« Te hāmani-’ino-ra’a, te fa’a’amura’a—’e te fa’aorara’a », Liahona, Tēnuare 2023.
Feiā ʼāpī paʼari
Te hāmani-’ino-ra’a, te fa’a’amura’a—’e te fa’aorara’a
E mea hāmani ’ino ’e te pāpū ’ore tō’u ’utuāfare, nā roto rā i te Mesia, tē tīa’i nei au i teienei i tō’u ’utuāfare nō a muri a’e.
Mau hōho’a ta’ata i patahia
’Ua pa’ari au i roto i te hō’ē vāhi pāpū ’ore. ’Ua hāmani ’ino ’e ’ua tāu’a ’ore tō’u nā metua fānau iā’u, ’e ’ua fa’aruru vau e rave rahi tāmatara’a fifi. ’Ua fa’aruru vau i te ahoaho, te mau fifi nō te hōho’a o te tino, te pāto’ira’a i te mā’a, ’e te fa’aturumara’a tei tāpe’a iā’u mai te hō’ē mau ’āuri e rave rahi matahiti.
’Ua tā’atihia tō’u nā metua fānau i roto i te hiero, i muri noa a’e rā i tō’u bāpetizora’ahia i te va’ura’a o tō’u matahiti, ’ua ha’amata rāua i te fa’aātea ’ē i te ’Ēkālesia. ’E rahi noa atu tō rāua āteara’a i tā rāua mau fafaura’a, rahi noa ato’a atu te ’ino o tō mātou orara’a.
I te 14ra’a o tō’u matahiti, ’o vau te ta’ata ha’apa’o i tō’u taea’e hiparoto ’e tō’u metua vahine. ’Aita vau i ta’a ’ē, nāhea rā. ’Ua au ’ore roa vau iā’u iho ’e tō’u huru orara’a ’e ’ua ti’aturi au ē, e’ita roa atu tō’u orara’a e taui.
Terā rā, tupu mai nei te hō’ē temeio. ’Ua ’ite a’era tō’u metua vahine fanau ē, e’ita tāna e nehenehe e aupuru iā’u ’e ’ua pi’i atura ’oia i tōna taea’e i Singapour nō te ani ē, e fāri’i ānei ’oia ’ia fa’a’amu iā’u. Ma te mau pūtē tauiha’a ’e te ta’i, ’ua ta’uma vau i ni’a i te hō’ē manureva nō te ha’amata i te hō’ē orara’a ’āpī—hō’ē orara’a ti’a mā i te hāmani-’ino-ra’a. Terā rā, ’ua riro te fa’atanora’a i ni’a i tō’u ’utuāfare fa’a’amu ’e i te hō’ē ta’ere ’āpī ’ei ’ohipa fifi roa, ’e ’ua rohi au nō te haere i mua.
’Ua rave tō’u nā metua fa’a’amu i te mau mea ato’a e nehenehe ia rāua ’ia rave nō te tauturu iā’u. ’Ua ’ite au i te mau thérapeutes ’e te mau taote. ’Ua ha’amata ato’a vau i te haere fa’ahou i te purera’a, terā rā, te ha’api’ira’a mai nō ni’a i te hō’ē Metua i te ao ra tei here iā’u ’e e ’ōpuara’a tāna nō’u, ’ua riro ïa ’ei ’ohipa fifi, nō te mea ’aita vau i ti’aturi i te reira i muri a’e i te mau mea ato’a tā’u i fa’aruru.
’Aita vau i ’oa’oa. ’Aita vau i ’ite nāhea i te fa’aora i te mau mea nō tahito ra, ’e ’ua vai noa tō’u mana’o ti’aturi ’ore nō ni’a i te ananahi.
Te hina’aro ’ia ora mai
I te hō’ē mahana, tē feruri ra vau nō ni’a i te potora’a o te orara’a tāhuti nei. ’Aita vau i hina’aro e ha’amāu’a i tō’u orara’a ma te ’oa’oa ’ore. E ti’a iā’u ’ia ha’api’i mai nā roto mai i tō’u mau tāmatara’a, ’ia fa’a’ohipa i te mau parau tumu o te ’evanelia tei ha’api’ihia iā’u, ’e ’ia ani i te Mesia ’ia tomo mai i roto i tō’u orara’a.
’Ua rave au i te hō’ē ’ohipa fa’aro’o ’e ’ua ha’amata i te tūturi i raro ’e te anira’a i te Metua i te ao ra i te mau mahana ato’a i te pūai nō te fa’a’ore i te hapa a tō’u nā metua fānau, ’ia taui i tō’u mata’u ’ei fa’aro’o, ’ia ’ite i te fa’aorara’a ’e te ’oa’oa, ’e ’ia ’ite i te here i roto i tō’u orara’a. ’Ua haere au i te institut ’e ’ua ha’amata i te tuatāpapa i te mau pāpa’ira’a mo’a ’e i te fa’a’ohipa i te mau parau mau o te ’evanelia i roto i tō’u orara’a.
’Ua ’imi mau vau i te mana fa’aora o Iesu Mesia ’e tāna tāra’ehara. ’E i te roara’a o te tau, ’ua ha’amata tō’u orara’a i te taui. ’E nō te mea ’ua fa’a’oroma’i au, ’ua fāri’i i te rapa’āura’a a te thérapeute ’e a te taote, ’e ’ua fa’a’ī i tō’u orara’a i te Vārua i te mau mahana ato’a, ’ua ha’amata a’era vau i te ora : ’ua iti tō’u huru tāiva ’e ’ua rahi a’e te rirora’a mai iā’u iho. ’Ua tupu te hau i roto iā’u. ’Ua tāvini au ia vetahi ’ē. ’Ua here au, ’ua fa’a’ore i te hara ’e ’ua fāri’i au iā’u iho. ’Ua patu vau i te mau tā’amura’a maita’i ’e te here. ’Ua ha’amata vau i te ’ite i te here o te Metua i te ao ra iā’u. ’E nō te taime mātāmua i roto i tō’u orara’a, ’ua fāri’i au i te ’oa’oa mau.
Tē pūpū mai nei te Mesia i te tīa’ira’a nō tō tātou ananahi
E’ita tā’u e nehenehe e taui i tei tahito ra, terā rā mai tā Te Ha’api’ira’a Tumu ’e te mau Fafaura’a 122:7 e parau nei : « E noa’a [iā’u] te ’ite i te ’ohipa nā roto i teie mau mea ato’a nei, ’e e riro ho’i ’ei maita’i [nō’u] ». ’Ua ’ite au i teienei ē ’ua pāturu te Fa’aora iā’u i roto i tā’u mau ’arora’a. Noa atu rā te reira, ’ua tupu mau vau i te rahi nō tō’u hina’aro ’ia taui, ’e nō te mea te tāmau noa nei au i te fāriu i ni’a iāna.
Mai te mea tei roto ’outou i te hō’ē orara’a ’utuāfare fifi, ’ia ’ite mai ’outou ē, e Metua i te ao ra tō ’outou tei ’ite ia ’outou ’e tei here ia ’outou, ’e e ’īriti ’oia i te mau ’ūputa nō te hō’ē ananahi ’ana’ana. Hou vau ’a fa’a’amuhia ai, ’ua parau vau iā’u iho ē, e’ita roa atu tō’u huru orara’a e taui, ’e e’ita roa atu vau e fa’aipoipohia ’aore rā e fāri’i i te tamari’i nō te mea ’ua ri’ari’a vau e māuiui rātou mai iā’u nei. ’Ua ha’api’i mai rā vau ē, noa atu te mau ’arora’a tā tātou i fārerei i roto i tō tātou ’utuāfare, mai te mea e ’imi tātou i te Mesia, e nehenehe tātou e patu i tō tātou fare nō ananahi ’e te ’utuāfare mure ’ore ma te tīa’ira’a, te mau parau mau o te ’evanelia, ’e te here.
Mai tā Elder Clark G. Gilbert nō te Hitu ’Ahuru i ha’api’i mai : « Tātou pā’āto’a… e ha’amata tātou i te mau vāhi ta’a ’ē ma te mau hōro’ara’a ta’a ’ē o te orara’a. Vetahi ’ua fanauhia ma te mau ti’ara’a teitei, e rave rau mau rāve’a maita’i. Nō vetahi, e fa’aruru rātou… i te mau huru orara’a fifi… Tē nu’u ra ïa tātou i ni’a i te tua’āivi o te nu’ura’a o te ta’ata iho. E fa’ata’a-iti-hia mai tō tātou ananahi nā tō tātou vāhi ha’amatara’a ’e hau roa atu nā tō tātou tua’āivi. Tē ’ite nei Iesu Mesia i te maita’i hanahana noa atu te vāhi tātou e ha’amata ai… E rave ’oia i te mau mea ato’a e ti’a iāna ’ia rave nō te tauturu ia tātou ’ia huri i tō tātou tua’āivi i ni’a i te ra’i ».1
Noa atu te huru o tō ’outou orara’a, tē vai nei te ti’aturira’a ’e te fa’aorara’a e ’itehia i roto ia Iesu Mesia ! Tei pīha’i iho ’oia ia ’outou, ’e nāna e arata’i ia ’outou i te hau ’e te ’oa’oa ’a ’imi ai ’outou iāna—i te mau taime ato’a.