Pagsabot sa Akong Katuyoan isip usa ka Babaye diha sa Simbahan

Samtang nagsugod ko sa pag-ampo alang sa pagpadayag mahitungod sa akong tahas isip usa ka babaye, nasagmuyo ko nga kini dili mabati nga ako nagdawat og bisan unsang tubag. Apan diha sa usa ka higayon nga labihan akong naglisod, usa ka hunahuna ang misantop sa akong isipan: Kini mao ang Dios nga akong gihisgotan. Gihunahuna ba gayod nako nga wala Siya makasabot kanako? Gihunahuna ba gayod nako nga ang akong Langitnong Amahan mas nahigugma sa pipila Niyang mga anak kay sa uban?

Kanunay kong napahinumdoman nga ang Dios nahigugma sa tanan Niyang mga anak, lalaki ug babaye. Ug nagsalig ako nga ako adunay tahas nga buhaton nga maanindot ug sama ka importante niana ni bisan kinsa. Sama sa gipahayag sa Basahon ni Mormon, “[Ang Ginoo] wala maglimod kang bisan kinsa nga moduol ngadto kaniya, itom ug puti, ulipon ug gawasnon, lalaki ug babaye; … ug ang tanan managsama ngadto sa Dios” (2 Nephi 26:33).

Kini nga mga kamatuoran mitabang kanako sa pagsentro pag-usab sa akong hugot nga pagtuo. Ug ako nasayod nga kon ako nahibalo nga ang Dios hingpit nga nahigugma kanako ug nga ang Iyang tibuok nga hinungdan sa Iyang plano mao ang gugma, mas makasabot ko sa akong balaanon nga katuyoan.

Ang milabay nga pipila ka tuig midala og daghang kausaban ubos sa direksiyon sa mga propeta ug apostoles nga mimatuod pag-usab sa bili sa kababayen-an diha sa ebanghelyo ni Jesukristo.  Ang kababayen-an adunay gipalapad nga mga oportunidad nga moserbisyo diha sa mga templo ug mosaksi sa mga ordinansa, ug ang ilang mga tingog nahimong mas gipadako diha sa mga manwal, mga materyal, ug mga programa sa Simbahan sama sa bag-ong programa sa Kabataan ug Kabatan-onan.

Daghang lider sa Simbahan ang mitudlo usab kabahin sa kaimportante sa kababayen-an. Sama pananglit, diha sa Oktubre 2019 nga kinatibuk-ang komperensiya, si Presidente Russell M. Nelson miingon: “Minahal kong mga sister, ang inyong abilidad sa pag-ila sa kamatuoran gikan sa sayop, nga mahimong magbalantay sa moralidad sa katilingban, importante niining ulahing mga adlaw. Ug kami mag-agad kaninyo sa pagtudlo sa uban sa pagbuhat sa ingon. Tugoti ko nga klarohon nako kini: kon ang kalibotan mawad-an sa moral nga pagkamatarong sa mga babaye, ang kalibotan dili na gayod molambo.”¹

Pinaagi sa pagpamalandong sa bag-ohay lang nga mga mensahe gikan sa atong mga lider alang sa mga sister diha sa ebanghelyo, nahibaloan nako kon unsaon nato nga makaangkon og mas dako nga pagsabot mahitungod sa atong katuyoan.

Sa dihang ang akong manghod nga lalaki giorden nga usa ka elder, gisultihan siya nga ang gahom sa pagkapari miabot pinaagi sa pagkamasulundon sa mga sugo sa Dios. Samtang nadungog nako kadto nga mga pulong, kalit akong nakaamgo nga natandog ko uban sa igong kusog nga ako nahingangha ug miabli sa akong mga mata: Kana nga baroganan tinuod usab alang kanako, ako naghunahuna. Bisan og wala ko giorden ngadto sa usa ka katungdanan sa pagkapari, kanunay ko nga mahimong magpakabuhi sa takos nga paagi aron makabaton sa gahom sa pagkapari sa akong kinabuhi.

Si Sister Reyna I. Aburto, kanhi Ikaduhang Magtatambag sa Kinatibuk-ang Kapangulohan sa Relief Society, mitudlo:

“Ang matag babaye makadawat sa gahom sa pagkapari samtang moapil siya sa mga ordinansa sa pagkapari ug motuman sa may kalabotan nga mga pakigsaad. …

“Ang matag babaye makagamit sa gahom sa pagkapari sumala sa iyang mga pakigsaad ug personal nga pagkamatarong.”²

Sa yanong pagkasulti, ang pagkapari mao ang gahom sa Dios ug anaa alang sa tanan kinsa motuman sa ilang mga pakigsaad ug mosunod sa mga sugo. Kon takos kitang magpakabuhi ang Dios motugyan kanato sa Iyang gahom aron sa pagbuntog sa mga kalisod. Gahom sa pagkahibalo sa kamatuoran. Gahom sa pagbuhat og maayo. Gahom aron sa kataposan mahimong sama sa atong langitnong mga ginikanan ug magpuyo uban Kanila. Kining tanan nga mga panalangin maatoa kon kita mosunod ni Jesukristo.

Si Presidente Nelson mitudlo: “Minahal kong mga sister, bisan unsay inyong calling, bisan unsay inyong kahimtang, nagkinahanglan kami sa inyong hunahuna, panabot, ug sa inyong inspirasyon. Kami nagkinahanglan kaninyo nga motingog ug mamulong diha sa mga council sa ward ug sa stake. … Kamong mga sister adunay talagsaong mga kapasidad ug espesyal nga panabot nga inyong nadawat isip gasa gikan sa Dios.”³

Nagtubo ako diha sa usa ka dako nga pamilya, ug kanunay akong nagtuo nga ang pagkainahan mao ang akong kinadak-an nga tampo ngadto sa pagtukod sa gingharian sa Ginoo. Apan, ang akong bana ug ako bag-ohay lang nga nakahibalo nga gamay ra ang among mga kahigayonan sa pagdugang og mga anak ngadto sa among pamilya niini nga kinabuhi. Ang among panaw sa pagkadili makaanak hilabihan kasakit, apan ang kawalay kasegurohan sa mga pagtambal ug ang emosyonal nga kabug-at sa paghimo og lisod nga mga desisyon grabe nga makapawala og kadasig. Sa pipila ka higayon ako naghunahuna, Unsa man ang akong impluwensiya og tahas kon dili ako mahimong usa ka inahan sa paagi nga akong giplano?

Atol niini nga panaw, mapasalamaton ako alang sa ubang matinud-anon nga mga babaye sa akong kinabuhi kansang mga kasinatian nahimong lahi usab kay sa ilang giplano. Ug pinaagi sa ilang mga ehemplo, ang mensahe sa Langitnong Amahan kanako mao kini: “Ayaw paghulat. Ayaw kwestiyona kon ikaw nakabuhat o kinahanglan pa unta nga mobuhat og dugang o kon lahi ang gipili. Maghimong anaa kon asa ikaw karon. Pahimusli ang mga oportunidad sa paghigugma ug pagserbisyo niadtong naglibot kanimo.”

Samtang gisunod nako ang imbitasyon ni Presidente Nelson nga tun-an kon sa unsang paagi ang gahom sa pagkapari magamit sa kababayen-an,⁴ nakasugat ko og laing pagtulon-an gikan niya nga kanunay nakong kuhaan og kahupayan: “Ang pagtabang sa laing tawo nga makab-ot ang iyang langitnong potensiyal usa ka bahin sa balaanong misyon sa babaye.”⁵

Dili igsapayan kon makabaton ba ako og mga anak niini nga kinabuhi, ako nagtuman sa akong balaanon nga misyon isip usa ka babaye sa bisan unsang higayon nga tabangan nako ang bisan kinsa sa mga anak sa Dios nga mouswag padulong ngadto sa ilang celestial nga potensiyal. Ako adunay talagsaon nga impluwensiya kon ako motuman sa akong mga pakigsaad sa “pagbangotan uban niadto nga nagbangotan” ug “paghupay niadto nga nagkinahanglan sa kahupayan” (Mosiah 18:9). Naa gayoy—ug kanunay nga adunay—mga oportunidad sa pagserbisyo ug paghigugma niadtong naglibot kanako.

Ang akong pagsabot sa akong tahas isip usa ka babaye diha sa Simbahan ni Jesukristo nagpadayon sa paglambo. Dili pa kini kompleto, apan tungod sa mga pasiplat nga ako nang nadawat mahitungod sa akong katuyoan ug impluwensiya, ako nagtuo nga ang akong katuyoan—ug kini mamahimong—maanindot, importante, ug dunay walay kataposan nga bili diha sa mga mata sa Dios ug kanako.