Ako Kinahanglan nga Mopili

Imahe

tawo nga nag-ampo samtang anaa sa tubig nga nagsakay sa surfboard

Litrato pinaagi ni Manea Fabisch

Ang bodyboarding maoy akong gikahiligan kaayo sukad nga ako kining nadiskobrehan. Mao kini ang akong kalingawan, ang akong pangrelaks. Gikan sa sinugdanan, kanunay kong gusto nga mohawod niini.

Aron makab-ot ang labing taas nga ang-ang, magbansay ko og maayo, magsurf tibuok adlaw kon mahimo. Akong tutokan ang akong tumong na mahimong kinamaayohan nga drop-knee rider sa Tahiti. Nakadaog ko sa titulo og kaduha o katulo ka higayon niana nga kategoriya atol sa sangka sa surfing sa Tahiti Taapuna Master ingon man sa uban nga mga sangka.

Sa dihang misugod ko, ang mga panagtigi nakahatag og kahinam, ug gusto nakong ipakita sa tanan kon unsa ko kamaayo. Wala madugay, misugod ko sa pagkuha og mga tanyag gikan sa lokal ug mga isponsor sa gawas sa nasod.

Ang mga sangka sa mga final kanunayng gipahigayon sa Dominggo, ug kanunay nakong makalalis ang akong asawa kabahin sa pagduwa sa adlaw sa Ginoo. Husto siya. Ang pag-surf mikuha na og dako kaayo sa akong kinabuhi, apan dili ko gustong mawad-an sa akong mga isponsor. Ang mga isponsor nagtugot nako nga makagamit sa labing nindot, propesyonal nga mga kagamitan sa pag-surf, nga mahalon. Ako kinahanglan nga mopili.

Ang akong asawa ug mga anak nakadasig nako nga mahimong ehemplo sa hugot nga pagtuo. Mitabang sila nako nga motino unsa ang gusto nako nga mamahimo. Ug siyempre, ang akong personal nga hugot nga pagtuo, ang pagpadako nga akong nadawat gikan sa akong mga ginikanan ug mga lider, ang ehemplo sa uban kinsa nakahimo og mga sakripisyo sa pagtahod sa Igpapahulay, ug ang mga impresyon nga akong nadawat gikan sa Espiritu nakatabang usab nako sa paghimo sa akong desisyon. Mihukom ko sa paghatag og prayoridad sa akong mga responsibilidad isip usa ka bana, amahan, ug miyembro sa Ang Simbahan ni Jesukristo sa mga Santos sa Ulahing mga Adlaw.

Imahe

inahan ug amahan uban sa ilang mga anak

Litrato pinaagi ni Tetuanui Teriitemoehaa

Niadtong 2006 ang sangka nga Taapuna Master gipahinungod ngadto sa akong uyoan nga si Nelva Lee, ang manghod nga lalaki sa akong mama. Nawala siya nako atol sa usa ka dapit sa pag-surf nga kanhi nakong adtoan sa batan-on pa ko. Gitawag kini og Afu, duol sa Paea, sa isla sa Tahiti. Mga 10 minutos lang sa wala pa malumos ang akong uyoan, siya midasig nako sa paghigugma sa uban ug mahimong usa ka maayong sumasakay sa dapit duol sa Taapuna, nga iya gayod nga gimahal. Naningkamot ko sa pagtahod sa ilang kataposang tugon ngari nako.

Sa dihang mihukom ko sa paghalad sa akong tibuok kaugalingon ngadto sa Ginoo sa Dominggo, ako mipasabot sa akong mga isponsor nganong dili na ko maka-surf sa mga finals sa Dominggo. Ako misulti nila nga ang akong espirituhanon ug ang kinabuhi sa pamilya kinahanglan unahon.

Sila misuporta sa akong gipili. Agig tubag, tungod sa pagrespeto alang sa Dominggo, sila mihangyo nako sa paghimo og mga paglitrato ug mga video sa pag-surf sa ubang adlaw sa semana. Ang akong mga higala nga anaa sa lista sa dula nasayod usab ug girespeto ang akong relihiyosong pagtuo ug kasagaran mohangyo nako sa pag-ampo alang kanila.

Nadala ko alang sa mga final sa Taapuna Master sa matag tuig sukad ako nahimong propesyonal, apan mihunong ko sa pakigsangka sa Dominggo human madaog ang titulo niadtog 2006. Mosangka pa gihapon ko, apan karon, kon sila motawag sa akong ngalan sa mga final sa Dominggo, ang tanan nakahibalo nga dili ko makaadto.

Imahe

usa ka lalaki nag-surf diha sa naglukot nga mga balod

Litrato pinaagi ni Manea Fabisch

Nakahinumdom ko sa mga pulong ni Presidente Russell M. Nelson: “Ako nakat-on gikan sa mga kasulatan nga ang akong gawi ug kinaiya bahin sa Igpapahulay naglangkob og timailhan tali kanako ug sa akong Langitnong Amahan [tan-awa sa Exodo 31:13; Ezequiel 20:12, 20]. Ubos nianang pagsabot, wala na ko magkinahanglan og listahan sa angay buhaton ug dili buhaton. Kon kinahanglan nakong modesisyon nga ang usa ka kalihokan angay ba o dili angay alang sa Igpapahulay, mangutana lang ko sa akong kaugalingon, ‘Unsa man nga timailhan ang gusto nakong ihatag ngadto sa Dios?’ Kana nga pangutana nakapaklaro kaayo sa akong mga pagpili sa adlaw nga Igpapahulay.”¹

Atol sa hinapos sa 2020, nabali ang akong batiis samtang nag-surf. Samtang nagpaayo, gitawag ko nga usa ka bishop sa Papeari Ward. Ang presidente sa stake misulti nako nga ang akong ehemplo isip mahalaron nga batan-ong lalaki nga naningkamot sa pagbutang sa Ginoo og una nakapadasig sa batan-ong katawhan sa pagsubay sa dalan sa pakigsaad.

Nasayod ko nga ang akong Langitnong Amahan nalipay sa akong gipili. Labaw sa tanan, wala na gayoy ikatandi sa kalipay sa akong pamilya ug sa balanse nga dungan namong nakab-ot.