E Na’o Tusiga Faatekinolosi

Fesoasoani i Tamaiti ma le Autalavou e Atiina A’e se Mafaufau Tuputupu A’e

Saunia e Jennifer Doty, PhD, Certified Family Life Educator, ma Jessica Peterson, MSW, Licensed Independent Clinical Social Worker

E faapefea ona tatou fesoasoani i a tatou fanau ia aoao ma tuputupu a’e ma avea atili e faapei o Keriso a o lava le fetuutuunai e aoao ai mai le toilalo i le gasologa o le ala?

Ata

tamā ma le afafine o loo pati maualuga lima (high five)

I le polokalama a Tamaiti ma le Autalavou, ua uunaia ai tagata taitoatasi e saili faaaliga faaletagata lava ia a o latou faia ni fuafuaga e tuputupu a’e ai faaleagaga, faaleagafesootai, faaletino, ma faaleatamai ma avea atili ai e faapei o Iesu Keriso. E tuuina atu e matua se polokalama lagolago autu mo a latou fanau i na taumafaiga.

O nisi taimi tatou te fiafia ai e ausia sini ma fesoasoani i a tatou fanau ia faia foi faapea, ae a oo ina pisi mea uma, pe a le maua e i tatou po o a tatou fanau le uunaiga, pe afai foi e le ogatasi le olaga ma le faatutuina o sini, atonu tatou te mafaufau, Aisea e faia ai sini pe afai tatou te le ausia lava?

O se tomai autu e mafai ona tatou aoao atu ai a tatou fanau o le taulimaina lea o sini ma se mafaufau tuputupu a’e:¹ o le vaaiga tatou te aoao mai taumafaiga, tauiviga, ma e oo lava i mea sese.

Ae faapefea pe afai e feagai a tatou fanau ma faafitauli a o latou galulue agai atu i a latou sini?

O faafitauli o ni mea masani (tagai i le 2 Nifae 2:11). E faaopoopo atu i le talanoa ma a tatou fanau e uiga i le faatumutumuga o le ausiaina o sini, e mafai ona tatou talanoa e uiga i “faigata” i le malaga. O nisi taimi pe a talanoa tamaiti ma le autalavou e uiga i le faamanuiaina, e galo ia i latou o le malaga e aofia ai taimi faigata o tauiviga ina ia alualu i luma.

Talu ai nei sa talanoa ai Jessica ma se talavou matua o le sa lagonaina le lotovaivai e uiga i ni faafitauli ma tauivi ai pe faapefea ona faaauau. Sa ia faatusatusaina o ia lava i se tasi sa ia faamemelo i ai. Sa faamanatu atu e Jessica ia te ia e oo i tagata uma tulaga lelei ma tulaga faigata i a latou malaga, e oo lava ia i latou tatou te faamemelo i ai. Ona ia faailoa atu lea o lona faatuatua o le a ia ausia ana sini pe a mavae luitau.

E faapefea ona tatou fesoasoani i tamaiti e faatoilaloina se lagona le lelei o le manao ia atoatoa?

O le taumafai mo le alualu i luma e faavavau e manaomia ai se mafaufau tuputupu a’e. O le tele o taimi e le maua ai e tagata taitoatasi se vaaiga mamao ma lagona ai le mamafa o faamoemoega o isi ma lo latou lava manao e foliga mai ua latou gafatia. O lenei ituaiga manaoga o le fia atoatoa e faigata ai le faatuina o sini ma le alualu i luma, e aafia uma ai matua ma fanau.

Na faailoa mai e Elder Jeffrey R. Holland o le Korama a Aposetolo e Toasefululua e faapea, pe a tatou vaai i le poloaiga ina ia atoatoa (tagai Mataio 5:48) ma se vaaiga e lei mae’a, “tatou te toe fia foi ai i le moega ma toe pulou le ieafu.” Sa ia uunaia se vaaiga mamao mo se taimi umi, ma faalagolago i le Tama Faalelagi ma Iesu Keriso i le aluga o le ala. “Vagana ai Iesu,” Na faamanatu mai ai e Elder Holland ia i tatou, “e leai lava ni faatinoga atoatoa i luga o lenei faigamalaga faalelalolagi o loo tatou i ai, a o i ai la iinei i le olaga faaletino ia tatou tauivi mo le agai i luma tumau ae le o le faananau i le mea ua ta’ua e saienitisi o “faananauga le lelei o le fia atoatoa.’”² O le fuafuaga a le Tama Faalelagi e aofia ai le avanoa mo i tatou e aoao ai mai mea sese ma faatoilalo ai le agasala e ala ia Iesu Keriso e tuputupu a’e ai ma avea e faapei o Ia (tagai Alema 42:4, 13–15).

Afai e aoao tamaiti ma le autalavou e faalagolago i le Tama Faalelagi ma le Faaola i vaega uma o o latou olaga, o le a sili atu ona latou atiina ae a latou lava taleni paia na foaiina ia i latou. O le faatutuina o sini e mafai ona faia ai mea e sili atu nai lo o tatou gafatia. O lenei tuputupu a’e o se vaega o le fuafuaga a le Tama Faalelagi mo i tatou.

E pei ona aoao mai Peresitene M. Russell Ballard, o le Sui Peresitene o le Korama a Aposetolo e Toasefululua, “O le fuafuaga a lo tatou Tama Faalelagi pele ua aofia ai le foaiina mai ia i tatou o se olaga faaletino e ola ai, ausia mea sili atu, ma aoao lea e mafai ai ona tatou avea atili e faapei o Ia.”³ O le sailia o lenei tuputupu a’e o lona uiga o le a tatou le ausia i nisi taimi mea sa tatou mananao e ausia pe atonu foi o le taumafai i ni auala e manuia ai. Sa faamoemoe ia tatou tuputupu a’e i “lea fasifuaitau ma lea fasifuaitau” (MataupuFaavae ma Feagaiga 98:12). Ae tatou te le faia na o i tatou lena tuputupu a’e.

Ona o lo tatou Faaola—o le na faatuina le mamanu e tatau ona tatou mulimuli ai—ma Lana Togiola, e mafai ai ona tatou maua le mana gafatia e ala mai ia te Ia e faataunuu ai mea e sili atu nai lo mea tatou te mafaia na o i tatou lava. E ala i le alofa tunoa “o auala paia ia o le fesoasoani atu po o le malosiaga, ua tuuina mai e ala i le alofa mutimutivale ma le alofa o Iesu Keriso,” e mafai ona tatou “maua ai le malosi ma le fesoasoaniga e fai ai galuega lelei lea e le mafai ona [tatou] faatumauina pe a faia ia [tatou] lava auala.”⁴

A aoao tamaiti e faalagolago i le Faaola e fesoasoani ia i latou ia tuputupu a’e i aafiaga laiti ma faatauvaa i le faatutuina o a latou sini, ua latou atina ae ni mamanu o le a fesoasoani ia i latou i ni aafiaga faigata atu i le olaga ma pe a manaomia foi ona latou salamo mai agasala. O le a latou iloa le ala e liliu atu ai i lo latou Tama Faalelagi ma le Faaola mo se fesoasoani (tagai Alema 37:6–7, 36–37).

E faapefea ona tatou fesoasoani i a tatou fanau e feutagai le faagasologa o le aoaoina ma le tuputupu a’e a o lava le fetuutuunai e aoao ai mai le toilalo i le aluga o le ala?

O se tasi o auala o loo taoto lea i se mataupu e ta‘ua o le fata apefa’i.⁵ Pe a fausia se fale, o le fata apefa’i e maua ai se fausaga le tumau lea e mafai ai e le au faufale ona faaaoga e ausia ai mea maualuga fou i le faamae’aina o a latou galuega faatino. E faapena foi, e mafai ona tatou fesoasoani e tuuina atu se fata apefa’i mo tamaiti e faaaoga i lo latou atinaega faaletagata lava ia a o latou fausia ni tomai fou e ausia ai se mea e sili atu nai lo o latou tomai o i ai nei. O lenei fata apefa‘i o se vaega o le auala e mafai ai ona tatou fesoasoani e “aoao ia i le tama e tusa ma lona ala” (Faataoto 22:6). O nisi nei o mataupu faavae aoga mo le faatulagaina o fata apefa’i mo atinaega patino o lau fanau:

O amataga fou (ft., o le amataga o le tausaga aoga, aso fanau, po o le tausaga fou) o ni taimi sili ia e faatutuina ai ni sini aua ua sili atu ona faaosofia ai i tatou.
E ui o taui laiti e pei o ni faamālō po o ni opo e mafai ona fesoasoani i a tatou fanau e liliu ai a latou fuafuaga i ni mausa lelei, ae o taui tetele e pei o le mauaina o se aitema taugata mo togi lelei e ta’umamaina ai le taua o le galue malosi.⁶ Tatou te mananao i tamaiti ma le autalavou e teuloto ia lesona ma le tuputupu ae faaleagaga latou te oo i ai—le auala o latou faalatalata atili atu ai i le Tama Faalelagi ma Iesu Keriso ma le auala o loo latou atiina ae ai ni tomai sili atu e auauna atu ai i isi e pei ona Latou faia—nai lo le vaavaai mo taui i fafo atu.
O le vaevaeina o sini tetele i ni vaega e faaitiitia ai lo latou lofituina ma o le a sili atu ona ausia.
E aoga le mataupu faavae o le Goldilocks—o sini e le tatau ona faigofie tele pe faigata tele. Tatou te mananao i a tatou fanau ma le autalavou ia lava le malosi e tuputupu a’e ai, ae le o le tele o mea latou te lagona ai le le fiafia ma fiu ai.⁷
E aoao mai tamaiti mai faataitaiga, o lea o le faatuina o a tatou lava sini o ni matua ma faasoa atu le alualu i luma o loo tatou faia ia i latou o se auala sili lea e aoao atu ai le faatuina o sini.
O le fatuina o se taimi masani e iloilo ai sini o se aiga po o talanoaga taitoatasi e mafai ona fesoasoani e faatumauina ai sini i le taulaiga.
O le faamanatu atu i le tasi ma le isi o uiga taua e tusa lava po o le a le faamanuiaina e maua ai foi se vaaiga mamao.

Ae faapefea pe afai e le o faia ma faatutuina e a tatou fanau ni sini?

E mafai ona tatou fesoasoani i tamaiti ma le autalavou e mafaufau po o fea latou te mananao e i ai i le lumanai ma se leo o le fia iloa. Mo se faataitaiga, atonu e fesili matua, “O le a se mea o e faamoemoe e ausia i lenei tausaga i le aoga?” ona fesoasoani lea ia i latou e faia ni laasaga faigofie agai atu i a latou sini mo se taimi umi. Na aoao mai Peresitene Ballard: “I le aluga o tausaga, ua ou matauina ai o i latou o e aupito tele mea latou te ausiaina i lenei lalolagi o i latou ia e i ai se vaaiga mamao mo o latou olaga, faatasi ma ni sini e faatumau ai lo latou taulaiga i la latou vaaiga mamao atoa ai ma fuafuaga faataatitia i auala e ausia ai. O le iloaina o le mea e te alu i ai ma le auala ua e faamoemoeina e taunuu ai iina e mafai ona aumaia ai le uiga, faamoemoega, ma le ausiaga i le olaga.”⁸

O le isi auala o le fesoasoani lea ia i latou ia iloa mea tulaga ese e fiafia i ai ma meaalofa ua tuuina mai e le Tama Faalelagi ia i latou (tagai 1 Korinito 12:4–31; Moronae 10:8–18; Mataupu Faavae ma Feagaiga 46:8–26). Atonu e fiafia nisi e uiga i solofanua; o isi e fiafia i le soka, musika, fale faafiafia, po o le siosiomaga. O nisi tamaiti po o le autalavou atonu e alu le mafaufau e uiga i se tasi latou te faamemelo i ai i le uarota, i lou aiga, po o se galuega latou te mananao e o i ai.

O le talanoa atu ia i latou e uiga i laasaga na e faia e ausia ai le manuia ma le auala na e galue ai e ala i faanoanoaga e mafai ona fesoasoani. E ala i le lagolagoina o mea latou te fiafia i ai, tatou te maua ai se avanoa e aoao atu ai le setiina o sini ma fesoasoani ia i latou ia malamalama e fiafia le Tama Faalelagi ma Iesu Keriso e fesoasoani ia i latou e atiina ae i vaega uma o o latou olaga.