“Unsa ang Gitudlo Kanako sa Pag-film sa Basahon ni Mormon nga mga Video mahitungod sa Gugma sa Dios,” Liahona, Ago. 2022.
Mga Young Adult
Unsa ang Gitudlo Kanako sa Pag-film sa Basahon ni Mormon nga mga Video mahitungod sa Gugma sa Dios
Sa unang higayon, tinuoray nakong gibati ang langit dinhi sa yuta.
Ang pagserbisyo og misyon didto sa India usa ka espesyal nga kasinatian alang nako, ang usa ka hinungdan tungod kay ang akong inahan Indian. Bisan kon ang akong misyon nagkinahanglan og daghang mga pag-adjust, ang pagpahiangay sa kultura wala maapil niini—ug nasayod ko nga ang India mao ang lugar diin kinahanglan ko nga magserbisyo.
Apan bisan sa akong nasayran mahitungod sa kultura, makapahingangha gihapon nga makita ang hugot nga pagtuo ug mga pagpanlimbasog sa mga miyembro sa Simbahan didto sa India. Ang ilang kultura lig-ong gibase sa sinulti nga mga tradisyon, ug sila mao ang mga tawo nga hilig kaayo og biswal sa ilang komunikasyon ug pagkat-on, mao nga ang Basahon ni Mormon nga mga video nahimong basihan sa ilang pagtuon sa kasulatan. Gibati nila ang kamatuoran sa mga istorya samtang nagtan-aw sila niini.
Unsay nakita nako sa akong misyon mao ang serye sa ginagmay, personal nga mga milagro nga nagpamatuod nga ang Langitnong Amahan nakaila ug nahigugma sa tagsa-tagsa kanato. Ang Basahon ni Mormon nga mga video mga dinasig—usa ka paagi nga ang mensahe sa Langitnong Amahan moabot ngadto sa Iyang mga anak nga dili makadawat niini sa laing paagi.
Busa sa dihang ang akong igsoong babaye nag-email nako dihang anaa pa ko sa akong misyon ug nangutana kon gusto ba ko nga mo-apply aron mahimong extra diha sa ulahi nga mga video, nasayod ko nga nindot kaayo kini nga oportunidad sa pagkat-on pa og dugang mahitungod sa proyekto nga nakatabang niadtong akong gitudloan nga makabaton og pagpamatuod bahin sa Basahon ni Mormon.
Mga Senaryo mahitungod sa Manluluwas
Naghunahuna ko sa pagbisita ni Kristo ngadto sa mga Nephite sa daghang higayon, busa dili ikatingala nga ang pag-film niining maanindot kaayo nga bahin sa 3 Nephi mao ang akong paborito nga higayon diha sa set. Ang artista midala sa papel ni Kristo sama gayod sa gihulagway sa mga kasulatan kaniya: mipaduol sa katawhan “tagsa-tagsa hangtod silang tanan nakaduol” (3 Nephi 11:15). Gibayaw Niya sila; gipahiran Niya ang ilang mga luha; Siya mipaduol aron mogakos sa gagmayng mga bata—gibuhat Niya ang bisan unsa nga gikinahanglan sa matag tawo nianang higayona.
Ang pag-apil niana nga senaryo nakatabang nako nga makabaton og dugang nga pagdayeg sa gugma sa Dios alang sa mga Nephite. Bisan kon ang akong papel usa lang ka background nga karakter, naningkamot ko nga tukma ang akong paghulagway kon unsay gibati sa usa ka tawo niadtong higayona nga maanaa sa presensya sa Manluluwas. Ang mga tawo nga atong nabasa diha sa Basahon ni Mormon tinuod nga mga tawo nga adunay tinuod nga mga kalisdanan. Misulay ko sa paghunahuna sa unsay ilang naagian, unsa nga mga kawad-on ang ilang giantos, ug sa unsa nga paagi nga kini nga mga milagro tingali nakapakita nila nga ang Dios tinuod gayod nga nahigugma sa tanan Niya nga mga anak.
Pagbati sa Gugma sa Dios
Ang pagbati sa unsay gibati sa usa ka Nephite nakapalig-on sa akong pagpamatuod ug pagsabot sa mga istorya sa Basahon ni Mormon. Apan ang sama ka importante tingali sa akong pagpamatuod mao ang pagkat-on gikan sa laing mga artista. Isip usa ka cast nga naggikan sa lainlaing background, among nabantayan nga ang among mga dalan nagtagbo sa milagroso nga mga paagi ug pinaagi sa balaanong plano—nagpakita nako nga ang Dios nakaila ug nahigugma gayod kanato.
Gibati nako ang Iyang gugma alang sa mga Nephite samtang ako nagkat-on pa og dugang mahitungod nila ug sa ilang mga istorya. Gibati nako ang Iyang gugma alang sa Iyang mga anak didto sa India, nga Siya nasayod nga nagkinahanglan og paagi aron makat-on pa og dugang mahitungod sa Basahon ni Mormon. Ug gibati nako ang Iyang gugma alang sa matag sakop sa cast samtang nagpundok kami ug nagbuhat sa among labing maayo aron ipaambit ang among mga pagpamatuod ug ikinabuhi kini nga mga kamaturoan.
Ang gamhanan nga Espiritu ug ang gugma nga misanap sa tibuok set nakahatag kanako og usa ka tinuod nga daklit nga pagtan-aw kon unsay dagway sa Zion (tan-awa sa 4 Nephi 1:17). Kini mabati gayod nga murag langit dinhi sa yuta alang nako.
Ang akong panahon diha sa set nagtudlo nako nga kita makapangalagad sa samang paagi sa gibuhat ni Kristo—ngadto sa usa ka tawo. Sama sa gipahayag ni Presidente Russell M. Nelson: “Ang timailhan sa tinuod ug buhi nga Simbahan sa Ginoo kanunay mao ang organisado, gidumala nga paningkamot sa pagpangalagad ngadto sa indibidwal nga mga anak sa Dios ug ilang mga pamilya.”1
Samtang kita mobuhat sa unsay matarong, nasayod nga kita mga anak sa Dios ug nasayod nga ang tanan angayan nga mobati sa Iyang gugma, kita dili mosalikway sa mga tawo tungod sa ilang panagway o tungod kay lahi sila nato. Mahimo kita nga mopaambit ngadto nila sa unsay atong nasayran ug mahimong mga instrumento diha sa mga kamot sa Ginoo, mopaambit sa Iyang gugma ngadto sa tanan.