Aoaoga Autu o le Talalelei
O Feagaiga e Faafesootaia i Tatou ma le Atua
O le osia ma le tausia o feagaiga e aumaia ai faamanuiaga.
Mamalu i Tikeri, saunia e Annie Henrie Nader
O se feagaiga o se folafolaga i le va o le Tama Faalelagi ma Ana fanau. Na te faatulagaina tuutuuga mo feagaiga tatou te osia ma Ia. Pe a tatou faia mea ua Ia poloai mai ai, tatou te maua le tele o faamanuiaga. Ma e le na ona tatou maua o faamanuiaga i le lalolagi—pe a tatou osia ma tausia feagaiga, o le a tatou toe foi atu e nonofo faatasi ma le Atua ma o tatou aiga i le lagi i se aso.
Feagaiga ma Sauniga
Tatou te osia feagaiga i le taimi o sauniga faapitoa. E manaomia ona tatou mauaina na sauniga ma usiusitai i na feagaiga ina ia mafai ai ona toe foi atu e mau faatasi ma le Atua. O sauniga e faia i le pule o le perisitua. O na sauniga e aofia ai le papatisoga ma le faamauga, mauaina o le Perisitua Mekisateko (mo alii), ma sauniga tatou te maua i le malumalu. I le taimi o le faamanatuga, e faafou ai e tagata o le Ekalesia folafolaga na latou faia i le Atua (tagai i le Mataupu Faavae ma Feagaiga 20:77, 79).
O Feagaiga e Fesoasoani ia i Tatou e Ola Amiotonu Ai
I le taimi o le papatisoga, tatou te folafola atu e mulimuli ia Iesu Keriso, manatua pea o Ia, ma tausi poloaiga (tagai i le Mataupu Faavae ma Feagaiga 20:37). Ua folafola mai e le Atua o le a faatasi pea le Agaga Paia ma i tatou.
A maua e alii le perisitua, latou te folafola atu e ola agavaa mo le mana o le perisitua a le Atua. Ua folafola mai le Atua e faamanuia i latou. (Tagai Mataupu Faavae ma Feagaiga 84:33–40.)
O Feagaiga Tatou te Osia i totonu o le Malumalu
Atatusi o le Malumalu o Recife Pasila na saunia e James Porter
A maua e tagata o le Ekalesia o latou faaeega paia i le malumalu, ua latou folafola atu e ola amiotonu ma ositaulaga mo le talalelei. Ua folafola mai ia i latou le mana mai le Atua (tagai Mataupu Faavae ma Feagaiga 38:32; 109:22).
I le taimi o le faamauga i le malumalu, ua faaipoipoina ai se tane ma se ava mo le faavavau ma folafola atu o le a faamaoni le tasi i le isi ma i le Atua. Ua folafola mai e le Atua e mafai ona latou toe foi atu ia te Ia ma ola o ni aiga e faavavau. (Tagai i le Mataupu Faavae ma Feagaiga 132:19–20.)
O i Tatou o se Nuu o le Feagaiga
O i latou e aufaatasi ma Le Ekalesia a Iesu Keriso o le Au Paia o Aso e Gata Ai e avea ma nuu o le feagaiga a le Atua. Latou te mautofi foi i faamanuiaga ma tiutetauave o le feagaiga faa-Aperaamo (tagai Kalatia 3:27–29). O le avea ma se vaega o le nuu o le feagaiga a le Atua o lona uiga tatou te fesoasoani i le tasi ma le isi a o tatou latalata atili atu ia Keriso. O lona uiga foi tatou te galulue e faamalosia le Ekalesia a le Atua i le lalolagi. A tatou tausia a tatou feagaiga, e mafai ona tatou maua le mana ma le malosi mai le Atua.