Aupuru ma te ’ite rahi a’e

’A tupu ai te Fa’aora i te rahi, « Tupu atura taua tamaiti ra ’e itoito atura i te ’ā’au ’ī a’era ho’i i te pa’ari ’e tē vai ra te maita’i a te Atua i ni’a iāna » (Luka 2:40). Te aura’a nō teie ta’o tupu o te tupu-marū-noa-ra’a ïa, mai te marama ’e ’ati roa atu i roto i te roara’a o te ’āva’e. ’Ua parau ato’a o Luka ē ’ua « tupu atu ra Iesu i te rahi ’e te pa’ari, ’e te herehia mai e te Atua ’e te ta’ata ato’a » (Luke 2:52). ’Aita Iesu i fāri’i tā’ue noa i te ’īra’a o te ’ite—’ua fāri’i ’oia i te reira i te roara’a o te tau (hi’o Te Ha’api’ira’a Tumu ’e te mau Fafaura’a 93:12–14).

I te 12ra’a o te matahiti o Iesu, ’ua ’ite tōna nā metua iāna i roto i te hiero—te vāhi tumu nō te ha’amorira’a i Ierusalema—« tē pārahi ra i rōpū i te mau ha’api’i ture, ’e tē fa’aro’o ra rātou iāna, ’e tē ui atura iāna i te mau uira’a » (’Īritira’a a Iosepha Semita, Luka 2:46 [i roto Luka 2:46, nota raro c]). Nō te mea ’ua riro te ha’api’ira’a mai ’ei tuha’a faufa’a rahi nō tōna tupura’a i te rahi, i te taime ’a ha’api’i ai ’oia i te feiā i roto i te hiero, ’ua ineine ’oia. ’Ua fa’atupu tāna ha’api’ira’a i reira i te hō’ē ’ohipa māere rahi i ni’a ia rātou ’e i ni’a i tōna nā metua.

Teie e toru rāve’a e nehenehe ai te fa’atupura’a i te huru Mesia o te ’ite e tauturu ia tātou i roto i tā tātou aupurura’a :

1. ’A mātau ai tātou i te Fa’aora ’e ’a ha’api’i mai ai tātou nō ni’a i tōna mau hīro’a, e ’ite maita’i a’e tātou e aha tāna e rave nō te tāvini nō te mono ia tātou.

2. ’A rahi noa ai tō tātou ’ite ’e te hāro’aro’ara’a i te ’evanelia, e vai mai ïa tātou i ni’a i te hō’ē ti’ara’a maita’i a’e nō te Vārua Maita’i nō te fa’aha’amana’o ia tātou i te mea e hina’arohia e tātou ’ia hina’aro ana’e tātou i te reira (hi’o Ioane 14:26). E nehenehe te reira e tauturu ia tātou ’ia māramarama i te mau hina’aro o te feiā tā tātou e aupuru nei ’e e pāhono i tā rātou mau uira’a ’aore rā mau māna’ona’ora’a.

3. ’A fa’arahi ai tātou i tō tātou ’aravihi nō te ha’api’i mai, e rahi atu ïa tō tātou ’aravihi i te tū’ati ’e ’aore rā, i te tāvini ia vetahi ’ē. E nehenehe tā tātou e ha’api’i rahi atu ā nō ni’a i te hō’ē tumu parau nō te tū’ati atu i te hō’ē hoa e ’ana’anatae ra i te reira. ’Aore rā e ha’api’i mai paha tātou i te tahi mau ’aravihi ’o tē nehenehe e tauturu i te pāhonora’a i te hō’ē hina’aro.

E nehenehe te fāri’ira’a i te ’ite e tauturu ia tātou ’ia aupuru nā roto i te mau rāveʼa rau. Ta’a ’ē noa atu i te reira, « te mau parau tumu nō te ’ite ’o tē noa’a mai ia tātou i roto i teie orara’a nei, e ti’a ïa te reira ’e ’o tātou ato’a i roto i te ti’afa’ahou-ra’a (Te Ha’api’ira’a Tumu ’e te mau Fafaura’a 130:18).

Hōho’a

feiā ’āpī pa’ari e tuatāpapa ra i te mau pāpa’ira’a mo’a

Fa’arahi i te ’ite

Nāhea e ti’a ai ia tātou ’ia fa’atupu i te huru Mesia o te ’ite ? Teie te tahi mau mana’o :

1. ’A ha’amana’o ē ’ua ha’api’i marū noa ato’a Iesu i te roara’a o te tau. ’A fa’aitoito, ’a fa’a’oroma’i rā ia ’outou iho. E tupu te ha’api’ira’a « te fa’aue nā ni’a iho i te fa’aue, te a’o nā ni’a iho i te a’o » (2 Nephi 28:30).

2. Ha’api’i mai i te ’ite mai i te mau rāve’a ti’aturihia nō te ha’amāramaramara’a. (Hi’o « Te ’imira’a i te parau mau i roto i te tau nō te ha’amāramaramara’a hape » i roto i te Liahona rorouira nō ’Ātopa 2022.)

3. ’A ara maita’i. ’A ha’api’i mai nā roto mai i te mau mea e tupu ra ’ati a’e ia ’outou i te mau mahana ato’a. ’A ui i te mau uira’a. ’A tai’o i te mau buka maita’i ’e ’a vai ara noa. (Hiʼo Te Ha’api’ira’a Tumu ’e te mau Fafaura’a 88:79, 118 ; 90:15.)

4. Ha’api’i mai nā roto i te tuatāpapara’a ’e nā roto i te fa’aro’o (hi’o Te Ha’api’ira’a Tumu ’e te mau Fafaura’a 88:118). E ha’amaita’ihia tō ’outou ’aravihi ’ia māramarama i te parau mau i roto i te mau huru tumu parau ato’a nā roto i te arata’ira’a i tā ’outou tauto’ora’a i te pae ferurira’a maita’i roa a’e nā roto i tā ’outou tauto’ora’a pae vārua maita’i roa a’e. ’A ora i te hō’ē orara’a ’ia nehenehe ia ’outou ’ia fari’i i te tauturura’a a te Vārua Maita’i.