« Te māramarama o te ao », Liahona, Tēnuare 2023.
Mānava ia ’oe i roto i teie ve’a
Te māramarama o te ao
Tuha’a nō Focus on Joy [Rōtahi i ni’a i te ’oa’oa], nā Michael T. Malm
’A rātere ai tātou nā roto i teie orara’a i ni’a i te fenua nei, e fa’aruru tātou i te mau fifi, mai te vaira’a fifi mau nō te ’utuāfare. E nehenehe teie mau fifi e fa’atupu i te mana’o ē ’ua fa’aru’ehia tātou, ’e te mana’o taiā ’e te mana’o ’aravī. Mai te mea e fāriu atu tātou i ni’a i te puna mau nō te māramarama, ’oia ho’i te Fa’aora Iesu Mesia, e nehenehe ïa tātou e rātere maita’i a’e nā roto i tō tātou mau vaira’a fifi.
I roto i teie ve’a, tē fa’ata’a nei te peresideni M. Russell Ballard i te mau rāve’a e ’ite ai tātou i tō tātou ’ē’a nā rotoroto i te mau fifi. Tē nā ’ō ra oia ē : « E ’īriti ’ē [te māramarama o te Mesia] i te mau ata o te ao nei i rotopū ia tātou ’e i tō tātou ferurira’a » (’api 4).
’Ei tahu’a a’o tahito i te pae nō te fa’aipoipora’a ’e te ’utuāfare, ’ua tauturu vau i te mau ’utuāfare e rave rahi tei fa’aruru i te mau fifi rahi mau. Te mau ’utuāfare tei rave i te taime i te mau mahana ato’a ’ia ti’a mai te Mesia i roto i tō rātou orara’a, e ’itehia ïa ia rātou te hoara’a o tōna māramarama ’e tōna here ’a ’aro ai rātou i tā rātou mau ’arora’a. Tē fa’a’ite nei au i te tahi o te reira mau ’ā’amu i roto i tā’u parau ve’a i te ’api 8.
Tē māuruuru nei au nō te rāve’a mo’a tā’u i fāri’i, nā roto i tā’u ’ohipa, ’ia hi’o i te mau ’utuāfare ’e te mau ta’ata ’ia ’āmui i te Fa’aora i ni’a i te ē’a nō te rirora’a ’ei nūna’a nō Ziona (hi’o Mose 7:18). Ma’a vāhi iti ri’i nō te ra’i tā’u e ’ite nei i te mau taime ato’a e ’ite vau i te rima o te Fatu i roto i te orara’a o te hō’ē ta’ata.
Māuruuru,
Christy Monson