Kam Moa Kolosap long Sevya
Blong stap lukaotem blong save mo lavem Sevya wetem ful hat blong yumi, yumi seperetem yumi aot long wol tru ol kavenan wetem God, blong man i save luksave yumi, we yumi defren, mo spesel, taem yumi givim ona long Hem mo ol tijing blong Hem, be i no seperetem yumi long olgeta wetem defren bilif.
Ol dia brata mo sista blong mi. Tunaet mi toktok long olgeta we oli simpol mo komitim olgeta blong folem Jisas Kraes. Taem mi stap luk ol gud samting long laef blong yufala mo fet blong yufala long Sevya blong yumi long kantri ia mo truaot long wol, i mekem mi lavem yufala moa.
Long en blong Ministri blong Hem, ol disaepol blong Jisas oli bin askem Hem blong tokbaot “saen blong [Seken kaming blong Hem], mo abaot en blong wol.”1
Jisas i bin talem long olgeta abaot wanem we bae i hapen stret bifo Hem i kambak mo long en Hem i se, “Taem we bae yu luk ol samting ia, [bae yu] save se, [taem ia] i stap kam kolosap.”2
Long las jeneral konfrens, mi bin lisin gud long toktok blong Presiden Henry B. Eying: “Wanwan long yumi,” hem i talem, “weaples yu stap long hem, save se yumi stap long wan taem we i fulap long denja. … . … Eniwan we i gat ol ae blong luk ol saen blong ol taem mo i gat sora blong harem ol toktok blong ol profet, i save se hemia i tru.”3
Sevya i glad long ol fetful disaepol blong Hem: “Be yufala ia, yufala i save harem gud from we yufala i save luk ol samting ya: mo yufala i save harem ol tok ya.”4 Bae blesing ia i blong yumi taem yumi lisin gud long ol toktok blong Lod tru long ol profet blong Hem long konfrens ia.
Gudfala Gras mo Rabis Gras
Lod i eksplenem se, long en blong taem, bifo Hem i kambak, ol “gudfala gras,” we hem i tokbaot se oli olsem “ol pikinini blong kingdom,”5 bae oli gro saedsaed wetem ol “rabis gras,” o olgeta we oli no lavem God o oli no stap kipim ol komanmen blong Hem. Bae tufala i “gro tugeta”6 saedsaed long tufala.
Hemia bae i wol blong yumi, kasem we Sevya i kambak, we i gat plante gud samting mo plante nogud samting long evri saed.7
Samtaem bae yu filim se yu no strong, olsem wan pat blong gudfala gras. Gat fasin blong save wet longtaem wetem yuwan. Lod i bin talem se sam bae oli olsem ol niu sut blong sid.8 Yumi evriwan yumi Ol Lata-dei Sent blong Hem, mo nomata yumi no kam yet huia yumi wantem kam, be yumi sua se yumi wantem blong stap ol tru disaepol blong Hem.
Mekem Fet blong Yumi I Kam Strong Moa long Jisas Kraes.
Yumi luksave taem rabis fasin i stap kam antap long wol, yumi we yumi stap traehad blong laef long saed blong spirit, mo olgeta we oli traehad tu blong laef we yumi lavem, bae i nid blong yumi lukaotem gud olgeta, givim paoa long olgeta, mo mekem ol rus blong fet blong yumi long Jisas Kraes i kam strong moa. Aposol Pol i bin givim kaonsel long yumi blong lavem ol man olsem we rus blong tri i holemtaet graon,9 olsem we haos i fas strong long graon, we i stanap long10 tru lav blong yumi long Sevya mo strong tingting ia blong folem Hem. Tedei mo ol dei we i stap kam i nidim blong lukluk moa mo traehad moa blong protektem yumi agensem ol rong rod mo fasin blong no stap kea.11
Be nomata wetem plante rabis paoa blong wol we i stap kam antap raon long yumi, yumi nidim blong no fraet. Lod bae i neva lego ol kavenan pipol blong Hem. I gat wan sapot paoa long saed blong spirit mo daereksen we i tabu blong olgeta we oli stret mo gud.12 Be blesing ia blong paoa long saed blong spirit we oli ademap, oli no givim long yumi from se yumi pat blong jeneresen ia. I kam taem yumi mekem fet blong yumi long Lod Jisas Kraes i kam strong moa mo yumi kipim ol komanmen blong Hem, taem yumi kam blong save mo lavem Hem. “Hemia i laef we i no save finis,” Jisas i prea, “blong oli save yu we yu nomo yu tru God, mo i save mi, se mi, Jisas Kraes, we yu yu sanem mi mi kam.”13
Olsem we yumi save gud se blong stap wan tru disaepol blong Jisas Kraes mo blong gat fet long Hem, i moa bitim wan desisen we yu mekem wantaem—moa bitim wan wantaem program. Hem i wan tabu proses we i gohed nomo mo i stap gro mo go bigwan truaot ol defren taem long laef blong yumi, mo bae i gohed olsem kasem taem we yumi nildaon long saed blong leg blong Hem.
Wetem ol gudfala gras we i stap gro long medel blong ol rabis gras blong wol, ?hao nao bae yumi dipen mo komitim yumi strong moa long Sevya long ol taem we i stap kam?
Hemia tri tingting:
Draonem Yumiwan long Laef blong Jisas
Faswan, yumi save draonem yumiwan moa long laef blong Jisas fulwan, ol tijing blong Hem, Hem we i hae, paoa blong Hem, sakrifaes mo atonmen blong Hem. Lod i talem se, “Lukluk long mi long evri tingting.”14 Aposol Jon i rimaenem yumi, “Yumi stap lavem God, from we God i lavem yumi fastaem.”15 Taem yumi eksperiensem lav blong Hem moa, bae yumi kam blong lavem Hem moa, mo long nomol wei, stap folem gud moa eksampol blong Kraes blong gat lav mo kea long olgeta wetem nid. Wetem evri stret mo gud fasin we yumi soem long Hem, yumi luk Hem moa klia.16 Yumi laekem Hem mo yumi traem long evri smol wei blong yumi, blong folem Hem.17
Mekem Ol Kavenan Wetem Lod
Nambatu, Taem yumi stap save moa gud mo lavem Sevya, yumi wantem blong promesem Hem moa komitmen mo tras blong yumi long Hem. Yumi mekem ol kavenan wetem Hem. Yumi statem wetem ol promes blong yumi long taem blong baptaes, mo yumi konfemem ol promes ia mo ol narawan taem yumi sakem sin evri dei, askem fogivnes, mo no save wet blong tekpat long sakramen evri wik. Yumi promes se “bae yumi tingbaot Hem oltaem, mo bambae yumi obei ol komanmen blong Hem.”18
Taem yumi rere, yumi akseptem ol odinens mo ol kavenan blong tempol. Blong stap filim paoa blong laef we i no save finis long ol tabu, kwaet taem insaed long haos blong Lod, wetem glad yumi mekem kavenan wetem God mo tingting strong moa blong kipim olgeta.
Blong stap mekem mo kipim ol kavenan i letem lav blong Sevya i go moa dip insaed long hat blong yumi. Insaed long Liahona, blong manis ia, Presiden Russell M. Nelson i se: “[Ol] kavenan blong [yumi] bae i tekem yumi go kolosap mo moa kolosap long Hem. … God bae i no lego rilesensip we Hem i gat wetem olgeta we oli traehad blong joen wetem Hem.”19 Mo olsem Presiden Nelson i bin talem long wan naesfala wei long moning ia se, “Wetem dedikesen blong wanwan niu tempol, i givim moa paoa long saed blong god i kam long wol blong mekem yumi kam strong moa mo save fesem bigfala fos blong enemi.”20
?Yumi save luk from wanem Lod bae i lidim profet blong Hem blong karem ol tabu tempol i kam moa kolosap long yumi mo letem yumi go plante taem long haos blong Hem?
Taem yumi go insaed long tempol, yumi fri blong wan smol taem aot long paoa blong wol we i stap agensem yumi, taem yumi lanem stamba tingting blong laef mo presen ia we i no save finis tru long Sevya blong yumi, Jisas Kraes.
Lukaotem Gud Presen Ia We I Tabu Spirit
Mo laswan, nambatri tingting blong mi, insaed long tabu responsabiliti ia, yumi tritim gud, protektem, difendem mo lukaotem gud presen ia we i Tabu Spirit. Tugeta Presiden M. Russell Ballard eli tedei, mo Elda Kevin W. Pearson we i jes toktok nomo, tufala i bin tokbaot woning blong profet we Presiden Nelson i bin givimaot mo mi laekem blong ripitim bakegen: “Bambae i no posibol blong stap traehad blong laef long saed blong spirit, sapos yumi no gat paoa blong Tabu Spirit oltaem blong lidim, daerektem, mo kamfotem yumi.”21 Hem i wan presen we i kam long God. Yumi mekem bes blong yumi blong protektem ol evri dei eksperiens blong yumi, blong paoa blong Tabu Spirit i save stap wetem yumi. Yumi stap wan laet long wol, mo taem i gat nid, yumi jusum blong wantem stap defren long ol narafala man. Presiden Dallin H. Oaks i bin askem i no longtaem i pas long ol singgel adalt: “[Yufala] i gat strong tingting blong stap defren? … [Speseli] ol impoten … joes we yu stap mekem long laef blong yuwan. … ?Yu stap go fored agensem wol blong oposisen?”22
Jusum blong Stap Defren long Wol
I no longtaem long wan sosol media pos, mi bin askem sam disaepol blong serem ol joes we oli bin mekem we i nidim olgeta blong stap defren aot long wol. Mi bin kasem handred ansa.23 Hemia samfala nomo:
Amanda: Mi mi wan nes, mo mi stap wok long wan lokol prisen haos. Mi traem blong lukaotem gud ol prisena olsem we Kraes bae i mekem.
Rachel: Mi mi stap singsing long opera, mo plante taem i no impoten long wanem bae oli givim long mi blong werem, nomata i no folem fasin blong dresap gud. [From se mi kasem endaomen blong mi,] mi talem long [ol prodiusa] se klos blong mi i mas folem [fasin blong dresap gud]. Oli no bin hapi … be nomata hemia, oli gohed mo akseptem. Bae mi no save givimaot pis ia we i kam taem mi stap olsem wan witnes blong Kraes oltaem.
Chriss: Mi mi wan Alkolik (i stap kam oraet yet), mi klin inaf blong go long tempol, mo memba blong Jos. Mi no stap kwaet abaot ol eksperiens blong mi wetem adiksen mo kasem wan testemoni abaot Atonmen [blong Jisas Kraes].
Lauren: Mi bin stap raetem wan skits wetem ol klasmet blong mi long hae skul. Oli wantem mi blong kamaot long kwaet fasin blong mi mo aktem wan we i stap swea. Oli gohed blong fosem mi, be mi no wantem mo stanap strong nomo.
Adam: Plante man i no wantem bilivim mi taem mi talem se mi obei loa blong jastiti mo jusum blong stap longwe long ponografi. Oli no andastanem gud saed ia blong glad mo pis we mi kasem long maen blong mi.
Ella: Papa blong mi i wan memba blong LGBTQ komuniti. Oltaem mi traem blong respektem ol filing blong ol narafala man taem mi stap olsem wan witnes blong Kraes mo stap tru long wanem mi biliv long hem.
Andrade: Mi disaed blong gohed blong go long jos taem famli blong mi i disaed blong nomo go.
Mo laswan, i kam long Sherry: Mifala i bin atendem wan program long haos blong gavna. Oli stat blong pasem waen blong mekem wan “tos.” Mi askem strong blong oli givim wota, be wokman ia i talem se hemia i save go agensem tingting blong gavna. Mifala i mekem “tos” long gavna mo mi leftemap glas blong wota blong mi i go antap. Hemia i no agensem tingting blong Gavna.
Presiden Nelson i se, “Yes, yu stap laef long wan wol, be yu gat wan standet we i defren tumas long wol blong helpem yu kamaot long ol mak blong wol.”23
Anastasia, wan yang mama blong Yukren, i bin stap long hospital mo bonem wan bebi boe long taem ia we bigfala bom i bin stat bosta long Kiv long manis blong Febwari. Wan nes i bin openem doa long rum blong hospital mo talem wetem wan hariap voes, “Tekem bebi blong yu, kavremap hem long wan blanket mo go long holwei—!naoia!”
Afta, Anastasia i komen:
“Mi neva ting se ol fas dei blong mi olsem mama bae i had olsem, … be … mi stap lukluk nomo long … ol blesing mo merikel we mi bin luk. …
“Naoia, … mi ting se i no isi blong fogivim olgeta we oli mekem trabol ia mo prapa spolem ol ples … ,be olsem wan disaepol blong Kraes, mi gat fet se bae mi save [fogiv]. …
“Mi no save evri samting we bae i hapen long fiuja, be mi save se taem yumi kipim ol kavenan blong yumi bae Spirit i save gohed, … blong stap wetem yumi, … mo i mekem se yumi save filim glad mo hop, … iven long taem blong hadtaem.”25
Promes blong Laef We I No Save Finis mo Selestiel Glori.
Ol brata mo sista blong mi. I bin wan blesing long mi blong kasem bigfala lav ia blong Sevya blong yumi we yumi lavem, Jisas Kraes. Mi save Hem i laef mo i lidim ol tabu wok blong Hem. Mi nogat evri toktok blong soemaot lav blong mi long Hem.
Yumi evriwan yumi ol “pikinini blong kavenan” truaot long wol, long ol nesen mo kalja, long evri kontinen, we namba blong yumi i stap long ol milian, taem we yumi stap wet long bigfala kambak blong Lod mo Sevya blong yumi. Blong stap saen olsem wan laet long olgeta raon long yumi, yumi save gud wanem yumi wantem, ol tingting, ol joes mo ol aksen blong yumi. Blong stap lukaotem blong save mo lavem Sevya wetem ful hat blong yumi, yumi seperetem yumi aot long wol tru ol kavenan wetem God, blong man i save luksave yumi, we yumi defren, mo spesel, taem yumi givim ona long Hem mo ol tijing blong Hem, be i no seperetem yumi long olgeta wetem defren bilif.
Hem i wan bigfala wokbaot blong stap ol gudfala gras long medel blong ol rabis gras, samtaem wari wetem hat i soa, be oltaem i kam kwaet tru long fet blong yumi we i gro mo i tru. Taem yu letem lav blong yu long Sevya mo lav blong Hem long yu i draon gud insaed long hat blong yu, mi promesem yu moa tras, pis, mo glad taem yu stap fesem ol jalenj long laef blong yu. Mo Sevya i promesem yumi: “[Bae] mi mas karem ol pipol blong mi oli kam wanples, folem parabol blong gudfala gras mo rabis gras, blong mekem se gudfala gras i stap gud long ol sef haos blong kasem laef we i no save finis, mo blong oli kasem wan hat blong king long selestial glori.”25 Long nem blong Jisas Kraes, amen.