« Fa’aineine i tō ’outou repo pae vārua », Liahona, Tēnuare 2023.
Mai, pe’e mai
Fa’aineine i tō ’outou repo pae vārua
E nehenehe te parabole nō te ta’ata ueue huero e tauturu ia tātou ’ia fa’aineine nō tā tātou tuatāpapara’a Mai, pe’e mai i te faufa’a ’āpī i teie matahiti.
Hō’ē ’o tā’u mau parabole au roa i roto i te faufa’a ’āpī ’o te parabole ïa o te ta’ata ueue huero, mai tē ’itehia i roto i te Mataio 13:3–23 (hi’o ato’a Mareko 4:3–20 ; Luka 8:5–15). I roto i teie parabole, te mau rāve’a e fāri’i ai te ta’ata i te parau (te huero) e fa’aauhia ïa i te mau huru repo huru rau. Tē ha’api’i nei tātou ē, e tāpa’o faufa’a rahi tō te repo tāta’itahi, e mea maita’i ānei ’aore rā e mea ’ino.
Pinepine tātou i te tai’o i teie parabole ma te feruri ē, tē fa’ata’a nei te reira i te hina’aro o te ta’ata ’ia fāri’i ’e ’ia ora i te ’evanelia. Noa atu ē, e parau mau te reira, tē mana’o nei au ē, e nehenehe ato’a te parabole e fa’ata’a i tō tātou iho haerera’a i mua ’a tupu ai tātou i te rahi i roto i te fa’aro’o ’e i te ’ite i te ’evanelia. E nehenehe e parau ē, ’aita tātou i pōnao-tāmau-hia i roto i te hō’ē huru ’aore rā i te hō’ē fāito o te ti’aturira’a. E nehenehe tā tātou, nā roto i te fa’aro’o ’e te tauto’ora’a, e ha’amaita’i i tō tātou repo pae vārua ’ia hōro’a mai ho’i te reira i te hotu maita’i a’e.
Te hina’aro nei au e hi’opo’a i teie mana’o ’e ’o ’outou nō te mea ’ua tauturu te reira iā’u ’ia hāro’aro’a hōhonu i teie parabole. Tē ti’aturi nei au ē, ’a fa’aineine ai tātou nō tā tātou tuatāpapara’a Mai, pe’e mai i te faufa’a ’āpī nō te matahiti e fā mai nei, e nehenehe te hō’ē hi’opo’a-fa’ahou-ra’a i te parabole o te ta’ata ueue huero e tauturu ia tātou ’ia fa’aineine i tō tātou ’ā’au nō te fāri’i i te parau mau o te ’evanelia.
Te fāri’ira’a i te mau huero o te ’evanelia
I roto i te parabole, tē ha’api’i mai nei tātou ē, ’a ueue ai te ta’ata ueue :
-
’Ua topa te tahi mau huero i te hiti arati’a, ’e ’ua ’amuhia ’e te mau manu.
-
’Ua topa te tahi i roto i te mau vāhi papa. ’Ua ’ōteo mai rātou, terā rā, pa’apa’a rātou i te mahana.
-
’Ua topa te tahi pae i roto i te rā’au taratara, ’e ’ua fa’aapiapi te rā’au taratara ia rātou.
-
’Ua ma’iri te tahi pae i roto i te repo maita’i ’e ’ua hōro’a mai i te hotu.
Te fa’ata’a nei te Fatu ē :
« ’Ia fa’aro’o te hō’ē i te parau o te bāsileia ra, ’e ’aore i ha’apa’o i taua parau ra, ’ua haere maira taua mea ’ino ra, rave ’ē atura i tei ueuehia i roto i tāna ’ā’au ra. E au teie i tei ma’iri i te pae arati’a ra.
« ’O tei ma’iri i te vāhi papa ra, ’oia tei fāri’i i te parau ma te ’oa’oa ’ia fa’aro’o ra ;
« Nō te mea rā ’aore i a’ahia i roto i tōna ’ā’au, maura’a poto ïa tāna ; ’ia tupu ho’i te pohe ’e te hāmani ’ino i tāua parau ra, maheaitu maira ïa ’oia i reira ra.
« ’O tei ma’iri i roto i te ’aihere ra ’oia te ta’ata i fa’aro’o i te parau ; o tei hoene te parau i roto iāna i te tītau rahi i tō teie nei ao ra, ’e te ha’avare o te tao’a, ’aita atura i hotu mai.
« ’Āre’a tei ma’iri i te vāhi repo maita’i ra, e hotu mai ra tāna ta’ihō’ē hānere, ta’iono ’ahuru, ’e ta’itoru ’ahuru i te huero hō’ē ra, ’oia te ta’ata i fa’aro’o i te parau, e ha’apa’o māite atu ra i taua parau ra » (Mataio 13:19–23 ; reta tei fa’ahuru-’ē-hia).
E hi’o na tātou i te huru repo tāta’itahi ’e e hi’o e aha te nehenehe e rave nō te ha’amaita’i i te reira.
Fa’ahōho’ara’a nā David Green
Repo i te hiti arati’a
’Ua parau te peresideni Dallin H. Oaks, tauturu hō’ē i roto i te Peresidenira’a Mātāmua ē : « Te mau huero tei ma’iri i te pae arati’a (Mareko 4:4) ’aita ïa i topa i roto i te hō’ē repo tāhuti e tupu ai te reira. Mai te mau ha’api’ira’a tei ma’iri i ni’a iho i te hō’ē ’ā’au ’eta’eta ’e te ineine ’ore ».1
Hau atu, i te tahi taime, ’aita tātou e māramarama nei i te mea tā tātou e fa’aro’o nei ’aore rā e tai’o nei i roto i te mau pāpa’ira’a mo’a nō te mea ’aita tō tātou ’ā’au i ineine. Mai te mea ē, ’o te reira iho ā, e aha ïa te ti’a ia tātou ’ia rave ?
E nehenehe tātou e ’imi i te hō’ē ha’amāramaramara’a mai roto mai i te feiā tei māramarama. E nehenehe tātou e ani i te mau misiōnare, tō tātou ’orometua Ha’api’ira’a Sābati, tō tātou ti’a fa’atere autahu’ara’a ’aore rā ti’a fa’atere pupu, tō tātou ’orometua séminaire ’aore rā institut, ’o rātou e aupuru nei ia tātou, ’aore rā, i tō tātou nā metua ’e te mau melo o te ’utuāfare ha’apa’o maita’i. E nehenehe tātou e tuatāpapa i te mau a’ora’a o te ’āmuira’a. Tē hōro’a nei te fa’anahora’a Vaira’a buka ’evanelia e rave rahi mātēria e nehenehe e tauturu ia tātou ’ia ’imi i te hāro’aro’ara’a hau atu.
E pure ato’a tātou ’e e ani i te Atua i te tahi atu ā māramarama. Mai te mea e ’ā’au hina’aro mau tō tātou e mana’o pāpū mau tō tātou, ’e e fa’aro’o tō tātou i te Mesia, e fāri’i ïa tātou i te ’ite nō ni’a i te mau parau mau o te ’evanelia (hi’o Moroni 10:4–5). ’Ua parau te Fatu ē :
« E ani, e hōro’ahia mai tā ’outou ; e ’imi, e ’itea ïa ia ’outou ; e pātōtō atu, e ’īritihia mai te ’ōpani ia ’outou.
« ’O tei ani ra ho’i, ’ua noa’a ïa ; ’e ’o tei ’imi ra, ’ua ’itea ïa ; ’e te fēiā ato’a i pātōtō ra, ’ua ’īritihia ïa te ’ōpani » (3 Nephi 14:7–8).
Te repo i te mau vāhi papa
Tē fa’aro’o nei te tahi mau ta’ata i te ’evanelia tei fa’aho’i-fa’ahou-hia mai nā roto i te mau misiōnare, ’ua fāri’i i te here o te Mesia, ’e tē haere nei ’e tē ’oa’oa nei i te mau purera’a. Terā rā, i roto i te roara’a o te tau, e tāmau noa te mau fifi o te orara’a. E ’ite rātou ē, ’aita te orara’a i tauihia ’ei tahera’a nō te mau ha’amaita’ira’a hope ’ore. E iti tō rātou fa’aro’o ’e e painu rātou.
Tē ’ite ato’a nei te tahi pae i te « mau vāhi papa » ’ia haere ana’e rātou i te hō’ē purera’a ’aore rā i te hō’ē ’āmuira’a ’e e fa’auruhia ’ia rave i te mau mea maita’i ato’a mai taua taime ra. I te monirē rā, e ho’i fa’ahou rātou i tā rātou mau hōpoi’a tāmau. E vai fifi noa te mau tāmatara’a i te vāhi ravera’a ’ohipa. Mai te mea ra ho’i ē, e mea pūai mau te ’umera’a a te mau fa’ahemara’a. ’E nō reira, e iti mai ’aore rā e mo’e ’ē roa tō rātou hina’aro ’ia ha’amaita’i i te pae vārua.
’Ua ha’api’i mai rātou ma te fifi ē, ’aita ana’e mau a’a pae vārua hōhonu nō te tāpe’a ia tātou i roto i te mata’i, nō te fa’a’amu ia tātou i te mā’a ’ia po’ia ana’e tātou, ’aore rā ’ia fa’ahaumārū ia tātou ’ia ve’ave’a ana’e te mahana, e nehenehe tātou e pohe i te pae vārua.
Nāhea tātou ’ia ha’amaita’i atu ā i te repo ’ōfa’ifa’i ? Tātara i te mau ’ōfa’i ’e fa’ahōhonu i tō tātou mau a’a pae vārua.
E nehenehe te ’īritira’a i te mau ’ōfa’i e riro ’ei ’ohipa fifi. E tītau paha te reira i te fa’atupura’a i te hō’ē vāhi i reira te fa’aro’o e fa’aitoitohia ai. E tītau paha te reira i te ha’amaura’a i te mau auhoara’a ’āpī ’e te ha’apaera’a i te mau huru hi’ora’a ato’a o te ’ino (hi’o 1 Tesalonia 5:22).
E hina’aro tātou i te tauturu a te Fa’aora nō te fāri’i i te pūai nō te ’īriti i te mau ’ōfa’i. E tae mai te reira ’ia fāri’i ana’e tātou i te mau fafaura’a tāna e pūpū mai. E ha’amata te reira nā roto i te fāri’ira’a i te anira’a ’ia bāpetizohia. Te aura’a ra ’oia ho’i ’ia ha’amauhia ’e ’ia fāri’i i te hōro’a o te Vārua Maita’i. Te aura’a ra, ’o te fāri’ira’a ïa i te mau fafaura’a e ’ere-noa-hia nei ā e tātou, mai te fāri’ira’a i te autahu’ara’a ’aore rā te haerera’a i te hiero. Te aura’a ra, ’o te haerera’a ïa i te purera’a ’e te fa’a’āpīra’a i te mau fafaura’a nā roto i te ravera’a i te ’ōro’a mo’a i te hepetoma tāta’itahi.
’Ia tae ana’e mai te mau tāmatara’a ’e te mau fa’ahemara’a, e nehenehe tā tātou e tāpe’a māite i te mau fafaura’a tā tātou i rave i mua i te Fatu. « ’Ua tā’amu-pāpū-hia tātou i ni’a i te Fa’aora ’a ha’amana’o ai tātou ma te ha’apa’o maita’i ’e ’a tūtava ai ’ia ora mai te au i te mau tītaura’a tā tātou i fāri’i », te parau ïa a Elder David A. Bednar nō te Pupu nō te Tino ’Ahuru Ma Piti ’āpōsetolo. ’E ’o te reira tā’amura’a iāna te puna nō te pūai pae vārua i te mau tau ato’a nō tō tātou orara’a ».2
Repo i rotopū i te rā’au taratara
E fa’ati’a teie repo i te mau rā’au ’ia tupu, ’e tae noa atu i te mau rā’au taratara. Te rā’au taratara ’o « te mau peu ïa o teie nei ao, ’e te mau tao’a, ’e te mau mea e navenave ai ra » ’o tē nehenehe e arata’i ia tātou ’ia « ’ore ’ia hotu mai i te huero maita’i » (Luka 8:14).
E aha tē tupu ’ia fāri’i ana’e tātou i te mau fafaura’a ’aita rā tātou e haere fa’ahou nā ni’a i te ’ē’a nō te fafaura’a ? ’Aore rā e rave tātou i te ’ōro’a mo’a, ’aita rā tātou e ani i te fa’a’orera’a hara, nō te mea ’aita tātou e feruri fa’ahou ra i tā tātou mau hape. ’Aore rā e ani paha tātou i te fa’a’orera’a hara, e pāto’i rā tātou i te fa’a’ore i te hapa a vetahi ’ē. E fāri’i tātou i te mau fafaura’a o te hiero, ’aita rā tātou e aupuru i te feiā nava’i ’ore. E vaiiho tātou i te hiti i te mau rāve’a nō te fa’a’ite i te ’evanelia nō te mea tē mata’u ra tātou e ’ere te reira i te mea tano roa ’aore rā e mea huru ha’amā, ’aore rā nō te mea ’aita tātou i ’ite fa’ahou e aha te parau e parau.
Te rāve’a ’o te orara’a ïa i te fafaura’a tā tātou i rave i te taime a bāpetizohia ai tātou, « ’ia ’oto, ’a ’oto ai te feiā ’oto ra… [nō te] ha’amāhanahana ia rātou i tei au ’ia ha’amāhanahanahia ra, ’e ’ia ti’a ’ei ’ite o te Atua i te mau mahana ato’a, ’e i te mau mea ato’a, ’e i roto i te mau vāhi ato’a tā [tātou] e pārahi ra, ’e ’ia tae noa atu i te pohera’a » (Mosia 18:9).
E tātara tātou i te ’aihere ’ia tātarahapa ana’e tātou i te mau mahana ato’a, ma te rave i te tahi mau fa’atanora’a na’ina’i ’aore rā fa’atanora’a rarahi, ’e ’ia ho’i fa’ahou i ni’a i te ’ē’a ’āfaro ’e te piriha’o o te fafaura’a.
E pāto’i tātou ’ia vaiiho i te mau ’aihere o te orara’a ’ia ha’aapiapi ia tātou. E rave tātou i te reira nā roto i te fa’arirora’a i tō tātou fare ’ei mau vāhi mo’a nō te fa’aro’o. E ’imi tātou i te mau mea ato’a e ani manihini i te fa’aurura’a a te Vārua. E pāto’i tātou i te mau mea ato’a e arata’i ’ē atu i te reira fa’aurura’a. ’E e tāvini tātou i roto i te bāsileia o te Atua—i roto i tō tātou mau pi’ira’a, i roto i te hiero, i roto i te ’ohipa misiōnare, i roto i tō tātou mau ’utuāfare.
Te fenua maita’i
E rave rahi ’o tē fa’aro’o nei i te parau, e māramarama i te reira, ’e e vaiiho ’ia tupu i te rahi i roto i tō rātou ’ā’au. Te parau nei te Fatu ia rātou : « ’O vau tei hina’aro atu ia ’outou ’e ’ua ha’apa’o ia ’outou ’ia haere ’outou ’e ’ia hotu i te huero, ’ei huero vaiiho tai’ata » (Ioane 15:16). Nō taua mau huru ta’ata ra, te pāhonora’a ’o te haerera’a ïa i mua ma te fa’aro’o ’e te fa’a’oroma’i i roto i te mau ’ohipa maita’i.
’Ua ui te peresideni Oaks : « E aha te mea tā tātou e rave nei i te mau ha’api’ira’a a te Fa’aora i roto i tō tātou orara’a ? »3 I teie matahiti, ’a fa’aineine ai tātou nō te tuatāpapa i te Faufa’a ’Āpī, e mata na tātou i te ha’afātata atu i te Fa’aora ’e ’ia ha’amaita’i i tō tātou repo pae vārua ’ia ti’a ho’i ia tātou ’ia fāri’i i te parau. I muri iho e nehenehe tātou e fa’ahotu mai i te mau hotu tāna i ani mai ia tātou ’ia fa’ahotu, nā roto i te fāri’ira’a ’e te fa’a’āpīra’a i te mau fafaura’a e tā’amu ia tātou i ni’a iāna, nā roto i te tāvinira’a i te Atua ’e te herera’a i tō tātou mau ta’ata tupu, ’e nā roto i te haerera’a i mua nā ni’a i te ’ē’a o te fafaura’a ’o tē fa’aho’i ia tātou i te hō’ē mahana i tō tātou fa’aeara’a i te ra’i ra.