Mga Papa sa Ulahing mga adlaw
Usa ka Panalangin sa Amahan alang sa Among Nanglimbasog nga Masuso
Ang among bag-ong natawo nga anak nga lalaki dili na mabuhi og dugay, apan nasayod kami nga ang among koneksiyon kaniya magpadayon sa kahangtoran.
Ang tagsulat nagpuyo sa Utah, USA.
Litrato nga giposingan sa modelo
Daghang tuig ang milabay, ang akong pamilya malipayon nga naghulat sa pagkatawo sa among anak nga lalaki, si Randolph “Ray” Gibson. Apan ang usa ka kasagaran nga ultrasound mimugna og dako kaayo nga kabalaka kanamo.
Gihiling si Ray nga adunay hypoplastic left heart syndrome (HLHS), nga usa ka kahimtang diin ang wala nga bahin sa kasingkasing wala mitubo og tarong. Ang dugo dili makasirkular aron mogana ang kasingkasing, ug kini kasagaran makamatay alang sa masuso.
Samtang giproseso sa among pamilya kini nga paghiling, ang among mga higala ug pamilya mihalad og mga pag-ampo alang kanamo, mga pagpuasa sa pamilya, ug mga pagpahayag gayod og gugma ug pakabana. Nagpabilin kami nga malaomon. Bisan pa niana, ang usa ka follow-up nga test midala og mas makawala og kadasig nga balita: ang HLHS ni Ray hilabihan ka grabe.
Ang maluluy-on nga medikal nga mga propesyonal mihisgot sa among mga opsiyon uban kanamo. Ang pagtapos sa pagmabdos dili usa ka desisyon nga among ikonsiderar. Apan kinahanglan namong ibalanse ang pangandoy nga mabuhi ang among anak nga lalaki—bisan unsa pa ka hanap ang kalagmitan—batok sa kasakit nga iyang antoson gikan sa mga pagsulay sa pag-ayo sa iyang kasingkasing. Ang mga paningkamot nga ipabiling buhi si Ray lagmit mosangpot ngadto sa usa ka kinabuhi sa pag-antos ug sa kamatayon sa bata kaayo nga edad.
Ang akong asawa, si Kati, ug ako mainampoong mihimo og lisod kaayo nga desisyon. Among timbayaon ang among anak nga lalaki dinhi niini nga kalibotan, ipabilin siya nga komportable, ug tugotan siya nga mamatay nga malinawon. Ang among pasalig ngadto sa ebanghelyo ni Jesukristo ug ang among pagtuo diha sa plano sa kaluwasan nakatabang kanamo sa paghimo niini nga pagpili. Dili kadto sayon nga magsud-ong sa among anak nga lalaki nga midako diha sa tagoangkan, nga nahibalo nga ang iyang kamatayon mahitabo human sa pagkatawo. Nabalaka usab kami kon unsaon pagsagubang sa among dos anyos nga anak sa paghimamat og masuso nga igsoong lalaki ug dayon motambong sa iyang lubong paglabay sa usa ka semana.
Nalig-on kami sa pamahayag sa Ginoo nga “ang gagmay nga mga bata mga balaan, gisantos pinaagi sa pag-ula ni Jesukristo” (Doktrina ug mga Pakigsaad 74:7).
Si Kati ug ako makapanghimatuod nga ang tuig diin kami naghulat sa pag-abot ni Ray mitabang kanamo nga makasabot sa tinuod nga kahulogan sa usa ka bana ug asawa nga nag-unongay ngadto sa usag usa (tan-awa sa Genesis 2:24 ug Doktrina ug mga Pakigsaad 42:22). Misuporta kami sa usag usa, nga mitugot sa among gugma ug pagsalig sa pagtabang kanamo nga makalahutay. Gipahayag gayod namo ang among mga pagbati ngadto sa Dios, nangayo og kusog nga makapadayon ug sa pagpanalangin sa among pamilya latas niini nga kalisdanan. Nahimong mas lig-on ang among kaminyoon.
Sa wala pa matawo si Ray, nahibaloan namo nga suhi siya. Nabalaka ang mga doktor nga dili siya makalahutay sa kaugtas sa normal nga paghimugso, mao nga mipahigayon sila og C-section nga pagpanganak. Pipila ka minuto human sa paghimugso, ako, uban sa akong bishop ug pipila ka ubang tawo, mihatag ni Ray og panalangin sa pagkapari gawas sa lawak operahanan. Atol niining gubot, makaugtas kaayo nga sitwasyon, misulti ako og pipila ka kapahayag ug mitapos “sa ngalan ni Jesukristo, amen.” Si Ray gihugasan dayon, giputos, ug gidala ngadto sa iyang pamilya diha sa lawak sa ospital.
Alang sa kahupayan, misulay ako sa paghinumdom sa mga pulong sa panalangin, apan dili gayod nako mahinumdoman.
Nabuhi si Ray sulod sa 24 oras ug 16 minutos. Napuno ang lawak sa ospital sa pamilya ug mga higala atol sa adlaw, nga migunit ni Ray ug mihigugma kaniya. Dili kadto katuohan nga kasinatian—ang bugtong adlaw nga makauban namo ang among anak nga lalaki. Gimahal nako ang paggunit kaniya, paghalok kaniya, ug pag-ilis sa iyang mga diaper.
Pagkasunod buntag namatay ang among anak nga lalaki. Gigunitan namo siya ug gihigugma gayod siya og maayo sa iyang kataposan nga oras.
Usa ka semana ang milabay, desperado kaayo kong makahinumdom sa panalangin. Daghan na kaayo ang nahitabo. Ang panalangin milungtad lang og pipila ka minuto, apan dili nako mahinumdoman ang mga pulong nga akong gisulti niana nga buntag.
Miluhod ako ug nangayo og milagro, bisan og wala ako masayod nga adunay moabot. Human sa pag-ampo, mikuha ako og lapis, ug dayon ang mga pulong sa panalangin misantop sa akong hunahuna.
Kini nga kasinatian mipalig-on sa akong hugot nga pagtuo nga nipis ang tabil taliwala sa kinabuhi ug sa kinabuhi sa pikas ug nga kita mahimong magpabilin nga konektado ngadto sa mga sakop sa pamilya nga dili na nato kauban.
Nakasaksi ako og milagro. Nasayod ako nga ang akong anak nga lalaki adunay mahinungdanon nga bahin niana nga milagro.
Ang akong asawa ug ako nahupay gihapon sa saad nga makita diha sa Mga Taga-Roma 8:18: “Giisip ko nga ang atong mga pag-antos niining panahona dili gayod ikatandi sa himaya nga ipadayag unya kanato.”