Faatuatua i le Alii o Iesu Keriso

“E le manaomia e le Alii se faatuatua atoatoa mo tatou e maua ai Lona mana atoatoa. Ae ua Ia finagalo ia tatou talitonu,”¹ o lea tatou te le manaomia ai le malamalama atoatoa e faaaoga ai le faatuatua e maua ai Lona mana.

E ofoofogia le faamautinoa mai o lenei mea ia i tatou pe a ono iai ni o tatou masalosaloga ma popolega. A tatou galulue i le faatuatua, ua tatou faaali atu i le Atua e ui lava tatou te le iloa tali i fesili uma ae tatou te naunau pea e faatuatua ia te Ia ma Ana folafolaga.

O lea, “o le faatuatua o le maliega lē faatuaoia—ma e muamua atu—i soo se tulaga e manaomia e le Atua i se taimi lata mai po o le mamao foi i le lumanai.”²

O le faatuatua o se amataga lelei tele lea o la tatou malaga—o le mataupu faavae muamua o le talalelei—ma o le faatuatua e le o le i ai lea o se malamalama atoatoa i mea, ae o le faamoemoe i mea e le o vaaia; ae tatau foi ona moni, a leai e le o le faatuatua ia.³

“O le faatuatua o le faavae lea e fausia ai se amio Atua. O se vaega muamua e manaomia mo isi amio lelei uma.”⁴

E 3 ituaiga o le faatuatua:

1. “O le fausiaina o le faatuatua e fausia e aafiaga i taimi ua tuana’i e le lauiloa lea e maua ai se faavae mo talitonuga.”

2. “O le faatuatua faaola e tele lava ina faatinoina aga’i i le poto masani i le lumana’i—o le le mailoa lea e maua ai le avanoa mo vavega.”

3. “O le faatuatua tuusa’o—faatuatua e aveesea ai mauga, le faatuatua e pei o le uso o Iareto, e muamua i le vavega ma le poto.”⁵

Po o le a lava le faatuatua o lo o tatou iai, e taua le manatua o le tuuina atu na o ni taumafaiga laiti e lē faatupuina pe fausia ai le faatuatua. Pe a tatou tuu atu ni taumafaiga sili atu pe faalauteleina a tatou taumafaiga, ua ia i tatou le agavaa e faaaoga ma tofo iai i le faatuatua sili atu.

E tauia taumafaiga uma. Na faatino e Peteru le faatuatua ina ua ia savali i luga o le vai. O nisi o i tatou atonu e fai mai e le’i umi lona faatuatua pe na le malosi tele foi ona ua amata ona ia magoto ma ua mana’omia e le Faaola ona lavea’i ia te ia, ae i lo’u iloa, e ese mai le Faaola, ua na o ia lava le tagata na savali i luga o le vai. Faafetai lava, Peteru, mo le faatinoina o le faatuatua ma le faaali mai ia i matou e mafai ona matou faia vavega pe a matou le mafaufauina.

“O le faatuatua o le mana lea e mafai ai e mea faatauvaa ona faataunuuina mea faigata.”⁶

“E manaomia le faatuatua e auauna ai i se misiona i le taimi o le faama’i oti”.⁷

Sa ou mauaina se kopi o se imeli na lafo mai ia Elder L. Taleni o lē o lo o auauna atu i le Misiona a Hamilton Niu Sila. O lenei alii talavou sa o se tagata lelei a o le’i malaga atu i lana misiona ae o le taimi nei, ua avea nei o ia o se tagata lelei tele ona o lona faatuatua i le Alii o Iesu Keriso. Faatasi ai ma lana faatagaga ou te faasoa atu ai ia te outou se vaega o lana imeli.

“O lo’u taimi i le Misiona a Hamilton Niu Sila o se aafiaga ofoofogia. Ua ou vaaia le aao o le Alii i lea taimi ma lea taimi ma e mafai ona ou molimau moni atu o lo o iai le Atua i auiliiliga . . . ‘O le tagata faalotolotolua e faaletumau ia i ona ala uma’ (Iakopo 1:8). E le mafai ona tatou maua le filemu pe a tatou talitonu i se mea e tasi ma amio faafeagai, pe afai foi e ese le olaga tatou te ola ai i luma o tagata nai lo (le olaga) o loo tatou iai patino. Ou te iloa e ala i a’afiaga ma e ala i le pule o tusitusiga paia o le auala sili lenei ona vave ona tau atu i le atuatuvale, fefe, popole, faanoanoa, ta’usalaina, maasiasi, leai se faamoemoe, ma le leai o se molimau. O le ola i se olaga faalotolotolua o le faafoliga o le ala lea tatou te le mautonu ai i o tatou ala.

“Ou te valaaulia outou ia saili le filemu moni i totonu e ala i le faateleina o taumafaiga ia faia o outou olaga lautele ma patino ia ogatasi ma aoaoga ma mataupu faavae o le talalelei toefuataiina a Iesu Keriso. O la’u taula’iga maumaututu lenei ona ua ou iloa sa faalotolotolua lo’u mafaufau i le tele o itu ma ua mafai ai e le fili ona faatama’ia lo’u filemu ma faatigaina lo’u agaga. Ae faatasi ai ma Nifae tatou te tagi atu ai ‘Ala mai ia, lo’u agaga e! Aua le toe faano’uno’u ifo i le agasala. Olioli ia, lo’u loto e, ma aua le toe faia se nofoaga mo le fili o lo’u agaga.’ Ou te valaaulia foi outou e su’esu’e ma mafaufau loloto i le 2 Nifae 4:26–28, o se mau e sili ona ou fiafia iai i tusitusiga paia.”

E manaomia le faatuatua ina ia suia ai Elder L. Taleni, ma tatou foi.

A tatou faatino le faatuatua mamā, lē maluelue⁸ ma maua mata o le faatuatua⁹ o le a tatou faatinoina i luga o musumusuga a le Agaga e tusa lava pe leai ni a tatou faamaoniga faaletino pe mautinoa.

Tau ina ia tatou faia e pei ona fetalai mai le Alii, ma “Ina soia, ma ia outou iloa o a’u lava o le Atua”¹⁰ ma faatino i le faatuatua. “O le Faatuatua ia te Ia o le a aveesea ai mauga”.¹¹

“E tofu uma i tatou ma mauga e a’ea, mauga e faato’ilaloina ma mauga lea e faigata tele ona sopo’ia ae, e ala i lou faatuatua, o le a faateleina ai e Iesu Keriso lou tomai e aveese ai mauga i lou olaga, e ui i ni ou luitau patino e ono tetelē e pei o le telē o le Mauga o Evaresi. O le faatuputeleina o lou faatuatua ia te Ia o le a aveesea ai mauga, e le o mauga o papa maa ia e faamatagofie ai le lalolagi ae o mauga o le pagātia i lou olaga. O lou faatuatua uluola o le a fesoasoani ia te oe e liua ai lu’itau i le tuputupu a’e le mafa’atusalia ma avanoa.”¹²

Na fesiligia Peresitene Nelson i sona manatu i le taimi o le faamanatuga. E na o le lua upu na ia saunoa ai: “Na’o Ia”.

Po o fea lava o iai lo tatou faatuatua, ou te folafola atu afai tatou te tuu ese mea faalavefau a le lalolagi ma taula’i atu ia Iesu Keriso ma taula’i atu i le atiina a’e o Ona uiga o le a faateleina lo tatou faatuatua, o le a faaitiitia o tatou masalosaloga, o le a faateleina lo tatou gafatia e ola ai ma le talitonu ma le mautinoa ma o le a faamanuiaina i tatou i “P” e 3: greater POWER (MANA maoa’e), greater PEACE (FILEMU maoa’e) ma le greater POSPERITY (ULUOLA maoa’e).