Ļoor Tōl Eo An Jema

Baam̧le eo aō ewōr juon aer iminene ekam̧ōņōņō. N̄an iien kakkije ko (holiday), koba ippān doon ko (reunion), ak iien ko jet raorōk, kōmij kijon̄ tak būm̧būm̧ eo waan eo ulepa jān Tongatapu, ioon ene in Tonga, n̄an juon āne dik eaiboojoj ņa etan Pangaimotu. Ijo, kōmij joļo̧k aolepān raan eo ikkure baļebo̧o̧ļ ak pool, kayak im, aaet m̧ōn̄ā im tutu.

Ilo am itakļo̧k ilo Pangaimotu, būm̧būm eo waam ej emjak itu meto in jidik m̧aļo eo, im wa ko reddikļo̧k rej ektakeļo̧k rūtto ro n̄an parijet. Ajri ro—ro rilikū im ro jeiū im jatū—kōm jab kōņaan kōttar wa eo. Rej kāālet n̄an aaō jān būm̧būm eo n̄an barijet, innām, ilo jem̧ļo̧k in tūreep eo am ekadu juon raan aitokan, rekōn aolep bar aaō ļo̧k n̄an wa eo.

Ke ikar dik, ikōn aolep iien kōņaan kobaļo̧k ippāer, bōtaab aaō eo ekar pen n̄an n̄a kōnke dān eo iturin būm̧būm̧ eo waam ekar m̧wilaļ. Ekar kamijak n̄an n̄a n̄an jab maron̄ in an̄ur laļ kōn neeō—Ikar jeļā juon men emaron̄ kar dāpij eō im kanōk laļļo̧ n̄a. Koba in ke, kōtaan eo ikōtaan parijet im būm̧būm̧ eo ekar āinwōt lukkuun ettoļo̧k. Ta eo eļan̄n̄e ikar m̧ōk m̧okta jān aō kar tōprakļo̧k ijo?

Jema ekar jeļā ewi jon̄an an aorōk men eo n̄an n̄a n̄an maron̄e kōm̧m̧ane aaō eo.

Ke aļ eo ekar jino an jok ilo bar juon raan ilo Pangaimotu, ekar ikkūrtok n̄an eō n̄an etal n̄an ippān. Ekar tōn jipan̄ eō n̄an aō tōpar ijo jān parijet n̄an būm̧būm eo.

Jema ekar etetalļo̧k ippā eļļāļo̧k jān ijōko repijpij n̄an dān ko rem̧wilaļļo̧k. Ilo iien eo wōt ikar jab maron̄ in en̄jake an neeō an̄ur laļ, ikar mijak im kajjieon̄ in alitotļo̧k ippān, bōtaab ekar jab kōtļo̧k. Illu, ekar to̧o̧r jejjo dān in kōmejaaļaļ ko, bōtaab jema ekar pād wōt ikōjaaō im kar kōketak eō n̄an aaō wōt.

Ilo juon iien, jon̄an an ļap aō aaō im bwijbwij kōn neeō, ikar en̄jake bwe ikar jab jibadōkļo̧k jabdewōt jikin. Ikar kanooj in m̧ōk! Jema ekar ilo mera elmakote bwe in ukōt jekjek in aō aaō.

Ikar kanooj in leļo̧k aō n̄an ainikien, ilo bōk kūtuwō ko aō im wōnm̧aanļo̧k, jon̄an ekar jidik wōt aō kile bwe kōm kar itakļo̧k ilo būm̧būm̧ eo.

Juon en̄jake eokmāāņeņ in tōprak ekar itok ioō ālkin aō iuweļo̧k, im ikar kile bwe juon jikin ilo aaō eo—ke ikar kalimjōk wōt aaō eo aō im ilo jema—ekar jako mijak eo aō kōn m̧aļo eo.

Ilo iiō ko, ikar kōm̧m̧ane aaō eo, etal im itok, elōn̄ alen ilo ejjeļo̧k mijak. Ta eo ekar juon iien āinwōt elukkuun in pen ekar kiiō erom lukkuun pidodo.

Ij ļōmņak kōn ekōjkan an kar jema tōl eō ilo aaō eo im̧aan tata aō ejetjet n̄an būm̧būm eo. Ekar jouj, bōtaab dim. Ekar kōtļo̧k bwe in en̄jake eppen ko n̄an n̄a make, bōtaab ekar pād wōt epaake eō ilo aolepān aaō eo. Jet iien ikar wiwijet im jum̧ae, bōtaab ekar wōnm̧aanļo̧k wōt in kōketak eō kōn kijenmej im iakwe.

Ikar jān iien eo ekkatak bwe Jemedwōj Ilan̄ ej jerbal ilo ejja wāween in wōt. E ejeļā jej pād ijin ioon laļ in n̄an ekkatak, im emakijkij, menin ej aikuj bwe jen diwōj jān ijo em̧m̧an kōjeidied ie. E ejeļā bwe elōn̄ wōt iaan apan̄ ko ad ilo mour in renaaj eppen im kōmettak, im bwe jej aikuj en̄jaki kōn kōj make n̄an ad maron̄ eddōkļo̧k, bōtaab E ej aolep iien pād ikōjāād, n̄an tōl im kōketak kōj, im n̄an jipan̄ ukōt m̧ōjņo̧ ko ad n̄an kajoor ko.

N̄e jej niknik ilo mālijjon̄ ko ad kōn ettā im tōmak, remaron̄ kepakeļo̧k kōj n̄an ippān Jemedwōj Ilan̄. Remaron̄ katakin kōj n̄an lōke ilo iakwe eo An ekwojarjar n̄an kōj im ilo ikdeelel eo An n̄an kōj n̄an tōprak. Āinwōt eo jema ekar kōm̧m̧an n̄an eō elōn̄ iiō ko remootļo̧k ilo Pangaimotu, Jemed Ilan̄ emaron̄ āāik kōj n̄an kōj ro rem̧m̧anļo̧k im jipan̄ kōj kōtōprak eļapļo̧k jān ad maron̄ kōm̧m̧ane kōn kōj make.