E Na’o le Tusiga Faatekinolosi: Talavou Matutua
Sa Ou Manatu Ou Te Lei Manaomia le Inisitituti, ae na Suia Ai Mea Uma mo A’u
A o o’u tauivi e saili le upumoni, o le auai i le inisitituti o le laasaga lea sa manaomia ona ou uia e lagona ai le latalata atili atu i lo‘u Tama Faalelagi.
A o ou tuputupu ae, o le auai i le inisitituti sa le o se sini mo au. E ui ina sa faatusatusa e Elder L. Tom Perry (1922–2015) o le Korama a Aposetolo e Toasefululua le inisitituti i “se talipupuni o le puipuiga o siomia ai oe e faasaoloto ai oe mai faaosoosoga ma tofotofoga o le lalolagi,”1 sa ou manatu sa ou auai i le seminare i se tasi o taimi, ma na o le pau ai lena! Sa ou manatu na ou aoaoina mea uma ou te mafaia. Sa totoina la’u fatu o le faatuatua, ma sa ou sauni e tuputupu a’e. Sa ou manatu ua ia te a’u le malamalama uma o le talalelei sa ou manaomia e taulimaina ai le lalolagi.
Ae e lei umi ae ou mauaina faaosoosoga uma o le lalolagi ua toe pulatoa mai ia te a’u. Mo a’u, o le suiga agai i le tulaga faaletalavou matua sa lei faigofie. Na tuuina mai e le seminare ia te au meafaigaluega faaleagaga sa ou manaomia, ae sa ou le iloa pe faapefea ona faaaoga.
O nai o‘u tausaga muamua o se talavou matua sa faaaluina i le va o lo’u aiga i Niu Sila ma le Iunaite Setete. Sa i ai sa‘u sikolasipi i se kolisi i Massachusetts ma, i le avea ai ma se tagata a’oga taalo, sa ou iloa ai o lo‘u taimi ma le taulaiga sa lei taitaiina atu lava i le lotu. Ina ua lata i le faaiuga o a‘u aoaoga, ou te lei alu lava i le lotu pe faia soo se mea e faatatau i le talalelei i le silia ma le lua tausaga.
Sa ou faia ma le le iloa lo‘u vaivai i la’u taua faaleagaga e faasaga i le lalolagi.
Ma sa manumalo le lalolagi.
Ae na suia mea ina ua ou sau i le aiga i Niu Sila e faauma ai nai tausaga mulimuli o la’u a’oga. Sa amata ona ou nofo i lo‘u ta’usalaina ma le maasiasi e uiga i le faatuatuana’i o lo’u faaleagaga. Ma i le mavae o se taimi umi talu ona ou alu ese mai le talalelei, sa i ai ni a’u fesili ma ni manatunatuga e uiga i le Ekalesia lea na lofituina ai la‘u fatu laitiiti o le faatuatua.
A o ou savalivali solo i la‘u iunivesite ma lo’u ulu o loo punou, sa ou tau atu i le fale o le inisitituti. Faatasi ai ma se loto ua mamafatu ma tumu i fesili ma sina faatuatua na totoe, sa ou manatu ai ou te alu i totonu. Sa ou masalosalo i le talalelei ma sa ou musu e faananau i soo se mea e faatatau i ai le Ekalesia, ae sa ou lesitala i se vasega ma le manatu e mafai ona fesoasoani ia te a’u e maua ai sina taitaiga.
O lena vasega e tasi na amata ai a‘u i luga o se ala na suia ai lo’u olaga. Ma mai lena mea, sa ou aoaoina ai ni lesona taua se fa.
1. E Alofagia Atoatoa i Tatou
O se tasi o fesili sili ona tele sa ia te a’u ina ua ou amataina le vasega o le “Pe alofa pea le Atua ia te a’u?” Sa matua’i ou feteenai lava e uiga i filifiliga sa ou faia ina ua ou alu i le aoga. Sa ou lagonaina e pei ua ou oo i se tulaga o le le toe foi mai. Ae a o faaauau pea ona ou auai i le inisitituti i vaiaso taitasi, sa i ai lava se savali se tasi i lesona uma sa tumau ia te a’u: “E leai se tuaoi o le alofa o le Atua.”
Atonu tatou te faia ni mea sese, ae o le faamanatu mālu mai lo‘u faiaoga e alofa atoatoa lo tatou Tama Faalelagi ia i tatou o se tasi lea o mea na pito sili ona ou fiafia i ai mai vasega inisitituti taitasi o la‘u uluai semesa. Sa ou iloaina e tusa lava pe ese o tatou manatu, e alofa o Ia ia i tatou ma finagalo e taiala i tatou.
2. E Finagalo le Tama Faalelagi Ia Tatou Faia Fesili ma Saili le Upumoni
Sa tele naua au fesili e uiga i le Ekalesia ao ou tuputupu ae, ae ou te lei lagonaina lava le gafatia e faaleoina ai ona o le fefe i le faamasinoina. Ma i le avea ai ma se talavou matua, sa i ai nisi a‘u fesili.
Ina ua amata ona ou auai i le inisitituti, sa sili atu ona ou taulai atu i a’u fesili e lei taliina nai lo lo‘u faatuatua ma upumoni sa ou iloa. Ma ina ua oo mai le faama’i pipisi o le KOVITI-19 ma lofituina a’u i le popole ma le atuatuvale, sa ou tauivi ia lagona le Agaga. I le faamoemoe ai ia lagona se mea, sa ou filifili ai e tootuli ma fai se tatalo mo le taimi muamua i masina. Ae ou te lei faia se upu, sa faatumulia o’u mata i loimata a o lofituina a’u i se lagona malosi o le alofa. Sa ou aioi atu i le Alii e tali a‘u fesili uma, faamāmāina la’u avega, ma aumai ia te a‘u le filemu.
E lei leva ona uma lena tatalo, ae matou saofafai ma se tasi o le matou vasega ma lo‘u faiaoga inisitituti ma fesili mai po o a manaoga o le autalavou matutua, a o ia faamoemoe e fatuina ni vasega o le a taulimaina ai tauiviga ma fesili masani. Sa mafanafana le iloa o le tele o lona manao e fesoasoani, ma sa ou talanoa atu e uiga i o‘u lagona. A o matou talanoa i le aoauli e uiga i o matou manaoga o ni talavou matutua i le Ekalesia, sa ou maua se tali i la’u tatalo i upu a la’u uo i le vasega.
Sa ou iloaina e le na o a’u e i ai ni fesili ma e leai se mea e maasiasi ai, e pei ona sa ou mafaufau muamua i ai.
Sa ou lagonaina le siitia faaleagaga ina ua uma lena talanoaga, ma sa ou mautinoa ai mo le taimi muamua e popole le Tama Faalelagi e uiga i au fesili ma o le a Ia fesoasoani mai ia te a’u ia maua tali i le taimi e tatau ai.
3. E Mafai Ona Tatou Aoao mai Manatu Tali-Tutusa o Talavou Matutua
O talavou matutua i le Ekalesia o loo i ai i ala eseese ma e eseese o tatou manatu, ma e mafai ona faigata mo i tatou ona maua ni tulaga masani i le tasi ma le isi. Ae o le mea e tasi tatou te tutusa ai o le talalelei.
Faatasi ai ma le faatupulaia o lo‘u auai i le inisitituti, sa ofoofogia le faalogo atu i le autalavou matutua ma le tele o aafiaga tulaga ese i le mauaina o lo latou faavae faaleagaga i la latou taua faasaga i le fili.
O le faaesea sa ou lagonaina na amata ona aveesea a o o’u i ai i le inisitituti. E ala i le faaaumeaina pea lava pea ma talanoaga e uiga i le talalelei, sa ou fausia ai ni faauoga, ma o faatosinaga a nei faauoga na faamanuiaina ma musuia ai a’u e faaauau pea ona fausia lo‘u faatuatua.
4. E Tatau Ona Tatou Fausia a Tatou Lava Molimau
A o ou talavou, sa ou alu i le lotu ona sa mananao ai o’u matua. O la‘u molimau i le talalelei sa na o se ataata o a la molimau. Ae a o faaauau pea ona ou tuputupu ae ma saili le upumoni i le inisitituti, sa ou aoao ai e tu i la’u lava molimau nai lo le lafi i tua o molimau a o‘u matua. O le fatu o le faatuatua sa ou totoina i le tele o tausaga ua mavae, sa amata ona totogo a‘e talu mai a’u vasega inisitituti na maua ai le palapala ma meaai na manaomia e ola ai.
Mulimuli ane, sa faia e le inisitituti se matafaioi maoae i lo‘u liua i le talalelei a Iesu Keriso. O loo faaauau pea ona fesoasoani le inisitituti ia te a’u ia tuputupu ae lo‘u faatuatua ma ua saunia se malutaga saogalemu mo a’u e fai atu ni fesili faigata. E ui lava sa avea au ma se tagata o le ekalesia i lou olaga atoa, ae o le auai i le inisitituti ma aoao e faaaoga mataupu faavae o le talalelei i lo‘u olaga na amata moni ai la’u molimau ma, o le mea e sili ona taua, o la‘umolimau.
O le auai i le inisitituti e maua ai avanoa mo le anoanoai o faamanuiaga mo talavou matutua. Na folafola mai Peresitene Thomas S. Monson (1927-2018), “A o outou auai i le inisitituti ma suesue ma le filiga i tusitusiga paia, o le a faateleina lo outou malosi e aloese ai mai faaosoosoga ma maua le taitaiga a le Agaga Paia i mea uma tou te faia.”2
Ou te toe faamanatu ma faamamafa atu nei faamanuiaga folafolaina o le inisitituti mai lo tatou perofeta pele ua mavae. Sa amata ona faigofie atu la‘u taua faifai pea i le taumafai e taulima suiga o talavou matutua ina ua amata ona malosi atili la’u molimau i le talalelei. O le auai i le inisitituti na fesoasoani ia te au e atiina ae la‘u molimau, lea na avea moni lava ma o’u talita i le aloese mai faaosoosoga o le lalolagi, ma e ala i suesuega faifai pea o tusitusiga paia faatasi ma o’u uso a talavou nofofua matutua, sa ou vaaia ai le avea moni o le inisitituti o se polokalama musuia paia mai lo tatou Tama Faalelagi.