E Ekar im Enaaj Aolep Iien Erom Ad Tōl

Ajri ro jeiū im jatū im n̄a kar rūttoļo̧k kōn tōmak ilo Anij, bōtaab baam̧le eo am ekar jab wōr aer kabun̄. Kōm kar kōm̧m̧ani men ko am make im kar jab ļōmņak in ekkatak kōn jibadbad eo am ioon laļ in.

Innām, m̧o̧kta wōt jān aō kar juon jo̧dikdik, jet nukum raar mej, im ikar ļōmņak eļan̄n̄e inaaj ke kar bar lo er. Ij keememej jim̧m̧aō ekar kakkōl kōm n̄an jab buuļ kiki kōnke n̄e kōm mej, kōmij kiki n̄an indeeo, im menin ekar kōm̧m̧an aō kar kōņaan jeļā. Mej ekar ke juon jikin emarok an kiki indeeo?

Ke aō ekar pukōt uwaak eo n̄an ta eo ej waļo̧k ālkin ad mej, juon rūtūrū—kar juon bisop m̧okta n̄an Kabun̄ eo an Jisōs Kraist im Armej ro Rekwojarjar ilo Raan Ko Āliktata—ekar jilkintok mijenede ro jān kabun̄ eo an n̄an ioon kōm. Raar katakin leddik eo jeiū, Fiasili, im n̄a kōn gospel an Jisōs Kraist kar kōjepļaaktok im kar kwaļo̧k kadkad in n̄an kōm Karōk in Lo̧mo̧o̧r eo, eo ekar uwaake aolep kajjitōk ko aō kōn mej . . . āliktata!

Fiasili im n̄a ejjab to kar peptaij. Liin ekar 13 iiō dettan im n̄a ikar 12 wōt.

Ro jinem im jemam̧ raar m̧ōņōņō kōn kōm ilo am kobatok ilo Kabun̄ in bōtaab raar jab kōņaan m̧ōttan kōn er make. Ālkin am kar peptaij, leddik eo jeiū im n̄a kar kajjieon̄ ijo em̧m̧an tata ippam̧ n̄an pād ilo kweilo̧k ko an kabun̄ in aolep iien, bōtaab ekar jab pidodo, eļap tata kōn kareel ko rej jieik doon ilo m̧weo im̧ōm. N̄an waanjon̄ak, ekkā am kōn kāālet ikōtaan etal n̄an kweilo̧k in kwojkwoj eo im joļo̧k iien ilo Jabōt ilo piij eo ippān baam̧le eo am.

Bōtaab Fiasili im n̄a kar jerbal n̄an kōkajoorļo̧k naan in kam̧ool ko an doon. Kōm kar ļōmņak bwe eļan̄n̄e ro jinem im jemam̧ remaron̄ bōk gospel eo barāinwōt, kōmij jab aikuj in mour ilo ruo laļ ko. Kōn menin, kōm kar kajjitōk ippān mijenede ro n̄an katakin er, im ilo iien eo, ļaddik eo edik tata jatim—im elōn̄ ro rilikim me raar jokwe ippām—kar kobatok ilo kabun̄ in.

Ekar bōk jidik iien aitok n̄an ro jinem im jemam̧. Leddik eo jeiū em̧ōj kadede an kar jerbal juon mijen edipio ilo Suva, Fiji , ke jinem ekar āliktata peptaij. Ilo m̧ool eo jemam̧ ekar juon membōr eo ejeniknik ium̧win juon iien aitok, im ekar juon lan̄lōn̄ n̄an lo erro jim̧or jino itok n̄an jar ippām.

Innām ilo 2019 eo, kar kūr eō n̄an Philippines Quezon City Mijen eo. Jerbal ijo ekar āinwōt mour kōn juon ettōņak—Ikar aolep iien iakwe m̧anit eo an RiPhilippines im lukkuun kar kōņaan ekkatak kajin Tagalog. Bōtaab en̄jake in mijenede eo aō ekar barāinwōt katakin eō m̧ool in piktok in ro Jined im Jemād Ilan̄, im ke ikar ro̧o̧l n̄an m̧weo im̧ō ilo Samoa iiō eo ļo̧k, Ikar en̄jake juon ikdeelel ekajoor n̄an lo an baam̧le eo aō kar liāp n̄an doon n̄an iien im aolep indeeo.

Ekar wōr jet am jerbal n̄an kōm̧m̧ane m̧okta jān am maron̄ bōk mennin kōttōpar jab in. Ro jinō im jema raar kāāl wōt n̄an gospel eo im rej wōnm̧aanļo̧k wōt im ekkatak kōn kain̄i in lo̧mo̧o̧r ko an gospel eo. Eo jatū ekab de pukōt wōt iaļ eo an—etale eļan̄n̄e mijen ej juon men ilo ilju im jekļaj eo an—im Fiasili im n̄a kar wōnm̧aanļo̧k wōt ilo iaļ eo. Kōm kar kāālet n̄an “bun̄ m̧aanļo̧k kōn dim ilo Kraist, kōn juon kōjatdikdik emeram, im juon iakwe n̄an Anij im armej otemjej,” ilo am kajjieon̄ jipan̄ kam̧wilaļļo̧k oktak eo an baam̧le eo am.

Jet iien ij ļōmņak ekōjkan an ro jeiū im jatū im n̄a kar lo gospel eo im kar wujlepļo̧k wōt ilo aolepān iiō kein, eļap tata ilo an ro jinem im jemam̧ kar jab pād ippām ilo kabun̄ in ium̧win juon iien aitok. Kiiō ij kile bwe Jemedwōj Ilan̄ ekar tōl kōm aolepān tōre eo. Jekdo̧o̧n ilo apan̄ ko am, kōm kar en̄jake Pein ilo mour ko am kajjojo, im ijeļā bwe—ejja āinwōt An kar kōm̧m̧ane n̄an RiJared ro ilo Ether 2:7—E ejjamin naaj kakkije m̧okta jān am kar tōpar parijet ko raiboojoj an ānen kallim̧ur eo kar kōpooje n̄an kōm.