E Na’o le Tusiga Faatekinolosi
Faataitaia o le Faaatoatoaina
Mai se lauga i le Konafesi a Tamaitai a le Iunivesite o Polika Iaga 2021.
O le Faaola, o lona alofa tunoa ua mafai ai ona atoatoa e faavavau, tatou te maua ai avanoa e faataitai ai le faaatoatoaina i lenei olaga.
Mo le 30-ma ona tupu tausaga talu ai sa ou faataitaia ai le faaloia. Ou te manatu e i ai se mafuaaga latou te ta‘ua ai o le faataitaia o le tulafono.
Ou te lei faia lava se faatautoga atoatoa po o le faia o se suesuega atoatoa—sa i ai lava se isi fesili po o se fesili e sili atu e mafai ona ou fesiligia.
Ou te lei tusia lava se otootoga atoatoa, aua, i le toe mafaufau i ai, sa i ai lava i taimi uma se manatu sa mafai ona ou faamatala atu ma le manino atili.
Ma ou te lei tuuina atu lava se finauga atoatoa tuugutu i luma o se faamasino po o se faamasinotonu. E toetoe lava o taimi uma i le tuneva o le po ina ua uma le finauga, sa ou mafaufau ai i se mea e sili ona atamai ma faatauanau sa mafai ona ou fai atu ai.
Ae ou te talitonu o le auaunaga na ou tuuina atu i a‘u tagata sa le gata ina faamalieina ae e taua foi. Sa ou faataitaia le tulafono ma le mata agai i le suia, faaleleia, ma le faaatoatoaina. O a‘u taumafaiga, e ui sa le atoatoa, ae sa lava ona sa ou faataitaia.
Faataitaiga a Sarai
O se tasi o a‘u uo mamae i le Tusi a Mamona o Sarai. Ou te fiafia lava e faitau e uiga ia te ia i le 1 Nifae. E mafai ona ou faailoa atu o ia. O ana tali ou te malamalama moni lava i ai. Sa faataitai e Sarai le faatuatua ina ua ia tuua Ierusalema ma ana auro ma ario ma sa leai se mea na aveina atu e ia i le vao sei vagana ai lona aiga ma ni nai meaai manaomia. Ona toe manatua lea mai le mataupu 3, na miti ai Liae i se miti faapea o atalii o Liae ma Sarai e tatau ona toe foi atu i Ierusalema e aumai papatusi apamemea mai ia Lapana.
Na mamafa lea tulaga mo Sarai, e pei ona tatou aoaoina mataupu e lua mulimuli ane i le 1 Nifae 5. Ua o ese atu lana fanau tama mo sina taimi—tatou te le mautinoa lelei po o le a le umi, ae ua tatou iloa sa latou toe malaga atu i Ierusalema, o i le fale e uta uma a latou mea taua, ma faaaoga ni nai auala e aumai ai papatusi mai ia Lapana faigata. Ma sa popole Sarai!
Sa tali atu Sarai i le ala ou te manatu o le a ou faia foi. Sa popole o ia i lana fanau tama, sa faanoanoa o ia ona o i latou, sa faitio teisi o ia, ma i se tasi taimi sa ia fai atu ai se tala ia Liae atonu na ia salamo mulimuli ane ai e uiga ia te ia i le avea ma se tagata vaai.
Ae sa faatino e Sarai le faatuatua. Sa faalogo o ia i upu faamafanafana na tautala atu ai Liae ia te ia. Sa ia faataitaia le onosai. Sa ia faataitaia le faatalitali i le Alii. Sa ia faataitaia le lagolagoina o lona toalua. Ma ina ua toe foi mai ona atalii ma papatusi apamemea, sa atoatoa lona olioli! Ona ia iloa lea “ma le mautinoa” (1 Nifae 5:8) sa latou i ai i se misiona mai le Alii. O lona faataitaia o le faatuatua sa matuai faatupulaia lava, o le mea moni, sa naunau o ia e alu i luga o se vaa na fausia e ona atalii, o e sa le o ni tagata fau vaa, e folau atu i se nofoaga e le mailoa, lea na iu ina avea ma nuu folafolaina.
Sa faataitaia e Sarai. Sa ia faataitaia le faatuatua i le Alii o Iesu Keriso ma le onosai ma le tali-tiga. Sa ia faataitaia le faaatoatoaina.
Atoatoa Faaletino ma le Atoatoa Faavavau
E mafai ona tatou atoatoa i ni galuega patino. Mo se faataitaiga, e mafai ona tatou atoatoa i le faitau mai le Tusi a Mamona i aso uma. E mafai ona tatou atoatoa i le totogiina o a tatou sefuluai. Pe e mafai foi ona tatou taina sina musika ma le maelega, taina o nota uma ma le atoatoa. Ae ou te mafaufau pe o manatunatu pea se tagata musika na te taina se musika e aunoa ma se mea sese pe na sa’o le aofaiga o lagona na faaalia. Ia te au lava ia, o le eseesega i le va o le atoatoa faaletino—o le sa‘o o le taina o nota uma—ma le atoatoa e faavavau—fatuina o se pese faalelagi. O lena pese faalelagi e na o le Faaola lava e mafai ona taina ai.
Na aoao mai Peresitene Russell M. Nelson: “O loo faatali le atoatoaga. E faatoa atoatoa lona oo mai pe a mavae le Toetu ma e na o le Alii lava e ala mai ai. O loo faatalitali mai mo i latou uma o e alolofa ia te ia ma tausia ana poloaiga.”1
I le aioiga mulimuli a Moronae ia i tatou, na ia faapea mai ai, “O mai ia Keriso, ma faaatoatoaina ia te ia, ma faafiti outou lava mai mea uma e le faaleatua; ma afai tou te faafiti outou lava mai mea e le faaleatua uma, ma alolofa i le Atua ma o outou manatu atoa, mafaufau, ma le malosi atoa, ona lava lea o lona alofa tunoa e mafai ai ona outou atoatoa ia Keriso” (Moronae 10:32).
O Le Faataitaiga a sa Iareto
Manatua le uso o Iareto ma lona nuu, o e na faatonuina e fausia vaa e tusa ai ma faatonuga a le Alii? Sa laiti vaa, mama i luga o le vai, ma malu e pei o se ipu.
Ma i se faatinoga o le faatuatua maoae, sa i ai na sa Iareto i vaa sa latou fauina ma “sa tele taimi sa tanumia ai i le … sami, ona o … galu sa fati i o latou luga. … Ma … sa lei pe lava le agi mai o le matagi … ao latou i ai i luga o vai,” seia mavae aso e 344 ona latou taunuu ai lea i le nuu folafolaina. (Tagai Eteru 6:6, 8, 11, 12.)
Ae ia manatua a o lei oo atu sa Iareto i vaa mo le nuu folafolaina, a‘o latou malaga i le vao, sa latou “fauina ni vaa, ia na latou sopoia ai vai e tele, ma taitaiina ai pea e le aunoa e le aao o le Alii ”(Eteru 2:6). Sa latou faataitaia le fausiaina o vaa ma faataitaia le faatuatua i le Alii a o lei amataina la latou malaga e 344 aso. Ioe, semanu e mafai e le Alii ona taitai i latou faataamilo i na vai e tele a o latou malaga i le vao. Ae Na te lei faia! Sa Ia tuu atu ia i latou e faataitai le fauina o vaa, ma, o le mea taua, na Ia tuuina atu ia i latou avanoa e faatino ai lo latou faatuatua ia te Ia. Ou te manatu o la latou faataitaiga na saunia ai i latou mo lena malaga umi lava i le nuu folafolaina.
Ua Faia e le Faaola Ina ia Mafai ona Maua le Faaatoatoaina
O loo tatou faataitaia le faaatoatoaina e toe foi atu ai i lo tatou aiga faalelagi. Ma o le Faaola, o lona alofa tunoa ua mafai ai ona atoatoa e faavavau, tatou te maua ai avanoa e faataitaiai.
O le atoatoa i le faaletino ma le faavavau, o lo tatou faamoemoega lea. O le faataitai e faaatoatoaina ai i le Faaola. Na te faia se eseesega tele. Na apoapoai mai Peresitene Russell M. Nelson: “Sei o tatou faia le mea sili tatou te mafai ma taumafai e faaleleia atili i aso taitasi. Pe a alia’e o tatou faaletonu, e mafai ona tatou taumafai pea e faasa’oina. E mafai ona faateleina lo tatou loto faamagalo i o tatou lava faaletonu ma ia i latou tatou te alolofa i ai.” E mafai ona faamafanafanaina i tatou ma onosai.”2
Faataitai pea! Ua faamanatu mai ia i tatou e lo tatou perofeta pele, “E fiafia le Alii i taumafaiga, aua o taumafaiga e aumaia ai taui ia e le mafai ona oo mai e aunoa ma taumafaiga.”3
Ou te molimau atu e alofa le Alii ia te oe ma e finagalo ia e toe foi atu i le aiga. O le atoatoa o loo faatalitali ia te Ia ma faatasi ma Ia.