Lukluk Nomo long Tempol
Mi promes se taem yu spendem moa taem long tempol, bae i blesem laef blong yu long ol wei we i no gat nara samting i save mekem.
Ol dia brata mo sista, long taem blong ol naesfala faef sesen blong jeneral konfrens ia, yumi eksperiensem bakegen se !ol heven oli open! Mi prea se yu bin rekodem ol filing mo tingting blong yu mo bae yu folem olgeta. Papa blong yumi long Heven mo Pikinini blong Hem, Jisas Kraes, tufala i stanap mo rere oltaem blong helpem yu. Mi askem strong long yufala blong traehad moa blong lukaotem help blong Tufala.
I no long taem i pas, Sista Nelson mo mi i bin gat janis ia blong lukluk niu sisen blong Ol Vidio blong Buk blong Momon seris.1 !I bin givim insperesen long mitufala! Bae mi soem long yufala wan smol pat blong vidio ia we i soem taem Sevya i kamkamaot long Ol Man blong Nifae.
Hem i impoten tumas se Sevya i bin jusum blong kamkamaot long ol pipol long tempol. Hemia i haos blong Hem. Hem i fulap wetem paoa blong Hem. Bae yumi mas luksave wanem we Lod i stap mekem blong yumi naoia. Hem i stap mekem i moa isi blong ol man i save go long ol tempol blong Hem evri ples. Hem i stap hariap blong mekem yumi bildim ol tempol. Hem i stap givim moa paoa long yumi blong karem Isrel i kam tugeta. Hem i stap mekem i moa isi tu blong wanwan long yumi i kam moa gud long saed blong spirit. Mi promes se taem yu spendem moa taem long tempol, bae i blesem laef blong yu long ol wei we i no gat nara samting i save mekem.
Naoia i stap, !yumi gat 168 tempol we oli stap wok mo 53 niu tempol we oli stap bildim, mo wan nara 54 tempol we oli stap disaenem yet!2 Mi glad tumas blong anaonsem ol plan blong mifala blong bildim wan niu tempol long ol ples ia: Busan, Korea; Naga, Filipin; Santiago, Filipin; Eket, Naejeria; Jiklaeo, Peru; Buenos Aires Siti Senta, Ajentina; Londrina, Brasil; Ribeirao Preto, Brasil; Huehuetenango, Gwatemala; Jaksonvil, Florida; Grand Rapids, Mijigan; Prospa, Teksas; Lon Maonten, Nevada; mo Takoma, Wasington.
Mifala i stap plan tu blong bildim sam moa tempol long ol bigbigfala eria ia from taem blong travel i go long ol tempol we i stap, i wan jalenj. From hemia, mi glad blong anaonsem fo moa ples kolosap long Meksiko Siti long ples we bae oli bildim ol niu tempol ia long, Cuernavaca, Pachuca, Toluca, mo Tula.
Ol dia brata mo sista blong mi, bae yufala i lukluk moa long tempol long ol wei we yufala i neva mekem bifo. Mi blesem yufala blong gro moa kolosap long God mo Jisas Kraes evri dei. Mi lavem yufala. Bae God i stap wetem yufala kasem taem yumi mit bakegen, mi prea olsem long tabu nem blong Jisas Kraes, amen.