jeļā, ijello̧kin Rilo̧mo̧o̧r eo, e ej armej eo de eo me ekar etetal ioon dān. Kom̧m̧ool, Piter, kōn am̧ kōjerbal tōmak im kwaļo̧k n̄an kōm bwe kōm maron̄ kōm̧m̧an mennin bwilōn̄ ko n̄e kōmij jab lukkuun kōtmene.

“Tōmak ej kajoor eo ej kōmaron̄ jabdewōt men ko rejjāmin kar tōprak bwe ren tōprak.”⁶

“Ej bōk tōmak n̄an jerbale juon mijen ilo juon iien ej ajedeed nan̄inmej in”.⁷

Ikar bōk juon kape in juon email kar jilkintok jān Elder L. Taleni eo ej kiiō jerbal ilo Hamilton New Zealand Mijen. Likao in ekar juon armej em̧m̧an m̧okta jān an em̧m̧akūt n̄an mijen eo an bōtaab kiiō, em̧ōj an erom juon armej eo eļap an em̧m̧an kōnke kōn tōmak eo an ilo Irooj Jisōs Kraist. Kōn mālim eo an ij kwaļo̧k ippāmi jidik in email eo an.

“Iien in aō ilo New Zealand Hamilton Mijen ekar juon en̄jake eo ekabwilōn̄lōn̄. Em̧ōj aō loe im bar loe pein Irooj im maron̄ m̧ool in kam̧ool bwe Anij ej pād ilo aolep men dikdik ko . . . ‘E armej būruon ruo im e kijon̄ oktak ilo iaḷ ko an otemjej’ (Jemes 1:8). Jejjab maron̄ bōk aenōm̧m̧an eļan̄n̄e jej tōmak juon men im m̧akūtkūt āinjuon, ak eļan̄n̄e jej mour juon mour ekotak ilo̧bwilej jān ad mour ilo ilo ņojak. Ijeļā jān en̄jake im kōn mālim eo an jeje ko rekwojarjar bwe menin ej wāween eo em̧ōkaj tata n̄an en̄taan, mijak, inepata, būrom̧ōj, bōd, jook, jeļo̧k kōjatdikdik, im jerwane naan in kam̧ool eo. Mour ruo kain mour an jeļā m̧oņ ej wāween eo jej erom jab kijin̄en̄e ilo wāween ko ad.

“Ij kajjitōk ippāmi n̄an pukōt m̧ool eo em̧ool itulowa jān juon kijejeto eļapļo̧k n̄an kōm̧m̧ane bwe mour ko ami ilo lo̧bwilej im ilo ņojak rej errā ippān katak ko im katakin ko im katak ko an gospel eo an Jisōs Kraist kar kōjepļaaktok. En̄in ej lukkuun in jibadbad eo aō in āinwōt aō jeļā ekar wōr aō ļōmņak ilo elōn̄ wāween ko im menin ekar kōtļo̧k an rikapo eo kakkure aenōm̧m̧an eo aō im kakinejnej jetōb eo aō. Bōtaab ippān Nipai jemaron̄ in lam̧ōj ‘Kwōn ruj, aō jetōb! Jab bar m̧ad ilo jero̧wiwi. Lan̄lōn̄, O buruō, im jab bar ņa jikin rikōjdat eo an aō jetōb.’ Ij barāinwōt karuwaineneik kom̧ n̄an ekkatak im kejekļo̧kjeņ kōn 2 Nipai 4:26–28, eo ej juon iaan eoon in jeje ko rekwojarjar em̧m̧an tata ippa.”

Ebōk tōmak n̄an Elder L. Taleni, im kōj, n̄an oktak.

N̄e jej kōjerbal tōmak erreo, jab eņoik⁸ im wōr māj in tōmak⁹ jenaaj ļoor im̧we ko an Jetōb jekdo̧o̧ņ n̄e ejjeļo̧k ippād kein kam̧ool eo jej loe ak maron̄ jibwe.

Kōm̧m̧an bwe jen kōm̧m̧ane āinwōt an Irooj ba, im “Koṃwin pād wōt im jeḷā bwe Ña Anij”¹⁰ im kōjerbal tōmak. “Tōmak ilo E enaaj kōm̧akūt toļ ko”.¹¹

“Kōj aolep ewōr ad toļ ko n̄an tallōn̄i, toļ ko n̄an anjo̧ ioer im toļ ko me āinwōt relukkuun in pen n̄an eļļā jāni bōtaab, kōn tōmak eo ami ilo Jisōs Kraist kom̧ naaj kōļapļo̧k ekeke eo ami n̄an kōm̧akūt toļ ko ilo mour ko ami, jekdo̧o̧n men̄e apan̄ ko ami make remaron̄ kilep im eļļap āinwōt Mount Everest. Tōmak eo ej eddōkļo̧k ami ilo E naaj kōm̧akūt toļ ko, ejjab ko kōn dekā me rej kaiboojoj laļ in ak toļ ko an en̄taan ilo mour ko ami. Tōmak eo ami eromaak naaj jipan̄ kom̧ ukōt apan̄ ko ami n̄an eddōkļo̧k im iien eo em̧m̧an ejej uwaan.”¹²

Kar kajjitōk ippān Būreejtōn Nelson ta eo ej ļōmņak kake ilo iien kwojkwoj eo. Ekar ba wōt ruo naan ko: “E wōt”.

Jekdo̧o̧n ia eo tōmak eo ad ej pād ie, ij kallim̧ur bwe eļan̄n̄e jej doorļo̧k kein kōm̧ad ko an laļ in im kalimjōk wōt Jisōs Kraist im kalimjōk wōt n̄an kōļapļo̧k m̧wil ko An ad tōmak enaaj eddōkļo̧k, pere ko ad renaaj dikļo̧k, maron̄ eo ad n̄an iakwe kōn lōke eļapļo̧k im kallim̧ur eo naaj kanooj lōn̄ im jenaaj jeraam̧m̧an kōn “P’ko” 3: eļapļo̧k POWER (KAJOOR), eļapļo̧k PEACE (AENŌM̧M̧AN), POSPERITY (JERAAMMAN).