Digital Lamang: Mga Young Adult
Unsay Akong Nakat-onan gikan sa Luyo nga Laray sa Panagtigom alang sa Sakramento
Ang usa ka kasinatian diha sa panagtigom alang sa sakramento mitudlo kanako kon sa unsang paagi si Kristo nangalagad—ngadto sa usa.
Usa ka Dominggo miadto ko aron maminaw sa pakigpulong sa usa ka higala kinsa mibalik gikan sa usa ka misyon. Sa dihang miabot ko, nakaamgo ko nga wala kaayo koy nailhan nga daghang tawo diha sa kongregasyon, mao nga milingkod ko nga nag-inusara diha sa luyo sa chapel.
Sa wala madugay giapod-apod na ang sakramento. Dihay tulo lang kanamo diha sa taas nga lingkoranan sa luyo sa chapel, ako diha sa usa ka habig ug usa ka mas magulang nga magtiayon sa pikas. Hilom ko nga naglingkod didto, ug sa dihang usa sa mga deacon nga nagdala sa tubig miabot sa among laray, misibog ko paingon ngadto sa magtiayon aron ang deacon dili na kinahanglang molibot pa sa lingkoranan aron sa paghatag sa tubig kanako.
Apan tungod misibog ko, naglibog ang mga deacon kon nakadawat na ba ko sa sakramento. Human gitunol balik sa mga deacon ang mga tray ngadto sa mga priest, dihay gamayng panaghisgot tali kanila. Mitan-aw ko samtang usa sa mga priest milakaw paingon sa bishop ug nangutana kaniya, nga ang bishop positibong mitando. Nabantayan na lang dayon nako, usa ka deacon, nga adunay dala nga tray sa pan, naglakaw paingon kanako, nangutana, “Nakakuha ka sa pan, di ba?”
Dali akong mitando, ug ang deacon mibalik ngadto sa atubangan sa chapel. Sa sugod, naulaw ko nga nakamugna ako og kabalda. Apan naghunahuna dayon ko sa espirituhanon nga mga kalabotan sa sitwasyon: ang mga naghupot sa pagkapari, mga representante ni Jesukristo, nabalaka nga wala ako makadawat sa mga timaan sa lawas ug dugo ni Kristo ug mihimo og espesyal nga paningkamot aron hingpit akong makaapil sa ordinansa.
Pagkahimong usa ka Matinud-anon nga Disipulo
Ang mga aksiyon sa mga naghupot sa pagkapari atol niana nga panagtigom alang sa sakramento mipahinumdom kanako sa unsay buhaton ni Kristo diha sa susama nga sitwasyon—mohimo Siya og espesyal nga paningkamot aron Siya makapangalagad ngadto sa usa. Si Elder Joseph B. Wirthlin (1917–2008) sa Korum sa Napulog Duha ka Apostoles mitudlo nga “ang tinuod nga mga disipulo ni Jesukristo may kahingawa kanunay alang sa usa.”1
Aron mahimong sama sa Manluluwas, kinahanglan kanunay kitang mangita niadtong kinsa mibati nga nahisalaag o nakalimtan ug tabangan sila nga mobalik ngadto sa kasiyaman ug siyam. Alang niadtong kinsa naglisod, usahay ang pagkahimong usa ka Kristohanon nga ehemplo lang makaabli sa ilang kasingkasing ug mopaturok sa binhi nga nalubong sa sulod. Si Presidente Thomas S. Monson (1927–2018) miingon, “Samtang kita magsunod sa ehemplo sa Manluluwas, kita adunay kahigayonan nga mahimong kahayag sa [kinabuhi sa] uban.”2
Ang pagkahimong sama sa Manluluwas magdala og daghang oportunidad sa pagtabang sa uban nga mas magpaduol Kaniya. Kanunay akong masorpresa sa kadaghan niadtong naglibot kanako nga adunay mga pangutana mahitungod sa gipahiuli nga ebanghelyo ni Jesukristo ug moduol kanako tungod lang sa akong ehemplo. Ganahan ko sa pagtabang kanila nga mas makasabot kon kinsa kita, unsa ang atong gituohan, ug sa unsang paagi si Kristo anaa sa sentro sa tanan natong gibuhat.
Pagdala sa Iyang Ngalan ngari Kanato
Kini nga kasinatian sa sakramento nakatabang usab nako nga mas makasabot sa kabalaan sa ordinansa ug sa unsang paagi kini makapahimo kanato sa pagbag-o sa atong mga pakigsaad sa Langitnong Amahan ug mahimong mas maayo nga mga disipulo ni Kristo.
Ang mga pag-ampo sa sakramento nag-ingon, “Nga sila andam sa pagdala nganha kanila sa ngalan sa imong Anak, ug sa kanunay mahinumdom kaniya, ug maghupot sa iyang mga sugo diin siya mihatag kanila” (Moroni 4:3). Ug unsa pa ang mas maayo nga paagi sa pagdala ngari kanato sa ngalan ni Kristo, sa paghinumdom Kaniya, ug paghupot sa Iyang mga sugo kay sa pagsunod sa Iyang ehemplo sa pagpangalagad ngadto sa usa? Ang pagtinguha ug pag-ampo alang sa mga oportunidad sa pagpangita niadtong kinsa nahisalaag usa ka paagi diin kita makatuman sa atong mga pakigsaad ug makapahayag sa atong pagpasalamat alang sa Manluluwas.
Ang Ginoo mitudlo, “Ug kon kini mahimo nga ikaw manlimbasog sa tanan nimo nga mga adlaw sa pagsangyaw og paghinulsol ngadto niini nga mga katawhan, ug magdala, bisan usa ka kalag ngari kanako, unsa ka dako ang imong hingpit nga kalipay uban kaniya diha sa gingharian sa akong Amahan!” (Doktrina ug mga Pakigsaad 18:15). Bisan kon kana nga usa ka kalag usa ka sakop sa pamilya o higala kinsa nanglimbasog sa ilang pagtuo o usa ka bisita nga atong segurohon nga nahatagan sa sakramento, kinahanglan kanunay natong buksan ang atong mga mata alang sa usa.
Nasayod ako nga si Jesukristo buhi ug nagpakabana kanato, tungod Kaniya, kita mao ang usa. Ug isip bugti, kita mahimong magpakabana alang niadtong naglibot kanato ug mogiya usab nila paingon sa Iyang kahayag.