Pagtugot nga Ipatigbabaw ang Dios Labaw sa Tanan samtang Kita Nag-atubang og mga Pagsulay

Imahe

babaye nga nagtambo diha sa bintana

Niini nga isyu, si Elder Dale G. Renlund sa Korum sa Napulog Duha ka Apostoles misulat kabahin ni Job ug sa makatruma, makapausab sa kinabuhi nga mga hagit nga iyang giatubang bisan og siya usa ka maayo nga tawo. Usa sa importanteng mga leksiyon sa basahon ni Job mao kanang iyang pagsalig diha sa Dios midala kaniya hangtod nga ang pag-ayo nga naggikan sa Dios miabot. Si Elder Renlund nagpamatuod nga, “si Jesukristo ganahan mopahiuli sa unsay dili nato mapahiuli, moalim sa mga samad nga dili nato maalim, moayo sa unsay naguba nga dili na maayo, ug moganti sa bisan unsa nga dili makiangayon nga atong gilahutay” (pahina 7).

Usa niadtong kinsa nagkinahanglan kaayo niining gisaad nga tabang mao kadtong mga nakasugakod sa sekswal nga panamastamas. Sa among propesyonal nga pakigtambayayong sa mga nakasugakod diha sa terapiya, kami sa kasagaran makasugat og dili maayo nga mga sitwasyon diin ang usa ka tawo gipasakitan tungod sa pag-abuso sa gahom ug pagpamugos o tungod sa dili husto nga mga pangagpas o minos nga pagsabot kabahin sa kabubut-on, respeto, ug pagtugot sa pisikal nga pagbati ug sekswal nga kasuod.

Samtang ang Manluluwas moalim ug motanyag og paglaom sa mga nakasugakod, kita usab makatanyag og suporta, pag-awhag, ug kapuangod ngadto niadtong nag-antos sa inhustisya sa sekswal nga panamastamas. Niini nga isyu kami nagsangkap og duha ka artikulo nga makatabang:

• Sa pahina 12, gipaambit namo ang importanteng mga baroganan alang sa himsog nga mga relasyon nga gibase sa pundasyon sa ebanghelyo.

• Sa pahina 16, gitubag namo ang mga pangutana kabahin sa sekswal nga panamastamas ug mihatag og paglaom ug tabang alang sa mga biktima.

Tungod kay kami nakakita sa kasakit ug truma nga may kalabotan sa pag-atake, kami nag-ampo nga moabot ang panahon nga wala nay usa nga mapailalom sa supak sa buot nga sekswal nga pakighilawas sa bisan unsa nga matang. Kini moabot samtang ang mga anak sa Dios motugot nga ang Iyang kabubut-on mopatigbabaw diha sa ilang mga kinabuhi ug mga relasyon.

Melissa K. Goates-Jones ug Benjamin M. Ogles

Departmento sa Psychology

Brigham Young University