Te reo o te Vārua

Hōho’a

pereo’o uta ta’ata

Hōho’a i hōro’a-noa-hia e te fatu hōho’a ; fa’ahōho’ara’a nā Jennifer M. Potter

Fa’ahōho’ara’a nā Jennifer M. Potter

E peu mātauhia e au ’ia rātere i te tau ve’ave’a nā Europa ’e te hō’ē pupu ’ori. ’Ua rau te fāito o tō mātou mau ta’ata māta’ita’i, tā mātou mau ha’utira’a, ’e tō mātou pūai, terā rā, hō’ē peu tumu tei vai noa ma te taui ’ore : ’ua ’ōpani mātou i te mau ha’utira’a ato’a nā roto i te hīmenera’a, « ’Ei te Atua tātou i teienei »¹ nā roto i te reo o te fenua tā mātou i rātere. Nō te mea te rahira’a ta’ata o tā’u pupu ’ori, e melo ïa nō te ’Ēkālesia a Iesu Mesia i te Feiā Mo’a i te mau Mahana Hope’a nei, e mea au nā mātou tāua peu tumu ra. ’Ua riro te reira ’ei rāve’a fa’ahiahia roa nō te paraparau i tō mātou mau ta’ata māta’ita’i ’e nō te fa’a’ite i te here o te Metua i te ao ra.

I te pae hope’a o te hō’ē o teie mau tere, nō haere noa mai ra mātou nā te ’ōti’a i Helemani ’e tē ha’api’ipi’i ra mātou i te hīmene i roto i te reo Heremani nō te mau ha’utira’a e fātata mai ra. I tō mātou rā taera’a atu, ’ua ’ite a’era mātou ē, teie tuha’a fenua ta’a ’ē nō Heremani, e paraparau rātou i te reo Sorbian, e reo te reira ’aita roa atu e hōho’a i te hīmene tā mātou i ha’api’ipi’i maita’i.

A tere ai mātou nā ni’a i te pere’o’o, nō te haere i te vāhi ha’utira’a, ’ua rohirohi roa vau ’e ’ua hina’aro vau e ta’oto i te roara’a o te tere. Tē vai ra rā te tahi atu ā mau mana’o i roto i tō mātou mau ti’a fa’atere. ’Ua ani rātou i tō mātou mau arata’i ’ia ’īriti i te hīmene i roto i te reo Sorbian. I teienei, ’ua hina’aro rātou i te ta’ato’ara’a o te mau ta’ata ’āfa-ta’oto i roto i te pere’o’o ’ia ha’api’i i te hīmene tau hora noa hou tā mātou ha’utira’a.

’Ua rave mātou i tei mara’a ia mātou. I te hope’a o te ha’utira’a, ’ua ti’a ’āmui mātou i mua i te tahua ’e ’ua ha’amata mātou i te hīmene. Tē ha’amana’o ra vau i tō’u māere ’a tae ’ōhie mai ai i roto i tō’u ferurira’a te mau parau mātaro-’ore-hia tā’u i ’āno’ino’i ma’a hora nā mua atu. ’Ua ’ite au i tō’u mau fē’a’ara’a nā mua atu nō ni’a i tō mātou ineinera’a ’ia hīmene i te topara’a, ’a ti’aturi ai au i ni’a i te Vārua nō te fa’aha’amana’o iā’u i te mau parau.

Hōho’a

nā ta’ata e ’ori rā

Hōho’a i hōro’a-noa-hia mai e te fatu hōho’a

’Ua hi’o māere te mau ta’ata tei haere mai ’e ’ua ’oa’oa. I te hopera’a te hīmene, ’ua māmū noa te ta’ata. I muri iho, ’ua ti’a mai rātou ’e ’ua ha’amata i te hīmene mai i te hīmene nō mātou, tā rātou i fa’ata’a mai i muri a’e ē, e hīmene ha’amāuruuru te reira tā rātou e tāpe’a noa nō te mau taime ta’a ’ē.

’Ua ’ite pūai au i te Vārua i taua taime ra, noa atu ē, ’aita vau i māramarama e aha tā rātou e hīmene ra. ’Ua māuruuru roa vau i te mea ē, ’ua tauturu mai te Fatu iā’u ’ia fa’a’ite i tōna here noa atu ā tō’u mau mana’o nava’i ’ore. ’Ua fa’aha’amana’ohia iā’u ē, te here o te Metua i te ao ra, e poro’i nui ïa. Noa atu tō tātou mau ta’a-’ē-ra’a, e nehenehe tātou pā’āto’a e māramarama i te reo o te Vārua.